ទីស្តីការគណៈរដ្ឋមន្ត្រីថ្មី ត្រូវបានរដ្ឋសភាអនុម័តនៅថ្ងៃទី២២ ខែសីហា ឆ្នាំ២០២៣ ដោយបង្ហាញពីការផ្លាស់ប្តូរជំនាន់នៃរចនាសម្ព័ន្ធអំណាច ដែលគ្រប់គ្រងប្រទេសកម្ពុជា។
លោក ហ៊ុន ម៉ាណែត បាននាំមកជាមួយនូវរដ្ឋមន្ត្រីមួយក្រុម ដែលភាគច្រើនគឺជាកូនៗរបស់សមាជិកគណៈរដ្ឋមន្ត្រីចាស់ ហើយដែលនឹងត្រូវដោះស្រាយបញ្ហាបន្ទាន់មួយចំនួន ដែលប្រទេសកម្ពុជាកំពុងប្រឈម។ ក្រាហ្វិកនេះ បង្ហាញពីសមាជិកគណៈរដ្ឋមន្ត្រីដែលត្រូវចាកចេញ និងគណៈរដ្ឋមន្ត្រីថ្មី និងទំនាក់ទំនងគ្រួសារនៅក្នុងចំណោមរដ្ឋមន្ត្រីជាច្រើន។
សូមអានអំពីរដ្ឋមន្ត្រីនីមួយៗ ដែលត្រូវចាកចេញ និងអ្នកដែលនឹងត្រូវចូលជំនួសពួកគេ រួមទាំងទំនាក់ទំនងគ្រួសាររបស់ពួកគេជាមួយសហសេវិកគណៈរដ្ឋមន្ត្រីដទៃទៀត។
លោក ហ៊ុន សែន នាយករដ្ឋមន្ត្រី
លោក ហ៊ុន សែន បានឡើងកាន់តំណែងជានាយករដ្ឋមន្ត្រីតាំងពីឆ្នាំ១៩៨៥ ដោយចាប់ផ្ដើមតំណែងនាយករដ្ឋមន្ត្រីរបស់លោកដោយការគាំទ្រពីរដ្ឋាភិបាលវៀតណាម។ បន្ទាប់ពីមានតម្រុយមិនច្បាស់លាស់អស់រយៈពេលច្រើនឆ្នាំមក លោក ហ៊ុន សែន កាលពីឆ្នាំ២០២១ បានឱ្យគណបក្សប្រជាជនកម្ពុជា អនុម័តយល់ព្រមឱ្យកូនប្រុសរបស់លោក គឺលោក ហ៊ុន ម៉ាណែត ក្លាយជាបេក្ខភាពនាយករដ្ឋមន្ត្រីនាពេលអនាគត។ ទើបតែនៅក្នុងខែកក្កដា ឆ្នាំ២០២៣ ប៉ុន្មានថ្ងៃបន្ទាប់ពីការបោះឆ្នោតជាតិនាពេលថ្មីៗនេះ លោក ហ៊ុន សែន បានបញ្ជាក់ចុងក្រោយថា លោក ហ៊ុន ម៉ាណែត និងគណៈរដ្ឋមន្ត្រីថ្មី នឹងចូលកាន់តំណែងនៅថ្ងៃទី២២ ខែសីហា ឆ្នាំ២០២៣។
លោក ហ៊ុន ម៉ាណែត នាយករដ្ឋមន្ត្រី
លោក ហ៊ុន ម៉ាណែត នឹងក្លាយជានាយករដ្ឋមន្ត្រីទី៣ របស់ប្រទេសកម្ពុជា ចាប់តាំងពីឆ្នាំ១៩៩៣ ពេលដែលអង្គការសហប្រជាជាតិរៀបចំការបោះឆ្នោតលើកដំបូងនៅកម្ពុជា។ លោក ម៉ាណែត ធ្លាប់ជាមេបញ្ជាការកងទ័ព និងជាកូនប្រុសរបស់លោក ហ៊ុន សែន ជាបងប្រុសរបស់លោក ហ៊ុន ម៉ានី ហើយក៏ជាសាច់ញាតិជាមួយលោក នេត សាវឿន លោក ហួត ហាក់ លោក សុខ សូកេន និងលោក ឈាង រ៉ា ផងដែរ។
លោក ប៊ិន ឈិន ឧបនាយករដ្ឋមន្ត្រី និងជារដ្ឋមន្ត្រីទីស្តីការគណៈរដ្ឋមន្ត្រី
លោក ប៊ិន ឈិន មានភារកិច្ចដ៏លំបាកក្នុងការចូលកាន់តំណែងនេះកាលពីឆ្នាំ២០១៧ បន្តពីលោក សុខ អាន ដែលជាអ្នករដ្ឋបាលដ៏ល្បីល្បាញរបស់រដ្ឋាភិបាល។ ខណៈពេលដែលលោកមិនសូវចេញមុខចេញមាត់ លោក ប៊ិន ឈិន ត្រូវបានផ្តល់ភារកិច្ចបន្ថែមកាលពីខែមីនា ឆ្នាំ២០២៣ រួមទាំងការងារដឹកនាំយន្តការដោះស្រាយវិវាទដីធ្លីផងដែរ។
លោក វង្សី វិស្សុត ឧបនាយករដ្ឋមន្ត្រី និងជារដ្ឋមន្ត្រីទីស្តីការគណៈរដ្ឋមន្ត្រី
លោក វង្សី វិស្សុត ត្រូវបានគេមើលឃើញថា ឥទ្ធិពលរបស់លោកកើនឡើងនៅក្នុងក្រសួងសេដ្ឋកិច្ច និងហិរញ្ញវត្ថុ ទីដែលលោក គឺជារដ្ឋលេខាធិការជាន់ខ្ពស់ម្នាក់។ ក្នុងតួនាទីថ្មីរបស់លោក គេរំពឹងថា លោកនឹងជួយរៀបចំរដ្ឋាភិបាលថ្មីរបស់លោក ហ៊ុន ម៉ាណែត ធ្វើឱ្យក្តីរំពឹងមានតុល្យភាព និងឆ្លើយតបតាមការសន្យារបស់គណបក្សប្រជាជនកម្ពុជាដែលបានធ្វើអំឡុងពេលបោះឆ្នោត។ ក្នុងឋានៈជាឧបនាយករដ្ឋមន្ត្រី លោកមានភារកិច្ចដូចជា ទទួលបន្ទុកប្រចាំការ សម្របសម្រួលកិច្ចការសម្រាប់គណៈរដ្ឋមន្ត្រី នាយករដ្ឋមន្ត្រីនិងបណ្តាឧបនាយករដ្ឋមន្ត្រី ទំនាក់ទំនងការងារជាមួយរដ្ឋសភា និងព្រឹទ្ធសភា និងរៀបចំចម្លើយតបនឹងសំណួររបស់សមាជិករដ្ឋសភា និងដោះស្រាយការងារប្រចាំថ្ងៃជំនួសនាយករដ្ឋមន្ត្រីតាមការប្រគល់សិទ្ធិពីនាយករដ្ឋមន្ត្រី ព្រមទាំងទទួលបន្ទុកអនុវត្តការងារពិសេឬបេសកកម្មផ្សេងទៀតដែលនាយករដ្ឋមន្ត្រីប្រគល់ជូន។
លោក យឹម ឆៃលី ឧបនាយករដ្ឋមន្ត្រី
លោក យឹម ឆៃលី គឺជាសម្ព័ន្ធមិត្តយូរអង្វែងរបស់លោក ហ៊ុន សែន ហើយទទួលខុសត្រូវលើការងារអភិវឌ្ឍន៍ និងការវិនិយោគក្នុងវិស័យកសិកម្ម។ កូនស្រីរបស់លោក យឹម ឆៃលី រៀបការជាមួយកូនប្រុសរបស់លោក ហ៊ុន សែន។ កូនប្រុសច្បងរបស់លោក យឹម ឆៃលី ជាមន្ត្រីនគរបាលជាន់ខ្ពស់ កូនប្រុសម្នាក់ទៀតជាអ្នកជំនួញ និងកូនប្រុសទី៣ ទើបតែត្រូវបានតែងតាំងជាអគ្គទេសាភិបាលរងធនាគារជាតិ។
លោក នេត សាវឿន ឧបនាយករដ្ឋមន្ត្រី
