នៅព្រឹកនេះ ព្រះករុណាព្រះបាទសម្តេចព្រះបរមនាថ នរោត្តម សីហមុនី ទ្រង់សព្វព្រះរាជហឫទ័យស្តេចយាងជាព្រះរាជាអធិបតីភាពដ៏ខ្ពង់ខ្ពស់ក្នុងពិធីបើកសម័យប្រជុំលើកដំបូងរបស់រដ្ឋសភានីតិកាលទី៧ ដោយបានថ្លែងព្រះរាជសុន្ទរកថាទៅកាន់សមាជិករដ្ឋសភាចំនួន១២៥ រូប ដែលនិងត្រូវស្បថចូលកាន់តំណែងនៅរសៀលថ្ងៃចន្ទនេះ។
ព្រះមហាក្សត្រទ្រង់មានព្រះរាជបន្ទុលថា ព្រះអង្គសង្ឃឹមថា រដ្ឋាភិបាលថ្មីនឹងធ្វើតាមការសន្យារបស់ខ្លួនជាមួយនឹងប្រជារាស្ត្រ។ លោក ហ៊ុន ម៉ាណែត ជានាយករដ្ឋមន្ត្រីចាត់តាំងនៅពេលនោះ អង្គុយនៅកៅអីជួរខាងមុខក្បែរឪពុករបស់លោកនិងមន្ត្រីជាន់ខ្ពស់គណបក្សប្រជាជនកម្ពុជាផ្សេងទៀតដូចជាលោក ហេង សំរិន លោក ស ខេង និងលោកស្រី ម៉ែន សំអន។
បន្ទាប់មកទៀត មានកម្មវិធីថតរូបជុំគ្នានៅខាងក្រៅរដ្ឋសភា ដោយតំណាងរាស្ត្រម្នាក់ស្ថិតក្នុងសម្លៀកបំពាក់ចងក្បិនបែបប្រពៃណីយ៉ាងស្រស់ស្អាត។ នៅក្នុងឱកាសនោះដែរ ក៏មានការចូលរួមពីភ្ញៀវកិត្តិយស អ្នកមុខអ្នកការ រួមទាំងឯកអគ្គរដ្ឋទូតសហរដ្ឋអាមេរិក ចក្រភពអង់គ្លេស និងចិនក៏មានវត្តមាននៅក្នុងព្រឹត្តិការណ៍នេះដែរ។
រដ្ឋសភាក៏បានបង្ហាញបញ្ជីឈ្មោះរបស់សមាជិកសភាជាប់ឆ្នោតថ្មី ដែលនឹងត្រូវចូលអង្គុយក្នុងសភាជាន់ទាបនៅពេលស្បថចូលកាន់តំណែងរួច។ សូមចូលទៅកាន់បញ្ជីឈ្មោះបេក្ខជនជាប់ឆ្នោតជាតំណាងរាស្ត្រ នីតិកាលទី៧ របស់មូលដ្ឋានទិន្នន័យកំណាត់ត្រា ដើម្បីដឹងថា នរណាខ្លះជាតំណាងរាស្រ្តថ្មីរបស់លោកអ្នកនិងអានជីវប្រវត្តិសង្ខេបខ្លីៗ។
រដ្ឋាភិបាលថ្មីរបស់គណបក្សប្រជាជននឹងបង្ហាញនូវសំឡេងភាគច្រើនរបស់ខ្លួនក្នុងការបោះឆ្នោតនៅថ្ងៃអង្គារ រួមជាមួយនឹងការបោះឆ្នោតផ្តល់សេចក្តីទុកចិត្តគណៈរដ្ឋមន្ត្រីថ្មី ដែលនឹងបង្ហាញពីការផ្លាស់ប្តូរជំនាន់ ខណៈអ្នកបន្តវេនវ័យក្មេងនៅក្នុងគណបក្សប្រជាជនកម្ពុជានឹងចូលដឹកនាំបន្តពីថ្នាក់ដឹកនាំចាស់ៗ៕