យោងតាមឯកសារនៅក្នុងសៀវភៅរាជកិច្ច ដែលចុះកាលបរិច្ឆេទកាលពីឆ្នាំមុនបានឲ្យដឹងថា ដីរបស់រដ្ឋប្រហែល៩៥១.២១៣ហិកតា ត្រូវបានធ្វើអនុប្រយោគក្នុងរយៈពេលប្រាំមួយខែ ដោយភាគច្រើនត្រូវបានគេចាត់ចូលក្នុង “តំបន់សហគមន៍” ដែលគ្មានការពន្យល់លម្អិត ហើយដីដែលនៅសេសសល់ គឺភាគច្រើនត្រូវបានបែងចែកទៅឲ្យម្ចាស់អាជីវកម្ម និងបុគ្គលដែលមានទំនាក់ទំនងនយោបាយ ព្រមទាំងស្ថាប័នរដ្ឋផងដែរ ។
សៀវភៅរាជកិច្ចលេខ៤៩ ដល់៩៦ ដែលត្រូវបានចេញផ្សាយនៅឆមាសទីពីរនៃឆ្នាំ២០២២ បានបង្ហាញថា ទីតាំង៤៣កន្លែងបានប្រែក្លាយពីដីសាធារណៈរបស់រដ្ឋទៅជាដីឯកជនរបស់រដ្ឋក្នុងខេត្តចំនួន១៤ តាមរយៈអនុក្រឹត្យចុះហត្ថលេខាដោយអតីតនាយករដ្ឋមន្ត្រី ហ៊ុន សែន។
ការធ្វើអនុបយោគផ្ទៃដីដ៏ធំបំផុតនោះ គឺ៩៣៣.៥៧៧ហិកតា ដែលត្រូវបានលៃលកសម្រាប់តំបន់សហគមន៍ ទោះបីជាយ៉ាងណាអនុក្រឹត្យបានផ្តល់ព័ត៌មានលម្អិតតិចតួចអំពីតំបន់ទាំងនោះ។
ការធ្វើឯកជនភាវូបនីយកម្មដីធំៗមួយចំនួនពីមុនមកសម្រាប់សហគមន៍ដូចជា ដីទំហំ១២៧.០០០ហិកតានៅខេត្តកោះកុងក្នុងឆ្នាំ២០២១ ត្រូវបានបម្រុងទុកសម្រាប់គ្រួសារពលរដ្ឋក្នុងមូលដ្ឋាន ប៉ុន្តែពលរដ្ឋមានការសង្ស័យបន្ទាប់ពីមានជម្លោះជាច្រើនឆ្នាំជាមួយក្រុមហ៊ុនអភិវឌ្ឍន៍ និងចម្ការធំៗរបស់ក្រុមហ៊ុន។
ការបែងចែកដីនេះទំនងជាធ្វើតាមការអំពាវនាវរបស់អតីតនាយករដ្ឋមន្ត្រី ហ៊ុន សែន ឲ្យផ្តល់ដីជូនគ្រួសារពលរដ្ឋនៅក្នុងតំបន់ការពារកាលពីឆ្នាំ២០១៩ ចំពេលមានការទាមទារយូរមកហើយនូវប័ណ្ណកម្មសិទ្ធិដីធ្លី។
ទន្ទឹមនឹងនេះដែរ ម្ចាស់អាជីវកម្ម និងក្រុមហ៊ុនអភិវឌ្ឍន៍មួយចំនួនទទួលបានប្រហែល១២.៤៦០ហិកតានៅក្នុងទីតាំងចំនួន៧កន្លែង ដែលជាការធ្វើឯកជនភាវូបនីយកម្មដីធ្លីធំបំផុតក្រោយមកទៀត នៅពេលនោះ។
ភាគច្រើននៃដីទាំងនោះបានទៅលើក្រុមហ៊ុនសណ្ឋាគារសុខារបស់ឧកញ៉ា សុខ គង់ ដោយផ្ទៃដី ១១.១៧៧ហិកតានៅលើភ្នំបូកគោក្នុងខេត្តកំពតត្រូវបានផ្ទេរទៅឱ្យលោក។ លោក សុខ គង់ បាននិងកំពុងអភិវឌ្ឍភ្នំបូកគោរយៈពេលច្រើនទសវត្សរ៍មកហើយ ហើយកន្លងមក ទំនងជាបានទទួលដីរាប់ម៉ឺនហិកតា តាមរយៈកិច្ចសន្យាជួល និងការផ្តល់ដីសម្បទាន។