លោក នេត សាវឿន គ្រប់គ្រងអគ្គស្នងការនគរបាលជាតិ ដែលរងការចោទប្រកាន់ជុំវិញការរំលោភសិទិ្ធមនុស្សជាបន្តបន្ទាប់ និងការពាក់ព័ន្ធក្នុងការចាប់ខ្លួនសមាជិកបក្សប្រឆាំង និងសំឡេងអ្នកប្រឆាំង។ លោកបានរៀបការជាមួយក្មួយស្រីរបស់លោក ហ៊ុន សែន ហើយអ្នកទាំងពីរត្រូវបានគេចោទថា ទទួលបានសញ្ជាតិសាយព្រឹសតាមរយៈគម្រោងវិនិយោគ។ ក្នុងឋានៈជាឧបនាយករដ្ឋមន្ត្រី លោកមានភារកិច្ចដូចជាទទួលបន្ទុកជានាយករដ្ឋមន្ត្រីស្តីទីពេលនាយករដ្ឋមន្ត្រីអវត្តមាន ជួយនាយករដ្ឋមន្ត្រីលើវិស័យសន្តិសុខជាតិនិងសណ្តាប់ធ្នាប់សាធារណៈ ជួយនាយករដ្ឋមន្ត្រីក្នុងការសម្របសម្រួលដឹកនាំកម្លាំងគ្រប់ប្រភេទ និងទទួលសិទ្ធិពីនាយករដ្ឋមន្ត្រីក្នុងការបញ្ជាកងរាជអាវុធហត្ថលើផ្ទៃប្រទេសក្នុងពេលនាយករដ្ឋមន្ត្រីអវត្តមាន។
លោក កែ គឹមយ៉ាន ឧបនាយករដ្ឋមន្ត្រី
លោក កែ គឹមយ៉ាន ធ្លាប់ជាមេបញ្ជាការកងយោធពលខេមរភូមិន្ទរហូតដល់ពេលដែលលោក ហ៊ុន សែន ដកលោកចេញតំណែងនៅឆ្នាំ២០០៩ ហើយជំនួសដោយលោក ប៉ុល សារឿន ដែលជាសម្ព័ន្ធមិត្តរបស់លោក ហ៊ុន សែន ក្នុងអំឡុងរដ្ឋប្រហារឆ្នាំ១៩៩៧។ កូនស្រីរបស់លោក កែ គឹមយ៉ាន រៀបការជាមួយលោក ស សុខា ជារដ្ឋមន្ត្រីក្រសួងមហាផ្ទៃថ្មី។
លោក ស៊ុន ចាន់ថុល ឧបនាយករដ្ឋមន្ត្រី
លោក ស៊ុន ចាន់ថុល ធ្លាប់កាន់តំណែងជារដ្ឋមន្ត្រីក្រសួងពាណិជ្ជកម្ម និងរដ្ឋមន្ត្រីក្រសួងសាធារណការ និងដឹកជញ្ជូន។ លោកគឺជាកូនប្រសាររបស់អ្នកជំនួញដ៏ល្បីឈ្មោះ ខូវ ជូលី ហើយលោកធ្លាប់ធ្វើការឱ្យក្រុមហ៊ុន General Electric នៅសហរដ្ឋអាមេរិក។ លោកមានភារកិច្ចដូចជាជួយនាយករដ្ឋមន្ត្រីលើការងារទាក់ទាញការវិនិយោគឯកជន និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ទទួលបន្ទុកជាសហប្រធានខាងភាគីកម្ពុជា នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដើម្បីអនុវត្តកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ ជួយនាយករដ្ឋមន្ត្រីលើការងារគមនាគមន៍ដឹកជញ្ជូននិងភស្តុភារកម្ម និងជាប្រធានក្រុមប្រឹក្សាជាតិភស្តុភារកម្ម។
លោក ហោ ណាំហុង ឧបនាយករដ្ឋមន្ត្រី
លោក ហោ ណាំហុង បានបម្រើការជាអ្នកការទូតនៅប្រទេសបារាំង និងគុយបា មុនពេលលោកឡើងកាន់តំណែងជារដ្ឋមន្ត្រីក្រសួងការបរទេសក្នុងឆ្នាំ១៩៩៨។ លោកបានលាលែងពីតំណែងក្នុងឆ្នាំ២០១៦ និងជារដ្ឋមន្ត្រីការបរទេសដែលកាន់តំណែងយូរជាងគេរបស់កម្ពុជា។ លោកលាលែងពីតំណែង ហើយគណៈរដ្ឋមន្ត្រីថ្មី នឹងមានឧបនាយករដ្ឋមន្ត្រីតិចជាងមុនមួយរូប។
លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ
លោក ស ខេង បានធ្វើជារដ្ឋមន្ត្រីក្រសួងមហាផ្ទៃតាំងពីឆ្នាំ១៩៩២ ហើយទទួលខុសត្រូវក្នុងការដាក់ឱ្យប្រើប្រាស់ច្បាប់ដ៏ចម្រូងចម្រាស ដូចជា ច្បាប់ស្តីពី សមាគមនិងអង្គការមិនមែនរដ្ឋាភិបាល (LANGO) និងកងកម្លាំងនគរបាលរងចោទប្រកាន់ ពីបទ រំលោភសិទ្ធិ និងប្រើប្រាស់កម្លាំងហួសហេតុ។ លោក ស ខេង គឺជាប្អូនថ្លៃរបស់លោក ជា ស៊ីម អតីតប្រធានគណបក្សប្រជាជនកម្ពុជា និងត្រូវជាដន្លងជាមួយលោក កែ គឹមយ៉ាន ផងដែរ។
លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ
លោក ស សុខា ជាកូនប្រុសរបស់លោក ស ខេង ហើយធ្លាប់ជារដ្ឋលេខាធិការក្រសួងអប់រំ យុវជននិងកីឡា។ លោកបានរៀបការជាមួយកូនស្រីលោក កែ គឹមយ៉ាន និងត្រូវជាបងថ្លៃរបស់លោក កែ សួនសុភាព ជាសមាជិករដ្ឋសភា។ ក្នុងឋានៈជាឧបនាយករដ្ឋមន្ត្រី លោកមានភារកិច្ចដូចជាជួយនាយករដ្ឋមន្ត្រីលើកិច្ចការមហាផ្ទៃ ដឹកនាំសម្របសម្រួលការងារកែទម្រង់វិមជ្ឈការ និងវិសហមជ្ឈការ ការងារប្រយុទ្ធប្រឆាំងគ្រឿងញៀន ការជួញដូរមនុស្ស និងការបង្ក្រាបល្បែងស៊ីសងគ្រប់ប្រភេទ ការបំផ្លាញចោលអាវុធនិងជាសេនាធិការជួយនាយករដ្ឋមន្ត្រីលើការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព។
លោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ
លោក ទៀ បាញ់ ជារដ្ឋមន្ត្រីក្រសួងការពារជាតិតាំងពីឆ្នាំ២០០៦ ហើយរងការចោទប្រកាន់ថា អនុញ្ញាតឱ្យយោធាកម្ពុជាប្រើប្រាស់កម្លាំង និងអំពើហិង្សាលើជនស៊ីវិល។ លោកក៏កំពុងមើលការខុសត្រូវលើការជួសជុលមូលដ្ឋានកងទ័ពជើងទឹករាម ដែលតាមចោទថា អាចនឹងទទួលកងកម្លាំងចិននៅពេលបញ្ចប់ការជួសជុល។ លោក ទៀ វិញ ប្អូនប្រុសរបស់លោក គឺជាមេបញ្ជាការកងទ័ពជើងទឹកកម្ពុជា។
លោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ
លោក ទៀ សីហា គឺជាកូនប្រុសរបស់លោក ទៀ បាញ់ និងធ្លាប់ជាអភិបាលខេត្តសៀមរាបតាំងពីឆ្នាំ២០១៨។ ក្នុងឋានៈជាឧបនាយករដ្ឋមន្ត្រី លោកមានភារកិច្ចជួយនាយករដ្ឋមន្ត្រីលើវិស័យការពារជាតិ ដឹកនាំកិច្ចការបញ្ជូនកងកម្លាំងចូលរួមបេសកកម្មរក្សាសន្តិភាពរបស់អង្គការសហប្រជាជាតិ ព្រមទាំងទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀតដែលនាយករដ្ឋមន្ត្រីប្រគល់ជូន។
លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី
លោក ជា សុផារ៉ា ភាគច្រើនត្រូវបានគេស្គាល់យ៉ាងទូលំទូលាយនៅក្នុងរាជធានីភ្នំពេញថា ជាអភិបាលដ៏មានប្រជាប្រិយ។ ក្នុងតួនាទីជារដ្ឋមន្ត្រីក្រសួងរៀបចំដែនដី លោកជួយឱ្យមានការរីកចម្រើនវិស័យសំណង់។ ប៉ុន្តែជម្លោះដីធ្លីនៅតែជាបញ្ហាទូទៅបំផុតដែលកំពុងញាំញីប្រជាជនកម្ពុជា ដោយលោក សុផារ៉ា ជាអ្នកចាត់ចែងដោយផ្ទាល់សម្រាប់ការបណ្តេញចេញប្រជាពលរដ្ឋនៅជុំវិញតំបន់ឧទ្យានអង្គរ។
លោក សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី
លោក សាយ សំអាល់ ផ្លាស់ពីក្រសួងបរិស្ថាន ទៅដឹកនាំក្រសួងរៀបចំដែនដី។ ការផ្លាស់ប្តូរនេះ គេមើលឃើញថា លោកនឹងទទួលមរតកនៃវិវាទដីធ្លីដែលមិនទាន់បានដោះស្រាយចប់ និងនិន្នាការនាពេលថ្មីនៃការផ្ទេរដីរដ្ឋទៅឱ្យបុគ្គលឯកជន មន្ត្រីរដ្ឋាភិបាល និងឧកញ៉ាដែលមានខ្នងក្រាស។ លោកគឺជាកូនប្រុសរបស់លោក សាយ ឈុំ ដែលនឹងត្រូវបាត់បង់តំណែងជាប្រធានព្រឹទ្ធសភាទៅលោក ហ៊ុន សែន នៅឆ្នាំក្រោយ។ ក្នុងឋានៈជាឧបនាយករដ្ឋមន្ត្រី លោកមានភារកិច្ចដូចជាជួយនាយករដ្ឋមន្ត្រីលើវិស័យរៀបចំដែនដី នគរូបនីយកម្ម និងសំណង់ ជាប្រធានអាជ្ញាធរជាតិដោះស្រាយទំនាស់ដីធ្លី ព្រមទាំងទទួលបន្ទុកអនុវត្តការងារពិសេសឬបេសកកម្មពិសេសផ្សេងទៀត ដែលនាយករដ្ឋមន្ត្រីប្រគល់ជូន។
លោក ប្រាក់ សុខុន ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេស
លោក ប្រាក់ សុខុន បម្រើការជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ រហូតដល់ឆ្នាំ២០១៦ នៅពេលដែលលោកត្រូវបានប្តូរមកកាន់តំណែងជារដ្ឋមន្ត្រីក្រសួងការបរទេស ដោយចូលកាន់តំណែងនេះបន្តពីលោក ហោ ណាំហុង។ លោកគឺជាស្វាមីរបស់លោកស្រី ខេង សំវ៉ាដា ជាសមាជិករដ្ឋសភា ហើយត្រូវជាឪពុកក្មេករបស់លោក ហែម វណ្ឌី រដ្ឋមន្ត្រីថ្មីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស
លោក សុខ ចិន្តាសោភា ជាប្រធានក្រុមប្រឹក្សាអភិវឌ្ឍន៍កម្ពុជា និងជាអ្នកដឹកនាំលំហូរវិនិយោគចូលក្នុងប្រទេស។ លោកធ្លាប់ធ្វើការនៅក្រសួងទេសចរណ៍ និងសាជីវកម្មបារាំង។ ក្នុងឋានៈជាឧបនាយករដ្ឋមន្ត្រី លោកទទួលបន្ទុកជួយនាយករដ្ឋមន្ត្រីលើវិស័យការបរទេស និងសហប្រតិបត្តិការអន្តរជាតិ ផ្តល់យោបល់ជូននាយករដ្ឋមន្ត្រី អំពីក្របខណ្ឌគោលនយោបាយក្រៅប្រទេស ការសម្របសម្រួលការបញ្ជូនកងកម្លាំងកម្ពុជាចូលរួមបេសកកម្មរក្សាសន្តិភាពរបស់អង្គការសហប្រជាជាតិ និងទទួលសិទ្ធិពីនាយករដ្ឋមន្ត្រី ក្នុងការពិនិត្យ និងសម្រេចលើសំណើស្មុំកូន និងការសុំលាសញ្ជាតិ ព្រមទាំងទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀតដែលនាយករដ្ឋមន្ត្រីប្រគល់ជូន។
លោក អូន ព័ន្ធមុនីរ័ត្ន ឧបនាយករដ្ឋមន្ត្រីនិងជារដ្ឋមន្ត្រីក្រសួងសេដ្ឋកិច្ចនិងហិរញ្ញ វត្ថុ
លោក អូន ព័ន្ធមុនីរ័ត្ន បន្តកាន់តំណែងជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។ លោក អូន ព័ន្ធមុនីរ័ត្ន គឺជាប្រធានឧត្តមក្រុមប្រឹក្សាសេដ្ឋកិច្ចជាតិនិងបច្ចុប្បន្នជាប្រធានធនា គារវិនិយោគហេដ្ឋារចនាសម្ព័ន្ធអាស៊ី (AIIB) ។ លោកក៏ធ្លាប់ព្យាយាមដាក់ពាក្យសុំលិខិត ឆ្លងដែនសាយព្រឹសដូចលោក នេត សាវឿន ផងដែរ។លោក អូន ព័ន្ធមុនីរ័ត្ន បានរៀបការជាមួយលោកស្រី អ៊ឹម ប៉ូលីកា ជាអ្នកជំនួញនិងជាកូនស្រីរបស់លោក អ៊ឹម សុធី អតីតរដ្ឋមន្ត្រីក្រសួងអប់រំ។ កូនប្រុសរបស់លោកបានរៀបការជាមួយនឹងកូនស្រីរបស់ឧកញ៉ា ជឹង សុភាព។ ក្នុងឋានៈជាឧបនាយករដ្ឋមន្ត្រី លោកមានភារកិច្ចទទួលបន្ទុកជានាយករដ្ឋមន្ត្រីស្តីទី ពេលនាយករដ្ឋមន្ត្រី និងឧបនាយករដ្ឋមន្ត្រី នេត សាវឿន អវត្តមាន ជួយនាយករដ្ឋមន្ត្រីលើវិស័យសេដ្ឋកិច្ច និងហិរញ្ញវត្ថុ ជាប្រធានគណៈកម្មការគោលនយោបាយសេដ្ឋកិច្ចនិងហិរញ្ញវត្ថុ ជាប្រធានក្រុមប្រឹក្សាជាតិគាំពារសង្គមនិងជាប្រធានឧត្តមក្រុមប្រឹក្សាសេដ្ឋកិច្ចជាតិ ព្រមទាំងទទួលបន្ទុកការងារពិសេស ឬបេសកកម្មពិសេសផ្សេងទៀត ដែលនាយករដ្ឋមន្ត្រីប្រគល់ជូន។
លោក ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា
