ព្រះករុណាព្រះបាទសម្តេចព្រះបរមនាថ នរោត្តម សីហមុនី ចេញព្រះរាជក្រឹត្យ ត្រាស់បង្គាប់បញ្ចប់គោរមងារឧកញ៉ា ពីឧកញ៉ា ចំនួន ៤រូប។
យោងតាមព្រះរាជក្រឹត្យចុះថ្ងៃទី៣១ ខែឧសភា ឆ្នាំ២០២៤ ឧកញ៉ាចំនួន ៤រូប ដែលត្រូវបានបញ្ចប់គោរមងារខាងលើរួមមាន៖ ១. ឧកញ៉ា ពូ សុធីរៈ ២. ឧកញ៉ា តាំង ងួនសុង ៣. ឧកញ៉ា សំ ប៊ន និង ៤. ឧកញ៉ា ឌី បញ្ញា។
ការបញ្ចប់គោរមងារនេះ ធ្វើឡើងតាមសេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។ ទោះបីជាយ៉ាងណា ព្រះរាជក្រឹត្យ មិនបានបញ្ជាក់ពីមូលហេតុណាមួយនៃការបញ្ចប់គោរមងារឧកញ៉ាពីបុគ្គលទាំង ៤ រូបនេះឡើយ។
កាលពីថ្ងៃទី១៤ ខែមីនា ឆ្នាំ២០២៤ លោក សាយ ឈុំ ដែលកាលនោះជាប្រមុខរដ្ឋស្តីទីបានចេញព្រះរាជក្រឹត្យបញ្ចប់គោរមងារឧកញ៉ាពីឧកញ៉ា ឡេង ចាន់ណា បន្ទាប់ពីឧកញ៉ា ឡេង ចាន់ណា និងបក្ខពួករងការចោទប្រកាន់ពីប្រជាពលរដ្ឋថា បានឆបោកប្រាក់របស់ពួកគាត់រាប់លានដុល្លារ។
កាលពីថ្ងៃទី១១ ខែមេសា ឆ្នាំ២០២៤ ព្រះមហាក្សត្របានត្រាស់បង្គាប់បញ្ចប់គោរមងារឧកញ៉ាពីឧកញ៉ា ជា សារ៉ន ជាអគ្គនាយកក្រុមហ៊ុន ជា សារ៉ន រៀលធី ឯ.ក ដែលតាមចោទថា ជាប់ពាក់ព័ន្ធ នឹងករណីឆបោកប្រជាពលរដ្ឋជាង ២ ៤០០គ្រួសារ។
កាលពីថ្ងៃទី២០ ខែមិថុនា ឆ្នាំ២០២៤ ព្រះមហាក្សត្រក៏បានត្រាស់បង្គាប់បញ្ចប់គោរមងារឧកញ៉ា ពីឧកញ៉ា ស្រី ស៊ីណា បន្ទាប់ពីមានករណីបាញ់ប្រហារបណ្តាលឱ្យមនុស្សពីរនាក់ស្លាប់ និងពីរនាក់ផ្សេងទៀតរងរបួស។
គោរមងារជាឧកញ៉ានៅកម្ពុជា មាន៣ថ្នាក់ គឺឧកញ៉ា អ្នកឧកញ៉ា និងលោកអ្នកឧកញ៉ា។ បច្ចុប្បន្ន ដើម្បីទទួលបានគោរមងារជាឧកញ៉ា ដរាបណាបុគ្គលនោះ បានបរិច្ចាគថវិកាលើសកម្មភាពមនុស្សធម៌ជួយសង្គម ចាប់ពី៥០ម៉ឺនដុល្លារឡើងទៅ ខណៈមុនថ្ងៃទី២០ ខែមីនា ឆ្នាំ២០១៧ គោរមងារ «ឧកញ៉ា» តម្រូវត្រឹមតែ ១០ម៉ឺនដុល្លារប៉ុណ្ណោះ នេះបើយោងតាមអនុក្រឹត្យលេខ ៤៣ អនក្រ.បក ចុះថ្ងៃទី២០ ខែមីនា ឆ្នាំ២០១៧៕
