លោកនាយករដ្ឋមន្ត្រី ហ៊ុន ម៉ាណែត សម្រេចដកហូតមុខតំណែងនាយនគរបាលថ្នាក់ឧត្តមសេនីយ៍ត្រីមួយរូប ពីអគ្គនាយករង នៃអគ្គនាយកដ្ឋានសវនកម្មផ្ទៃក្នុង ក្របខ័ណ្ឌមន្ត្រីនគរបាលជាតិ ឱ្យមកជាមន្ត្រី បន្ទាប់ពីរងការចោទប្រកាន់ថា បានទារប្រាក់មួយលានរៀលពីឃុំចំនួន១០នៅស្រុកសាមគ្គីមុនីជ័យ នៃខេត្តកំពង់ស្ពឺ។
យោងតាមអនុក្រឹត្យចុះថ្ងៃទី៦ ខែមិថុនា ឆ្នាំ២០២៤ បានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត សម្រេចដកហូតមុខតំណែងលោកឧត្តមសេនីយ៍ត្រី កែវ សារ៉ាវុធ ពីអគ្គនាយករង នៃអគ្គនាយកដ្ឋានសវនកម្មផ្ទៃក្នុង ក្របខ័ណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃឱ្យមកជាមន្ត្រី។
កាលពីថ្ងៃទី២១ ខែឧសភា ឆ្នាំ២០២៤ ក្រសួងមហាផ្ទៃ បានចាត់ក្រុមការងារ កោះអញ្ជើញលោក កែវ សារ៉ាវុធ អគ្គនាយករង នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ មកបំភ្លឺទាក់ទិននឹងការចោទប្រកាន់នេះ នេះបើតាមសេចក្តីរាយការណ៍របស់សារព័ត៌មានភ្នំពេញ ប៉ុស្តិ៍។
ដោយឡែកកាលពីថ្ងៃទី១៦ ខែមិថុនា ឆ្នាំ២០២៤ ស្នងការដ្ឋាននគរបាលខេត្តសៀមរាប បានចេញលិខិតបង្គាប់ការផ្អាកការងារបណ្តោះអាសន្នលោកអនុសេនីយ៍ទោ រឿន សារ៉ាវុធ ឋានៈនាយរងប៉ុស្តិ៍នគរបាលរដ្ឋបាលខ្នារសណ្តាយ នៃអធិការដ្ឋាននគរបាលស្រុកបន្ទាយស្រី ឱ្យមកបង្ហាញមុខនៅការិយាល័យបុគ្គលិករៀងរាល់ម៉ោងធ្វើការ ដោយសារល្មើសនឹងបទវិន័យនគរបាលជាតិកម្ពុជា។
ចំណាត់ការនេះ ធ្វើឡើង បន្ទាប់ពីមានវីដេអូដែលគេបង្ហោះលើបណ្តាញសង្គមនាពេលថ្មីៗនេះ ដែលតាមចោទបានបង្ហាញថា លោក រឿន សារ៉ាវុធ បានប្រើអំពើហិង្សាលើបុរសម្នាក់ ខណៈពេលចុះល្បាតពេលយប់ក្នុងមូលដ្ឋាន នេះបើយោងតាមសេចក្តីរាយការណ៍របស់សារព័ត៌មាន CAMBODIA EXPRESS NEWS កាលពីថ្ងៃទី១៦ ខែមិថុនា ឆ្នាំ២០២៤៕
