រាជរដ្ឋាភិបាល អនុញ្ញាតឱ្យក្រសួងការពារជាតិ ជ្រើសរើសពលទាហានថ្មីចំនួន ១ ៧៤១នាក់ ដើម្បីបំពេញក្របខ័ណ្ឌនៅកងឯកភាពចំនួន៤។
យោងតាមសេចក្តីសម្រេចចុះថ្ងៃទី៣០ ខែមេសា ឆ្នាំ២០២៤ ដែលត្រូវបានចុះហត្ថលេខាដោយលោកនាយករដ្ឋមន្ត្រី ហ៊ុន ម៉ាណែត និងផ្សព្វផ្សាយជាទូទៅដោយបណ្តាញព័ត៌មានក្នុងស្រុកមួយចំនួន កាលពីថ្ងៃទី០១ ខែឧសភា ឆ្នាំ២០២៤ បានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត បានអនុញ្ញាតឱ្យក្រសួងការពារជាតិ ជ្រើសរើសពលទាហានថ្មីចំនួន ១ ៧៤១នាក់ ដើម្បីបំពេញក្របខ័ណ្ឌឱ្យកងឯកភាពចំនួន៤ ដែលក្នុងនោះ កងពល តូចលេខ៧០ កងទ័ពជើងគោក ចំនួន២០០នាក់ បញ្ជាការដ្ឋានកងរាជអាវុធហត្ថ លើផ្ទៃប្រទេស ចំនួន ១ ០០០នាក់ បញ្ជាការដ្ឋានវិស្វកម្ម អគ្គបញ្ជាការដ្ឋាន ចំនួន ៣០០នាក់ និងបញ្ជាការដ្ឋានការពារអាកាស អគ្គបញ្ជាការដ្ឋាន ចំនួន២៤១នាក់។
សេចក្តីសម្រេចនេះ បញ្ជាក់ទៀតថា ការជ្រើសរើសពលទាហានថ្មីនេះ ត្រូវបាន ធ្វើឡើងទៅតាមសំណើរបស់ក្រសួងការពារជាតិ។
កាលពីដើមឆ្នាំ២០២៤ រាជរដ្ឋាភិបាល បានចេញសេចក្តីសម្រេចមួយ ដោយ អនុញ្ញាតឱ្យក្រសួងការពារជាតិ ជ្រើសរើសពលទាហានថ្មី ចំនួន១១១នាក់ សម្រាប់បំពេញក្របខ័ណ្ឌឱ្យបញ្ជាការដ្ឋានអង្គរក្ស នេះបើយោងតាម សេចក្តីសម្រេចមួយរបស់លោកនាយករដ្ឋមន្ត្រី ហ៊ុន ម៉ាណែត ចុះថ្ងៃទី២៣ ខែមករា ឆ្នាំ២០២៤៕
