លោក សេង ប៊ុនវេង ដែលគេស្គាល់ថា អាចារ្យអេ ត្រូវបានព្រះមហាក្សត្រត្រាស់បង្គាប់តែងតាំងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន។
តាមព្រះរាជក្រឹត្យចុះថ្ងៃទី២២ ខែកក្កដា ឆ្នាំ២០២២ និងបានចេញផ្សាយនៅលើគេហទំព័ររបស់ទីស្តីការគណៈរដ្ឋមន្ត្រី កាលពីថ្ងៃទី២២ ខែមីនា ឆ្នាំ២០២៣ លោក សេង ប៊ុនវេង ត្រូវបានតែងតាំងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន និងមានឋានៈស្មើរដ្ឋលេខាធិការ ដោយមិនទទួលប្រាក់បំណាច់មុខងារ។
លោក សេង ប៊ុនវេង គឺជាប្រធានវិទ្យុ ABC 107.5 Mhz ហើយកាលពីអំឡុងឆ្នាំ២០១៦ លោក សេង ប៊ុនវេង ធ្លាប់មានភាពចម្រូងចម្រាសជាមួយអ្នកកាសែតក្នុងស្រុកដទៃទៀត ដោយពួកគេបានស្នើសុំឱ្យរដ្ឋមន្ត្រីក្រសួងព័ត៌មានលោក ខៀវ កាញារីទ្ធ ចាត់វិធានការបន្ទាន់ និងអប់រំកុំឱ្យប្រើពាក្យសម្តីអសុរោះ និងចោទប្រកាន់ទៅលើអ្នកសារព័ត៌មាន បន្ទាប់ពីប្រធានវិទ្យុរូបនេះបានហៅអ្នកកាសែតក្នុងស្រុកថា “កាសែតចោរ”៕
លោក សេង ប៊ុនវេង
ប្រធានវិទ្យុ ABC
- ការតែងតាំង: ទីប្រឹក្សារបស់លោកនាយករដ្ឋមន្ត្រី ហ៊ុន សែន
- កាលបរិច្ឆេទ: ថ្ងៃទី២២ ខែកក្កដា ឆ្នាំ២០២២
- សញ្ជាតិ: ខ្មែរ
- ប្រភេទឯកសារ: ព្រះរាជក្រឹត្យ