លោក ហង់ជួន ណារ៉ុន បន្តកាន់តំណែងនៅក្រសួងអប់រំ យុវជន និងកីឡា។ ខណៈពេលដែលលោកទទួលបានការកោតសរសើរចំពោះការរៀបចំការប្រឡងមធ្យមសិក្សាទុតិយភូមិប្រចាំឆ្នាំ ប៉ុន្តែក្រសួងនៅមិនទាន់អាចទប់ស្កាត់អំពើពុករលួយនៅតាមសាលារៀន ស្តង់ដារបង្រៀនទាប និងនិន្នាការនៃការបោះបង់ការសិក្សានាពេលថ្មីៗនេះនៅឡើយ ជាពិសេសនៅពេលមានការរីករាលដាលនៃជំងឺកូវីដ-១៩។ ក្នុងឋានៈជាឧបនាយករដ្ឋមន្ត្រី លោកមានភារកិច្ចដូចជាជួយនាយករដ្ឋមន្ត្រីលើវិស័យអប់រំ យុវជន និងកីឡា ព្រមទាំងទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀត ដែលនាយករដ្ឋមន្ត្រីប្រគល់ជូន។
លោក កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌
លោក កើត រិទ្ធ នៅតែជារដ្ឋមន្ត្រីក្រសួងយុត្តិធម៌ និងបានឡើងឋានៈជាឧបនាយករដ្ឋមន្ត្រី។ លោកធ្លាប់ធ្វើជារដ្ឋលេខាធិការនៅក្រសួងយុត្តិធម៌ មុននឹងឡើងកាន់តំណែងជារដ្ឋមន្ត្រីនៅឆ្នាំ២០២០។ ក្រសួងបានព្យាយាមកាត់បន្ថយសំណុំរឿងក្នុងប្រព័ន្ធតុលាការ ប៉ុន្តែធ្វើបានតិចតួចនៅឡើយ ដើម្បីធ្វើកំណែទម្រង់ប្រព័ន្ធតុលាការ ដែលគេចាត់ទុកថា កន្លែងដែលពុករលួយបំផុតមួយនៅក្នុងពិភពលោក។ ក្នុងឋានៈជាឧបនាយករដ្ឋមន្ត្រី លោកមានភារកិច្ចជួយនាយករដ្ឋមន្ត្រីលើវិស័យយុត្តិធម៌ និងការងារជាមួយអង្គការតុលាការ និងអង្គការអយ្យការ ការកែទម្រង់ច្បាប់ និងប្រព័ន្ធយុត្តិធម៌ ការដឹកនាំសម្របសម្រួលការអនុវត្តនយោបាយព្រហ្មទណ្ឌ ជួយនាយករដ្ឋមន្ត្រីលើការដឹកនាំសម្របសម្រួលការប្រឆាំងការសម្អាតប្រាក់ ហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ជួយនាយករដ្ឋមន្ត្រីលើការដោះស្រាយវិវាទក្រៅប្រព័ន្ទតុលាការ ព្រមទាំងការងារនិងបេសកកម្មផ្សេងទៀត ដែលនាយករដ្ឋមន្ត្រីប្រគល់ជូន។
លោកស្រី ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច
លោកស្រី ម៉ែន សំអន ជាឧបនាយករដ្ឋមន្ត្រីតាំងពីឆ្នាំ២០០៩ ហើយមានទំនាក់ទំនងជាមួយអ្នកជំនួញ ដែលជាប់ពាក់ព័ន្ធនឹងល្បែងស៊ីសងតាមអ៊ីនធឺណិត និងសកម្មភាពខុសច្បាប់នៅក្រុងព្រះសីហនុ។ លោកស្រីក៏បានដឹកនាំអង្គការក្រៅរដ្ឋាភិបាលក្នុងស្រុកមួយ ដែលបានបង្កើនវត្តមានអ្នកសង្កេតការណ៍របស់ខ្លួនក្នុងការបោះឆ្នោតជាបន្តបន្ទាប់។
លោក ហួត ហាក់ រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច
លោក ហួត ហាក់ ចូលកាន់តំណែងបន្តពីលោកស្រី ម៉ែន សំអន និងជាប្អូនថ្លៃឈ្មោះ គ្រី វួចឡេង ជាក្មួយស្រីរបស់អតីតជំទាវទី១ លោកស្រី ប៊ុន រ៉ានី។
លោក សាយ សំអាល់ រដ្ឋមន្ត្រីក្រសួងបរិស្ថាន
លោក សាយ សំអាល់ ត្រូវបានតែងតាំងជារដ្ឋមន្ត្រីក្រសួងបរិស្ថានក្នុងឆ្នាំ២០១៣ ហើយលោកបានចូលកាន់តំណែងនេះ ខណៈពេលដែលព្រៃឈើរបស់ប្រទេសកម្ពុជា ត្រូវបានគេមើលឃើញថា រងការកាប់បំផ្លាញកាន់តែខ្លាំងនៅក្នុងរយៈពេលមួយទសវត្សរ៍ចុងក្រោយនេះ។ លោកជាប្អូនប្រុសរបស់លោកស្រី សាយ សំអាត ដែលទើបត្រូវបានតែងតាំងជាអគ្គទេសាភិបាលរងធនាគារជាតិ។ លោកគឺជាកូនប្រសាររបស់លោក ឌិត មុន្ទី ប្រធានតុលាការកំពូល និងជាប្អូនថ្លៃរបស់លោក ឌិត ទីណា រដ្ឋមន្ត្រីក្រសួងកសិកម្ម។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន
លោក អ៊ាង សុផល្លែត ជារដ្ឋលេខាធិការក្រសួងបរិស្ថាន និងជាជំនួយការរបស់លោក ហ៊ុន សែន ហើយលោកបានរៀបការជាមួយកូនស្រីរបស់លោក ជា សុផារ៉ា រដ្ឋមន្ត្រីក្រសួងរៀបចំដែនដីដែលត្រូវចាកចេញពីមុខតំណែង។ ភរិយារបស់លោក សុផល្លែត គឺជាម្ចាស់ក្រុមហ៊ុន Paragon Group ។ លោកមានចំណាប់អារម្មណ៍ខ្លាំងលើវិស័យកសិកម្ម។
លោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន
លោក ស៊ុន ចាន់ថុល ធ្លាប់គ្រប់គ្រងនៅក្រសួងពាណិជ្ជកម្ម ដែលលោកបានណែនាំឱ្យមានការចុះបញ្ជីឈ្មោះក្រុមហ៊ុន។ បន្ទាប់ពីប្តូរមកក្រសួងសាធារណការ និងដឹកជញ្ជូន លោកបានគ្រប់គ្រងការសាងសង់ផ្លូវ ដែលត្រូវបានផ្តល់មូលនិធិ ដែលភាគច្រើនពីរដ្ឋាភិបាលចិន។
លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន
លោក ប៉េង ពោធិ៍នា ធ្លាប់ជារដ្ឋលេខាធិការក្រសួងដដែល ហើយនៅពេលនេះ នឹងដឹកនាំក្រសួងនេះ ក្នុងឋានៈជារដ្ឋមន្ត្រី។ លោក ពោធិ៍នា គឺជាកូនប្រុសរបស់លោកស្រីឧបនាយករដ្ឋមន្ត្រី ម៉ែន សំអន។ ឪពុករបស់លោកឈ្មោះ ប៉េង ប៉ាត់ ជាអតីតសមាជិកព្រឹទ្ធសភា ហើយបងប្អូនប្រុសរបស់លោកបច្ចុប្បន្នជាអភិបាលរងខេត្តស្វាយរៀង។
លោក ចម ប្រសិទ្ធិ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ និងនវានុវត្តន៍
លោក ចម ប្រសិទ្ធ ធ្លាប់ជារដ្ឋមន្ត្រីក្រសួងពាណិជ្ជកម្មជាងមួយទស្សវត្សមុន ហើយត្រូវបានស្នើឱ្យមកដឹកនាំក្រសួងឧស្សាហកម្ម និងសិប្បកម្ម ដែលបំបែកចេញពីក្រសួងរ៉ែ និងថាមពល។ លោកគឺជាឪពុករបស់លោកស្រី ចម និម្មល និងជាឪពុកក្មេករបស់លោក សុខ សូកេន រដ្ឋមន្ត្រីក្រសួងទេសចរណ៍ថ្មី។
លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ និងនវានុវត្តន៍
លោក ហែម វណ្ណឌី ជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។ លោកធ្លាប់ធ្វើការនៅឧត្តមក្រុមប្រឹក្សាសេដ្ឋកិច្ចជាតិ អាជ្ញាធរកំចាត់មីនកម្ពុជា ធនាគារអភិវឌ្ឍន៍អាស៊ី និងនៅទីភ្នាក់ងារ UNFPA។ លោកបានរៀបការជាមួយកូនស្រីរបស់លោក ប្រាក់ សុខុន រដ្ឋមន្ត្រីក្រសួងការបរទេសដែលត្រូវចាកចេញនោះ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល
លោក ស៊ុយ សែម បានបម្រើការជារដ្ឋមន្ត្រីក្រសួងឧស្សាហកម្ម រ៉ែ និងថាមពល មុនពេលក្រសួងនេះ ត្រូវបានបំបែកជាពីរ កាលពីឆ្នាំ២០១៣។ លោកគឺជាស្វាមីរបស់លោកស្រី ជា ខេង ដែលជាម្ចាស់ក្រុមហ៊ុន KDC International ដែលពាក់ព័ន្ធជម្លោះដីធ្លីរ៉ាំរ៉ៃក្នុងខេត្តកំពង់ឆ្នាំង។
លោក កែវ រតនៈ រដ្ឋមន្ត្រីក្រសួងរ៉ែនិងថាមពល
លោក កែវ រតនៈ ជាប្រធានអគ្គិសនីកម្ពុជា ហើយនឹងចូលកាន់តំណែងរដ្ឋមន្ត្រីនៅក្រសួងរ៉ែ និងថាមពល ដែលបាននឹងកំពុងធ្វើការ ដើម្បីធ្វើឱ្យប្រទេសកម្ពុជា មានថាមពលអគ្គិសនីគ្រប់គ្រាន់សម្រាប់ប្រើប្រាស់ ប៉ុន្តែថាមពលថ្មីភាគច្រើនបានមកពីធ្យូងថ្ម និងទំនប់វារីអគ្គិសនី។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល
លោក ម៉ម ប៊ុនហេង គឺជាមេដឹកនាំជួរមុខនៃកិច្ចខិតខំប្រឹងប្រែងរបស់ប្រទេសកម្ពុជាក្នុងការទប់ស្កាត់ជំងឺរាតត្បាតកូវីដ-១៩ ហើយត្រូវបានសាទរចំពោះយុទ្ធនាការចាក់វ៉ាក់សាំងដែលទទួលបានជោគជ័យយ៉ាងធំធេង។
លោក ឈាង រ៉ា រដ្ឋមន្ត្រីក្រសួងសុខាភិបាល
លោក ឈាង រ៉ា ចូលកាន់តំណែងបន្តពីលោក ម៉ម ប៊ុនហេង ហើយនឹងលាលែងពីតំណែងជាប្រធានមន្ទីរពេទ្យកាល់ម៉ែតគ្រប់គ្រងដោយរដ្ឋ។ លោក ឈាង រ៉ា បានរៀបការជាមួយលោកស្រី គឹម សុខលាភ ជាក្មួយស្រីរបស់លោកជំទាវ ប៊ុន រ៉ានី។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ
លោក អ៊ិត សំហេង កន្លងមកធ្លាប់ដឹកនាំក្រសួងសង្គមកិច្ច មុនពេលចូលកាន់តំណែងជារដ្ឋមន្ត្រីក្រសួងការងារ។ គេមើលឃើញថា វិស័យនេះមានភាពចលាចលជាបន្តបន្ទាប់ជុំវិញប្រាក់ឈ្នួល ការធ្វើឱ្យសហជីពចុះខ្សោយ និងការបិទរោងចក្រ ដែលជារឿយៗធ្វើឱ្យកម្មករមិនបានទទួលអ្វីទាំងអស់ ក្រៅពីប្រាក់ឧបត្ថម្ភតិចតួច ដែលផ្តល់ដោយក្រសួងការងារ។
លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ
លោក ហេង សួរ ធ្លាប់ជារដ្ឋលេខាធិការក្រសួងការងារ និងជាផ្នែកមួយនៃកិច្ចខិតខំប្រឹងប្រែង ដើម្បីចាប់ផ្តើមបង្កើតក្រុមប្រឹក្សាជាតិប្រាក់ឈ្នួលអប្បបរមាដែលមានយន្តការត្រីភាគី។ ប៉ុន្តែសម្រេចបានតិចតួចក្នុងការដោះស្រាយបញ្ហាដ៏អូសបន្លាយផ្សេងទៀត ដែលកំពុងញាំញីវិស័យកាត់ដេរ ដូចជាការដឹកជញ្ជូនកម្មករដែលមានហានីភ័យ និងសិទ្ធិកម្មករជាដើម។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍
លោក ជា វ៉ាន់ដេត នឹងបន្តធ្វើជារដ្ឋមន្ត្រីក្រសួងប្រៃសណីយ៍ និងទូរគមនាគមន៍។ លោកបានចូលដឹកនាំក្រសួងនេះ នៅឆ្នាំ២០២០ ហើយចាប់តាំងពីពេលនោះមក បានឯកភាពឱ្យបិទគេហទំព័រព័ត៌មានរិះគន់រដ្ឋាភិបាលមួយចំនួន និងកំណត់មូលដ្ឋានសម្រាប់ច្រកទ្វារអ៊ីនធឺណិតជាតិ។
លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍជនបទ
លោក អ៊ុក រ៉ាប៊ុន ធ្លាប់ជារដ្ឋមន្ត្រីក្រសួងកសិកម្ម មុនពេលលោកត្រូវបានផ្លាស់ទៅក្រសួងអភិវឌ្ឍន៍ជនបទ។ លោកត្រូវបានគេចោទប្រកាន់ពីបទពុករលួយ និងបក្ខពួកនិយម ដោយសារការជ្រើសរើសកូនប្រុស និងសមាជិកគ្រួសារចូលបម្រើការងារក្នុងក្រសួងនេះ។
លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍជនបទ
លោក ឆាយ រិទ្ធិសែន ធ្លាប់បម្រើការនៅមន្ទីររៀបចំដែនដី រាជធានីភ្នំពេញ ប៉ុន្តែត្រូវបានដកចេញវិញ បន្ទាប់ពីមានជម្លោះដីធ្លីជាច្រើននៅក្នុងរាជធានី រួមទាំងជម្លោះដីធ្លីនៅតំបន់បឹងកក់ផងដែរ។ លោកជាកូនប្រុសរបស់លោក ឆាយ ថន រដ្ឋមន្ត្រីក្រសួងផែនការ ដែលនឹងត្រូវចាកចេញពីមុខតំណែង។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម
លោក ប៉ាន សូរស័ក្តិ ធ្លាប់ជារដ្ឋលេខាធិការ មុនពេលលោកត្រូវបានដំឡើងឋានៈជារដ្ឋមន្ត្រីក្រសួងពាណិជ្ជកម្មក្នុងឆ្នាំ២០១៦។ លោកបានអនុម័តច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ដែលបានពន្យារពេលជាយូរមកហើយ ដែលដាក់ទណ្ឌកម្មអ្នកលក់អនឡាញ ជាទីផ្សារដ៏ធំនៅលើ Facebook ដែលមិនបានចុះឈ្មោះជាមួយរដ្ឋាភិបាល។
លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម
លោកស្រី ចម និម្មល បានធ្វើការនៅក្រសួងពាណិជ្ជកម្មអស់រយៈពេលជាងពីរទសវត្សរ៍មកហើយ ហើយថ្មីៗនេះបានបម្រើការជារដ្ឋលេខាធិការនៅក្រសួងនេះ។ លោកស្រីគឺជាកូនស្រីរបស់លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម ដែលធ្លាប់កាន់តំណែងជារដ្ឋមន្ត្រីក្រសួងពាណិជ្ជកម្មកន្លងមក។ បងប្អូនស្រីរបស់លោកស្រីបានរៀបការជាមួយលោក សុខ សូកេន រដ្ឋមន្ត្រីក្រសួងទេសចរណ៍ថ្មី។
លោក ឆាយ ថន រដ្ឋមន្ត្រីក្រសួងផែនការ
លោក ឆាយ ថន ជារដ្ឋមន្ត្រីក្រសួងការបរទេស ក្រោមរដ្ឋាភិបាលគ្រប់គ្រងដោយវៀតណាម ក្នុងទសវត្សរ៍ឆ្នាំ១៩៨០ បន្ទាប់មក លោកបានផ្លាស់ទៅក្រសួងផែនការ ក្នុងឋានៈជារដ្ឋលេខាធិការ មុនពេលឡើងជារដ្ឋមន្ត្រី។ កូនប្រុសរបស់លោកគឺលោក ឆាយ រិទ្ធីសែន នឹងចូលកាន់តំណែងជារដ្ឋមន្ត្រីក្រសួងអភិវឌ្ឍន៍ជនបទ។
លោក ប៊ិន ត្រឈៃ រដ្ឋមន្ត្រីក្រសួងផែនការ
លោក ប៊ិន ត្រឈៃ នឹងចូលដឹកនាំក្រសួងផែនការដែលកាន់តែមានប្រសិទ្ធភាពចំពោះប្រជាពលរដ្ឋចាប់តាំងពីមានការផ្ទុះជំងឺកូវីដ-១៩ នៅពេលរដ្ឋាភិបាលបង្កើនការចំណាយលើកម្មវិធីបណ្ណក្រីក្រ។ លោកគឺជាកូនប្រុសរបស់លោក ប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។
លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា
លោក វង សូត បានរងការរិះគន់ចំពោះការចាត់ចែងរបស់ក្រសួងចំពោះមណ្ឌលព្រៃស្ពឺ និងចំពោះមតិដែលលោកបានធ្វើកាលពីឆ្នាំ២០១៧ ដោយគំរាមវាយមនុស្សនឹងគល់ឫស្សី ប្រសិនបើពួកគេតវ៉ាលទ្ធផលបោះឆ្នោតឆ្នាំ២០១៨។ លោកជាកូនប្រសាររបស់លោក ហេង សំរិន ដែលជាប្រធានរដ្ឋសភា។
លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា
លោក ជា សុមេធី ធ្លាប់ធ្វើជាអភិបាលខេត្តព្រៃវែង ដែលជាទីតាំងរឹងមាំរបស់លោក ជា ស៊ីម ដែលជាឪពុករបស់លោក និងជាអតីតប្រធានគណបក្សប្រជាជនកម្ពុជា។ កន្លងមក លោក ជា សុមេធី ធ្លាប់ជាអគ្គស្នងការរងនគរបាលជាតិ។ លោកក៏ជាសាច់ញាតិរបស់លោក ស ខេង និងលោក ស សុខា ផងដែរ។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ
លោក ឌិត ទីណា នឹងបន្តដឹកនាំក្រសួងកសិកម្ម រុក្ខាប្រមាញ់ និងនេសាទ ដដែល។ លោកជារដ្ឋមន្ត្រីថ្មីបំផុត ដែលត្រូវបានបន្ថែមទៅក្នុងគណៈរដ្ឋមន្ត្រីចាស់។ លោកបានផ្តួចផ្តើមគោលនយោបាយឱ្យមានអ្នកជំនាញកសិកម្មម្នាក់ក្នុងមួយឃុំ និងចង់បង្កើនការនាំចេញដំណាំកសិកម្ម។ លោកគឺជាកូនប្រុសរបស់លោក ឌិត មុន្ទី ជាប្រធានតុលាការកំពូល និងជាបងថ្លៃរបស់លោក សាយ សំអាល់ រដ្ឋមន្ត្រីក្រសួងរៀបចំដែនដីថ្មី។
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម
លោក លឹម គានហោ បានដឹកនាំក្រសួងនេះ អស់រយៈពេលជាងពីរទសវត្សរ៍មកហើយ ហើយថ្មីៗនេះបានប្រឈមនឹងការរិះគន់ចំពោះការតែងតាំងកូនរបស់លោកពីររូប ឱ្យចូលបម្រើការងារក្នុងក្រសួងនេះ។
លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម
លោក ថោ ជេដ្ឋា ជារដ្ឋលេខាធិការក្រសួងធនធានទឹក និងឧតុនិយម ហើយលោកនឹងចូលកាន់តំណែងជារដ្ឋមន្ត្រីនៅក្រសួងនេះ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន
លោក ខៀវ កាញារីទ្ធ កន្លងមកធ្លាប់បានស្នើសុំលោក ហ៊ុន សែន ឱ្យដាក់លោកចូលនិវត្តន៍ ហើយឥឡូវនេះ នឹងអាចប្រគល់តំណែងទៅឱ្យរដ្ឋមន្ត្រីថ្មី។ ក្រសួងព័ត៌មានបានចូលរួមយ៉ាងសកម្មក្នុងការបិទសារព័ត៌មានសេរីជាប្រព័ន្ធតាំងពីឆ្នាំ២០១៧ មក។
លោក នេត្រ ភក្ត្រា រដ្ឋមន្ត្រីក្រសួងព័ត៌មាន
លោក នេត្រ ភក្ត្រា ជាអ្នកនាំពាក្យក្រសួងបរិស្ថាន ទីដែលលោកតែងតែបដិសេធការចោទប្រកាន់អំពីការកាប់បំផ្លាញព្រៃឈើក្នុងប្រទេសកម្ពុជា។ លោកនឹងចូលកាន់តំណែងជារដ្ឋមន្ត្រីក្រសួងព័ត៌មាន ដោយលោកក៏ធ្លាប់ធ្វើការក្នុងក្រុមទំនាក់ទំនងព័ត៌មានសម្រាប់សាលាក្តីខ្មែរក្រហមផងដែរ។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ
លោកស្រី ភឿង សកុណា រក្សាតំណែងជារដ្ឋមន្ត្រីក្រសួងវប្បធម៌ និងវិចិត្រសិល្បៈដដែល។ លោកស្រីឈានមុខគេក្នុងការទាមទារឱ្យបញ្ជូនវត្ថុបុរាណសម័យអង្គរដែលត្រូវបានលួចជាច្រើនឆ្នាំ យកត្រឡប់មកប្រទេសកម្ពុជាវិញ ប៉ុន្តែលោកស្រីក៏បានធ្វើការងារជុំវិញការបណ្តេញប្រជាពលរដ្ឋចេញពីលំនៅដ្ឋាននៅតំបន់ជុំវិញប្រាសាទអង្គរវត្ត ហើយបានឱ្យពួកគេផ្លាស់ទៅកន្លែងតាំងទីលំនៅថ្មីដែលគ្មានហេដ្ឋារចនាសម្ព័ន្ធត្រឹមត្រូវ។