ដីច្រើនកន្លែងផ្សេងទៀត ដែលត្រូវបានផ្តល់ឱ្យម្ចាស់អាជីវកម្ម គឺស្ថិតនៅក្នុងដែនជម្រកសត្វព្រៃកែវសីមា ឧទ្យានជាតិគីរីរម្យ ដែនជម្រកសត្វព្រៃភ្នំឱរ៉ាល់ ច្រករបៀងអភិរក្សជីវចម្រុះខេត្តមណ្ឌលគិរី និងនៅខេត្តកែប។ ខេត្តកែបមានការប្រែប្រួលច្រើនរួមទាំងការកំណត់ឡើងវិញតំបន់មាត់សមុទ្រ និងការបែងចែកដីជុំវិញឧទ្យានជាតិ។ ដីប្រាំកន្លែងនៅក្នុងខេត្តកែប ត្រូវបានធ្វើឯកជនភាវូបនីយកម្ម ប៉ុន្តែមានព័ត៌មានលម្អិតតិចតួចណាស់អំពីគម្រោងទាំងនោះ។
ក្រុមហ៊ុនដែលទទួលបានដីមានទំនាក់ទំនងជិតស្និទ្ធជាមួយមន្ត្រីរដ្ឋាភិបាល។ ក្រុមហ៊ុនមួយក្រុមគឺ ក្រុមហ៊ុន One Fraternity, One More and One Prosperity ក៏ដូចជា Den-Dey Eco-Tour ទទួលបានដីទំហំ៩៨៤ហិកតានៅដែនជម្រកសត្វព្រៃកែវសីមា គីរីរម្យ ភ្នំឱរ៉ាល់ ខេត្តកែប និងច្រករបៀងអភិរក្សជីវចម្រុះខេត្តមណ្ឌលគិរី។
ក្រុមហ៊ុនទាំងនេះត្រូវបានដឹកនាំដោយលោកស្រី អ៊ឹម ប៉ូលីកា ដែលជាភរិយាលោកឧបនាយករដ្ឋមន្ត្រី អូន ព័ន្ធមុនីរ័ត្ន និងសមាជិកគ្រួសារ៦នាក់របស់លោក ឡៅ ម៉េងឃីន សមាជិកព្រឹទ្ធសភា និងភរិយារបស់លោក គឺលោកស្រី ជឹង សុភាព ដែលជាឧកញ៉ាល្បីឈ្មោះមួយរូបផងដែរនោះ។
សមាជិកគ្រួសារដែលកាន់កាប់ក្រុមហ៊ុនទាំងបួននោះ រួមមាន ឡៅ ជៀចេន, ឡៅ ជៀហាវ, ឡៅ សុខហ៊ុយ, ជឹង ធានគាត, ជឹង ធានសេង និង ជឹង សុគន្ធាវី។ ឡៅ ជៀចេន រៀបការជាមួយកូនប្រុសរបស់លោក អូន ព័ន្ធមុនីរ័ត្ន។
ដីបីកន្លែងក្នុងចំណោមប្រាំកន្លែងដែលផ្ទេរទៅឱ្យក្រុមហ៊ុនទាំងនេះ គឺដីមួយកន្លែងស្ថិតនៅគីរីរម្យ មួយកន្លែងទៀតស្ថិតនៅកែវសីមា និងទីតាំងទីបីស្ថិតនៅច្រករបៀងអភិរក្សជីវចម្រុះខេត្តមណ្ឌលគិរី ហើយគេមិនឃើញមានបញ្ចូលកូអដោណេនៅក្នុងអនុក្រឹត្យនោះទេ។
