តុលាការខេត្តកោះកុងបានកាត់ទោសសកម្មជនដីធ្លីចំនួន១០នាក់ឱ្យជាប់ពន្ធនា គាររយៈពេលមួយឆ្នាំ និងបង្គាប់ឱ្យពួកគេសងជំងឺចិត្តឧកញ៉ា ហេង ហ៊ុយ ចំនួន១០.០០០ដុល្លារ ពីបទបរិហារបង្កាច់កេរ្តិ៍ និងបទញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម។
យោងតាមអង្គការសិទ្ធិមនុស្សលីកាដូបានឲ្យដឹងថា សកម្មជនម្នាក់ក្នុងចំណោមសកម្មជនទាំងនោះ ទទួលបានការព្យួរទោស ខណៈបីនាក់ទៀតកំពុងជាប់ពន្ធនាគាររួចហើយ។អង្គការលីកាដូបានឲ្យដឹងថា ការកាត់ទោសកាលពីរសៀលថ្ងៃអង្គារ (១៥ សីហា) ធ្វើឡើងចំពេលមានដីកាចាប់ខ្លួននិងផ្តន្ទាទោសជាបន្តបន្ទាប់របស់តុលាការលើសកម្មជនដីធ្លីខេត្តកោះកុងក្នុងប៉ុន្មានសប្តាហ៍ថ្មីៗនេះ។អង្គការនេះបានប្រាប់ឈ្មោះសកម្មជនទាំង១០នាក់ដែលត្រូវបានផ្តន្ទាទោសកាលពីថ្ងៃព្រហស្បតិ៍ថា មានឈ្មោះលោក ឆាន់ ឈឿន អ្នកស្រី ដេត ហួរ អ្នកស្រី អើប វី អ្នកស្រី អឹប តឹង លោក ហេង ជៃ អ្នកស្រី អ៊ិន ធូ អ្នកស្រី កើត នៅ លោក គង់ ម៉ែន លោក ពួ ហួន និងលោក សុខ ជៃ។អង្គការលីកាដូ បានបន្ថែមថា ពួកគាត់ត្រូវបានផ្តន្ទាទោសឲ្យជាប់ពន្ធនាគាររយៈពេលមួយឆ្នាំក្នុងម្នាក់ៗ ហើយតុលាការបានបង្គាប់ឱ្យពួកគាត់រួមគ្នាសងជំងឺចិត្តឧកញ៉ា ហេង ហ៊ុយ ចំនួន៤០លានរៀល ពីបទបរិហារបង្កាច់កេរ្តិ៍ និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម។អ្នកស្រី ដេត ហួរ លោក ហេង ជៃ និងលោក សុខ ជៃ ត្រូវបានចាប់ខ្លួនកាលពីថ្ងៃទី២៩ ខែមិថុនា ពេលធ្វើដំណើរមកភ្នំពេញ ដើម្បីដាក់ញត្តិ។ អ្នកស្រី អើប វី ទទួលបានការព្យួរទោសទាំងស្រុង។ មិនមានដីកាចាប់ខ្លួនសម្រាប់សកម្មជន៦នាក់ផ្សេងទៀត ដែលគេរំពឹងថា នឹងបន្តនៅក្រៅពន្ធនាគារ ខណៈរង់ចាំប្តឹងឧទ្ធរណ៍នឹងសេចក្តីសម្រេចនេះ។អង្គការលីកាដូបានលើកឡើងថា សមាជិកសហគមន៍ប្រហែល៦០នាក់បានប្រមូលផ្តុំគ្នានៅមុខតុលាការ ដើម្បីគាំទ្រសកម្មជនទាំងនោះ អំឡុងពេលតុលាការកាត់ទោសពួកគាត់កាលពីថ្ងៃព្រហស្បតិ៍។សំណុំរឿងនេះពាក់ព័ន្ធនឹងជម្លោះដីធ្លីដ៏រ៉ាំរ៉ៃជាមួយក្រុមហ៊ុនស្ករអំពៅ ហេង ហ៊ុយ ដែលបានរំលោភយកដីប្រជាពលរដ្ឋជិត២០០គ្រួសារ តាំងពីឆ្នាំ២០០៧ នៅឃុំជីខក្រោម និងឃុំជីខលើ ក្នុងស្រុកស្រែអំបិល៕