លោក ថោង ខុន រដ្ឋមន្ត្រីក្រសួងទេសចរណ៍
លោក ថោង ខុន បានបម្រើការជារដ្ឋលេខាធិការក្រសួងទេសចរណ៍តាំងពីឆ្នាំ១៩៩៣ មុនពេលទទួលយកតំណែងកំពូលនៃក្រសួងនេះនៅឆ្នាំ២០០៨។ លោកបានព្យាយាមជួយស្តារវិស័យទេសចរណ៍កម្ពុជាឱ្យផុតពីគ្រោះមហន្តរាយវិស័យទេសចរណ៍ អំឡុងពេលមានការរាតត្បាតជំងឺកូវីដ-១៩ ហើយបានជំរុញឱ្យមានភ្ញៀវទេសចរចិនត្រឡប់មកប្រទេសកម្ពុជាវិញ។
លោក សុខ សូកេន រដ្ឋមន្ត្រីក្រសួងទេសចរណ៍
លោក សុខ សូកេន ទើបនឹងក្លាយជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិនាពេលថ្មីៗនេះ ហើយលោកក៏ធ្លាប់បម្រើការងារនៅក្រសួងពាណិជ្ជកម្ម និងក្រុមប្រឹក្សាអភិវឌ្ឍន៍កម្ពុជា។ លោកគឺជាកូនប្រុសរបស់លោក សុខ អាន ដែលជាអតីតរដ្ឋមន្ត្រីទីស្តីការគណៈរដ្ឋមន្ត្រី និងបានរៀបការជាមួយកូនស្រីរបស់លោក ចម ប្រសិទ្ធ។
លោក ឈិត សុខុន រដ្ឋមន្ត្រីក្រសួងធម្មការ និងសាសនា
លោក ឈិត សុខុន ធ្លាប់ជារដ្ឋលេខាធិការទីស្តីការគណៈរដ្ឋមន្ត្រី មុនពេលលោកត្រូវបានតែងតាំងជារដ្ឋមន្ត្រីក្រសួងធម្មការ និងសាសនានៅឆ្នាំ២០២០។
លោក ឆាយ បូរិន រដ្ឋមន្ត្រីក្រសួងធម្មការ និងសាសនា
លោក ឆាយ បូរិន ជាតំណាងរាស្រ្តមកពីខេត្តត្បូងឃ្មុំ ហើយលោកបានជួបជាមួយអ្នកគាំទ្រគណបក្សកាលពីពេលថ្មីៗនេះ ដោយនិយាយថា លោកនាំមតិផ្តាំផ្ញើពីលោក ហ៊ុន ម៉ាណែត ដែលនាំឱ្យមានការលើកឡើងពីទំនាក់ទំនងជិតស្និទ្ធរបស់លោកជាមួយនាយករដ្ឋមន្ត្រីថ្មីរូបនេះ។
លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី
លោកស្រី អ៊ឹង កន្ថាផាវី នឹងបន្តធ្វើជារដ្ឋមន្ត្រីក្រសួងកិច្ចការនារី បន្ទាប់ពីលោកស្រីស្ថិតក្នុងតំណែងរដ្ឋមន្ត្រីនេះ ជិតពីរទសវត្សរ៍។ លោកស្រីគឺជារដ្ឋមន្ត្រីមួយរូបក្នុងចំណោមរដ្ឋមន្ត្រីប៉ុន្មានរូបចុងក្រោយមកពីគណបក្សហ៊្វុនស៊ិនប៉ិច ដែលបានចូលរួមជាមួយគណបក្សប្រជាជនកម្ពុជា កាលពីដើមទសវត្សរ៍ឆ្នាំ២០០០។ អំពើហិង្សាលើស្ត្រី និងកុមារ នៅតែជាបញ្ហាដែលកំពុងបន្តកើតមាន ដោយមានជនរងគ្រោះជាច្រើនទទួលបានជំនួយតិចតួចពីនគរបាល និងប្រព័ន្ធតុលាការនៅកម្ពុជា។
លោក ព្រុំ សុខា រដ្ឋមន្ត្រីក្រសួងមុខងារសាធារណៈ
លោក ព្រុំ សុខា បានចូលកាន់តំណែងនេះនៅឆ្នាំ២០២០ បន្ទាប់ពីធ្វើជារដ្ឋលេខាធិការក្រសួងមហាផ្ទៃអស់រយៈពេលយ៉ាងយូរ។
លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ
លោក ហ៊ុន ម៉ានី គឺជាតំណាងរាស្រ្តមកពីមណ្ឌលខេត្តកំពង់ស្ពឺ និងគ្រប់គ្រងសហភាពសហព័ន្ធយុវជនកម្ពុជា (UYFC) ដ៏មានប្រជាប្រិយ ដែលដំណើរការជាក្រុមយុវជនក្រៅផ្លូវការរបស់គណបក្សប្រជាជនកម្ពុជា។ លោកគឺជាកូនប្រុសរបស់លោក ហ៊ុន សែន និងជាប្អូនប្រុសរបស់លោក ហ៊ុន ម៉ាណែត។ លោករៀបការជាមួយកូនស្រីរបស់លោក យឹម ឆៃលី ហើយក៏ត្រូវជាសាច់ញាតិជាមួយលោក សុខ សូកេន លោក ឈាង រ៉ា និងលោក ហួត ហាក់ ផងដែរ។
លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល
លោក ម៉ៅ ហាវណ្ណាល់ នឹងបន្តដឹកនាំរដ្ឋលេខាធិការដ្ឋានអាកាសចរស៊ីវិល (SSCA)។ លោកត្រូវបានបណ្តុះបណ្តាលជាអ្នកបើកយន្តហោះ MiG-21 ក្នុងទសវត្សរ៍ឆ្នាំ១៩៨០។ លោកបើកយន្តហោះ VIP ដោយដឹកភ្ញៀវសំខាន់ៗ និងធ្លាប់បើកជូនសម្តេចក្រុមព្រះ នរោត្តម រណឫទ្ធិ ផងដែរ។ លោកបានបម្រើការនៅ SSCA អស់រយៈពេលជាច្រើនទសវត្សរ៍មកហើយ។
លោក វ៉ា គឹមហុង ទេសរដ្ឋមន្ត្រីនិងជាប្រធាន គណៈកម្មាធិការកិច្ចការព្រំដែនកម្ពុជា
លោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន
ទេសរដ្ឋមន្ត្រីទទួលបន្ទុកបេសកកម្មពិសេស
លោក វ៉ា គឹមហុង ទេសរដ្ឋមន្ត្រី
លោក គន់ គីម ទេសរដ្ឋមន្ត្រី
លោក ហូ សិទ្ធី ទេសរដ្ឋមន្ត្រី
លោក ប៉ុល សារឿន ទេសរដ្ឋមន្ត្រី
លោក ឱម យ៉ិនទៀង ទេសរដ្ឋមន្ត្រី
លោក អៀង មូលី ទេសរដមន្ត្រី
លោក មាស សុភា ទេសរដ្ឋមន្ត្រី
លោក ញឹម វណ្ណដា ទេសរដ្ឋមន្ត្រី
លោក ឃុន ហាំង ទេសរដ្ឋមន្ត្រី
លោក អូស្មាន់ ហាសាន់ ទេសរដ្ឋមន្ត្រី
លោក លី ធុជ ទេសរដ្ឋមន្ត្រី
លោក យឹម ណុលឡា ទេសរដ្ឋមន្ត្រី
លោក ជិន ប៊ុនស៊ាន ទេសរដ្ឋមន្ត្រី
ទេសរដ្ឋមន្ត្រីទទួលបន្ទុកបេសកកម្មពិសេស
លោក គន់ គីម ទេសរដ្ឋមន្ត្រី
លោកទទួលបន្ទុកកិច្ចការអតីតយុទ្ធជន និងជនពិការ ជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងទទួលបន្ទុកអនុវត្តការងារផ្សេងទៀត តាមការប្រគល់របស់នាយករដ្ឋមន្ត្រី។