ផ្ទៃដីប្រមាណ២៦៦ហិកតាក្នុងខេត្តស្វាយរៀងក៏ត្រូវបានធ្វើឯកជនភាវូបនីយកម្មសម្រាប់ធ្វើជាតំបន់សេដ្ឋកិច្ចពិសេសស្វាយរៀងហ្គីហ្គារីសស៍ (Giga Resource SEZ) ផងដែរ។
ភាពខុសគ្នានៃទំហំដីដែលបុគ្គលនិងគ្រួសារពលរដ្ឋទទួលបាន
បុគ្គលមួយចំនួនដូចជាលោកស្រី ម៉ុក ប៉ូប៉ុនរិទ្ធ ម្តាយក្មេករបស់លោកនាយករដ្ឋមន្ត្រី ហ៊ុន ម៉ាណែត លោកស្រី ថេង អាយអាន្នី ម្តាយរបស់លោក សុខ សូកេន រដ្ឋមន្ត្រីក្រសួងទេសចរណ៍ និងអ្នកផ្សេងទៀត បានទទួលដីចំនួន១៦កន្លែងនៅទូទាំងប្រទេស ក្នុងនោះមាន៩កន្លែងស្ថិតនៅតំបន់បឹងតាមោកដ៏ចម្រូងចម្រាសក្នុងរាជធានីភ្នំពេញ។
ដីទាំងនេះមានទំហំធំល្មម ជាមធ្យមគឺជាង១០ហិចតាក្នុងម្នាក់ៗ ហើយវាផ្ទុយពីដី ដែលបានផ្តល់ជូនគ្រួសារនីមួយៗក្នុងចំណោមពលរដ្ឋ៣៥គ្រួសារជាដីសម្បទានក្នុងខេត្តស្វាយរៀងដោយទទួលទំហំតិចជាង០.០១ ហិចតា។
ដីប្រាំបួនទីតាំងនៅតំបន់បឹងតាមោកមានទំហំសរុប ១១១,២៥ហិកតានៅចន្លោះពីខែសីហាដល់ខែវិច្ឆិកាឆ្នាំ២០២២ ត្រូវបានកាត់ឆ្វៀល ហើយក្លាយជាផ្នែកនៃការចាក់លុបបឹងមួយក្នុងចំណោមបឹងចុងក្រោយរបស់រាជធានីភ្នំពេញសម្រាប់ការអភិវឌ្ឍន៍ ដោយពាណិជ្ជករដែលមានទំនាក់ទំនងនយោបាយ។ អ្នកស្រុកបាននិងកំពុងតវ៉ាការបណ្តេញចេញពីតំបន់មាត់បឹងដែលកំពុងរួមតូចនេះ។
ក្នុងចំណោមការធ្វើឯកជនភាវូបនីយកម្មដីនោះ មានដីពីរកន្លែងស្ថិតនៅក្នុងខេត្តសៀមរាប ដែលត្រូវបានផ្តល់ឲ្យអាជ្ញាធរអប្សរាធ្វើជាកន្លែងតាំងទីលំនៅថ្មីសម្រាប់អ្នកដែលត្រូវបានបណ្ដេញចេញពីតំបន់ឧទ្យានអង្គរ។ ទីតាំងពីរកន្លែងនោះ គឺតំបន់ពាក់ស្នែង និងតំបន់រុនតាឯក ដែលស្ថិតនៅចម្ងាយប្រមាណ២០គីឡូម៉ែត្រពីតំបន់បេតិកភណ្ឌរបស់អង្គការយូណេស្កូ ហើយមានផ្ទៃដីសរុប ១.៤៩២ហិកតា។
ចុងក្រោយ ដីទំហំ៥៩០ហិកតានៅខេត្តរតនគិរី ត្រូវបានប្រគល់ឱ្យសហគមន៍ជនជាតិដើមភាគតិចចារ៉ាយ នេះបើយោងតាមឯកសារចុះថ្ងៃទី២៦ ខែតុលា ឆ្នាំ២០២២ ដោយត្រូវបានកាត់ឆ្វៀលពីគម្របព្រៃឈើ និងពីអតីតដីសម្បទានសេដ្ឋកិច្ចមួយកន្លែងដែលផ្តល់ទៅឱ្យក្រុមហ៊ុន ៧មករាផារី៕