រដ្ឋាភិបាលកាត់ឆ្វៀលដីរដ្ឋទំហំជិត ៩០០ហិកតា នៅទីតាំងចំនួន៣ផ្សេងគ្នា និង ធ្វើអនុបយោគពីដីសាធារណៈរបស់រដ្ឋមកជាដីឯកជនរបស់រដ្ឋ ដើម្បីផ្តល់ឱ្យប្រជាពលរដ្ឋក្រីក្រ ប្រជាពលរដ្ឋដែលកាន់កាប់ជាក់ស្តែង និងបុគ្គលឯកជន។
យោងតាមអនុក្រឹត្យចំនួន៣ ដាច់ដោយឡែកពីគ្នា នៅត្រង់ទំព័រ ១៥០៦ ១៥០៧ និង ១៥២៦ នៅក្នុងសៀវភៅរាជកិច្ចលេខ១១ ដែលចេញផ្សាយដោយរដ្ឋាភិបាល កាលពីថ្ងៃទី៨ ខែកុម្ភៈ ឆ្នាំ២០២៤ បានឱ្យដឹងថា រដ្ឋាភិបាលបានសម្រេចកាត់ ឆ្វៀលផ្ទៃដីសរុបជាង ៨៨១ហិកតា នៅទីតាំងចំនួន៣ដាច់ដោយឡែកពីគ្នា ដែលក្នុងនោះមានផ្ទៃដីទំហំ ៨៤៥ហិកតា និង១១អា ស្ថិតនៅក្នុងឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ ត្រូវបានកាត់ចេញពីស្ថានីយផ្សព្វផ្សាយ និងស្តារព្រៃឈើក្បាលដំរី។
ផ្ទៃដីទំហំ ៨៤៥ហិកតានេះ ត្រូវបានធ្វើអនុបយោគពីដីសាធារណៈរបស់រដ្ឋមកជា ដីឯកជនរបស់រដ្ឋសម្រាប់អនុវត្តវិធីសម្បទានដីសង្គមកិច្ច ជូនប្រជាពលរដ្ឋក្រីក្រគ្មានដីពិតប្រាកដ ក្រោមគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋ កិច្ចដំណាក់កាលទី៣ (LASED III)។
ខណៈផ្ទៃដីទំហំ ៣១ហិកតា ០២អា ៥៣សង់ទីអា ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ត្រូវបានកាត់ចេញពីដែនគម្របព្រៃឈើឆ្នាំ២០០២ ហើយផ្ទៃដីនេះ នឹងត្រូវធ្វើអនុបយោគជាដីឯកជនរបស់រដ្ឋ និងប្រគល់ជាកម្មសិទ្ធិជូនឈ្មោះ ឡូ សុគន្ធ។
ចំណែកផ្ទៃដីទំហំ៥ហិកតា ៣០អា និង២៨សង់ទីអាទៀត ស្ថិតនៅក្នុងភូមិជ្រៃសែន សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី ត្រូវបានកាត់ ចេញពីគម្របព្រៃឈើឆ្នាំ២០០២ និងធ្វើអនុបយោគជាដីឯកជនរបស់រដ្ឋ។ ផ្ទៃដី ជាង៥ហិកតានេះ ត្រូវផ្តល់ជាកម្មសិទ្ធិជូនឈ្មោះ គៅ ហុង ដែលកាន់កាប់ជាក់ ស្តែង៕