លោក ហូ សិទ្ធី ទេសរដ្ឋមន្ត្រី
លោកទទួលបន្ទុកជានាយកខុទ្ធកាល័យនាយករដ្ឋមន្ត្រី និងទទួលបន្ទុកអនុវត្តការងារផ្សេងទៀត តាមការប្រគល់របស់នាយករដ្ឋមន្ត្រី។
លោក អ៊ុក រ៉ាប៊ុន ទេសរដ្ឋមន្ត្រី
លោកទទួលបន្ទុកជាប្រធានក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទ ជាប្រធានគណៈកម្មាធិការជាតិជំរុញចលនាភូមិមួយផលិតផលមួយ និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ឱម យ៉ិនទៀង ទេសរដ្ឋមន្ត្រី
លោកទទួលបន្ទុកជាប្រធានអង្គភាពប្រឆាំងអំពើពុករលួយ ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក អៀង មូលី ទេសរដ្ឋមន្ត្រី
លោកទទួលបន្ទុកដឹកនាំអាជ្ញាធរជាតិប្រយុទ្ធប្រឆាំងនឹងជំងឺអេដស៍ និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ថោង ខុន ទេសរដ្ឋមន្ត្រី
លោកទទួលបន្ទុកជំរុញការអភិវឌ្ឍចលនាកីឡានិងដឹកនាំគណៈកម្មាធិការជាតិអូឡាំពិកកម្ពុជា ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ពេជ្រ សោភ័ន ទេសរដ្ឋមន្ត្រី
លោកទទួលបន្ទុកលើការពង្រឹងការអប់រំ និងការបណ្តុះបណ្តាលលវិជ្ជាជីវៈ និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ព្រុំ សុខា ទេសរដ្ឋមន្ត្រី
លោកទទួលបន្ទុកជាប្រធានអាជ្ញាធរជាតិប្រយុទ្ធប្រឆាំងនិងគ្រឿងញៀន និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក សក់ សេដ្ឋា ទេសរដ្ឋមន្ត្រី
លោកទទួលបន្ទុកជាអនុប្រធានអចិន្ត្រៃយ៍នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក អូស្មាន់ ហាសាន់ ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការងារចលនាមូស្លីម និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក លី ធុជ ទេសរដ្ឋមន្ត្រី
លោកទទួលបន្ទុកជាប្រធានគណៈកម្មាធិការជាតិអេស្កាប់ ជាអនុប្រធានទី១ នៃអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ឆែម គាតរិទ្ធី ទេសរដ្ឋមន្ត្រី
លោកទទួលបន្ទុកជាប្រធានក្រុមសង្កេតការណ៍សេដ្ឋកិច្ច សង្គមកិច្ច និងវប្បធម៌ ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក អុី ឈាន ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការងារទាក់ទងនឹងគណៈកម្មាធិការចម្រុះកិច្ចការព្រំដែន និងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក អ៊ុក ប្រាថ្នា ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើកិច្ចការសង្គមនិងវប្បធម៌ ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក អ៊ុច បូររិទ្ធ ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការសម្របសម្រួលកិច្ចការទំនាក់ទំនងបរទេស ក្នុងផ្នែកគណបក្សនយោបាយ និងអង្គការមហាជន ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ស្វាយ ស៊ីថា ទេសរដ្ឋមន្ត្រី
លោកជួយនាយករដ្ឋមន្ត្រីលើកិច្ចការព័ត៌មាន និងសាធារណមតិព្រមទាំង ទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ឆៃ ស៊ីណារិទ្ធ ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការងារសេវាប្រមូល និងវិភាគព័ត៌មានផ្នែកសន្តិសុខ ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក ឈៀង យ៉ាណារ៉ា ទេសរដ្ឋមន្ត្រី
លោកទទួលបន្ទុកជាអនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា ទទួលបន្ទុកលើការងារកិច្ចសហប្រតិបត្តិការអភិវឌ្ឍន៍ ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក សុក ស៊ីផាន់ណា ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការងារទំនាក់ទំនងជាមួយអង្គការអន្តរជាតិ ក្នុងវិស័យសេដ្ឋកិច្ច និងពាណិជ្ជកម្ម ជាអាទិ៍ ASEM BRICS និងអង្គការសហប្រតិបត្តិការសៀងហៃ ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក កែវ រ៉េមី ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការសម្របសម្រួលដឹកនាំកិច្ចការសិទ្ធិមនុស្សរបស់កម្ពុជា និងទទួលបន្ទុកជាប្រធានគណៈកម្មាធិការសិទ្ធិមនុស្សកម្ពុជា ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។
លោក គី តិច ទេសរដ្ឋមន្ត្រី
លោកទទួលបន្ទុកជួយនាយករដ្ឋមន្ត្រីលើការដឹកនាំ និងគ្រប់គ្រងក្រុមមេធាវីរាជរដ្ឋាភិបាល ព្រមទាំងទទួលបន្ទុកអនុវត្តការងារផ្សេងទៀតតាមការប្រគល់របស់នាយករដ្ឋមន្ត្រី។