ព្រះករុណាព្រះបាទសម្តេចព្រះបរមនាថ នរោត្តម សីហមុនី បានត្រាស់បង្គាប់ផ្តល់គោរមងារ “លោកអ្នកឧកញ៉ា” ដែលជាគោរមងារខ្ពស់បំផុតនៅកម្ពុជា ជូនដល់លោក ទ្រី ភាព ។
លោក ទ្រី ភាព ដែលមានគោរមងារជាអ្នកឧកញ៉ា និងជាអ្នកជំនួញដ៏ល្បីល្បាញនៅកម្ពុជានោះ ត្រូវបានព្រះមហាក្សត្រត្រាស់បង្គាប់ផ្តល់គោរមងារជា “លោកអ្នកឧកញ៉ា” នេះបើយោងតាមព្រះរាជក្រឹត្យចុះថ្ងៃទី១០ ខែឧសភា ឆ្នាំ២០២៤។ ការផ្តល់គោរមងារនេះ ធ្វើឡើង យោងតាមសេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។
កាលពីថ្ងៃទី០៦ ខែមេសា ឆ្នាំ២០២៤ លោក ទ្រី ភាព ទទួលបានការតែងតាំងជាទីប្រឹក្សារបស់លោក ហ៊ុន សែន ប្រធានព្រឹទ្ធសភា នីតិកាលទី៥ មានឋានៈស្មើទេសរដ្ឋមន្ត្រី ដោយពុំទទួលបានប្រាក់បំណាច់មុខងារ។
កាលបរិច្ឆេទថ្ងៃទី១២ ខែមេសា ឆ្នាំ២០២៤ ព្រះមហាក្សត្របានចេញព្រះរាជក្រឹត្យដាច់ដោយឡែកពីគ្នាផ្តល់គោរមងារ “លោកអ្នកឧកញ៉ា” ដល់អ្នកឧកញ៉ាចំនួន ៦រូប រួមមាន អ្នកឧកញ៉ា លី យ៉ុងផាត់ ជាប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន LYP Group, អ្នកឧកញ៉ា ពុង ឃាវសែ ជាអគ្គនាយកក្រុមហ៊ុន OCIC, អ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង គ្រុប, អ្នកឧកញ៉ា លី ហួរ ប្រធាននាយកប្រតិបត្តិក្រុមហ៊ុន លី ហួរ គ្រុប, អ្នកឧកញ៉ា ភូ ហុងស៊ួន ស៊ីគង់ទ្រីវ អនុប្រធានសមាគមឧកញ៉ាកម្ពុជា និងអ្នកឧកញ៉ា លាង ឃុន ជាអនុប្រធានសមាគមឧកញ៉ាកម្ពុជា និងជាកូនរបស់អ្នកឧកញ៉ា ភាព ហៀក ដែលជាស្ថាបនិកក្រុមហ៊ុនជីប ម៉ុង គ្រុប។
គួររំលឹកផងដែរថា គោរមងារជាឧកញ៉ានៅកម្ពុជា មាន៣ថ្នាក់ គឺឧកញ៉ា អ្នកឧកញ៉ា និងលោកអ្នកឧកញ៉ា។ បច្ចុប្បន្ន ដើម្បីទទួលបានគោរមងារជាឧកញ៉ា ដរាបណាបុគ្គលនោះ បានបរិច្ចាគថវិកាលើសកម្មភាពមនុស្សធម៌ជួយសង្គមចាប់ពី៥០ម៉ឺនដុល្លារឡើងទៅ ខណៈមុនថ្ងៃទី២០ ខែមីនា ឆ្នាំ២០១៧ គោរមងារ «ឧកញ៉ា» តម្រូវត្រឹមតែ១០ម៉ឺនដុល្លារប៉ុណ្ណោះ នេះបើយោងតាមអនុក្រឹត្យលេខ ៤៣ អនក្រ.បក ចុះថ្ងៃទី២០ ខែមីនា ឆ្នាំ២០១៧៕
