ព្រះករុណាព្រះបាទសម្តេចព្រះបរមនាថ នរោត្តម សីហមុនី ចេញព្រះរាជក្រឹត្យ ត្រាស់បង្គាប់បញ្ចប់គោរមងារឧកញ៉ា ពីឧកញ៉ា ជា សារ៉ន ដែលកំពុងត្រូវបានឃុំ ខ្លួនបណ្តោះអាសន្នពីបទឆបោក ខណៈតុលាការខេត្តកំពត សម្រេចបង្កកគណនី ធនាគារនិងគ្រឹះស្ថានហិរញ្ញវត្ថុចំនួន ៩៥គណនីរបស់ក្រុមហ៊ុន ជា សារ៉ន។
យោងតាមព្រះរាជក្រឹត្យចុះថ្ងៃទី១១ ខែមេសា ឆ្នាំ២០២៤ បានឱ្យដឹងថា ព្រះមហាក្សត្របានត្រាស់បង្គាប់បញ្ចប់គោរមងារឧកញ៉ាពីឧកញ៉ា ជា សារ៉ន ជាអគ្គនាយកក្រុមហ៊ុន ជា សារ៉ន រៀលធី ឯ.ក ដែលតាមចោទថា ជាប់ពាក់ព័ន្ធ នឹងករណីឆបោកប្រជាពលរដ្ឋជាង ២ ៤០០គ្រួសារ ជាមួយនឹងទឹកប្រាក់សរុប ជិត ៤០លានដុល្លារ ក្រោមរូបភាពវិនិយោគដីឡូតិ៍នៅស្រុកឈូក ខេត្តកំពត។
ឧកញ៉ា ជា សារ៉ន និងបក្ខពួក៩នាក់ផ្សេងទៀត ត្រូវបានតុលាការខេត្តកំពត សម្រេចឃុំខ្លួនបណ្តោះអាសន្នកាលពីថ្ងៃទី២៧ ខែមេសា ឆ្នាំ២០២៣ ពីបទ ឆបោក។
កាលពីថ្ងៃទី២៥ ខែមេសា ឆ្នាំ២០២៤ សាលាដំបូងខេត្តកំពត បានចេញ សេចក្តីប្រកាសព័ត៌មានមួយជម្រាបជូនសាធារណជន និងបណ្តាញព័ត៌មាននិង ភាគីពាក់ព័ន្ធ អំពីចំណាត់ការរបស់ខ្លួនលើសំណុំរឿងពាក់ព័ន្ធនឹងក្រុមហ៊ុន ជា សារ៉ន ដោយបានសម្រេចបង្កកគណនីធនាគារនិងគ្រឹះស្ថានមីក្រូហិរញ្ញវត្ថុចំនួន ៩៥គណនី បង្កកអចលនវត្ថុ (ដី) ចំនួន ១ ៧៩១ក្បាលដី។
សេចក្តីប្រកាសព័ត៌មានដដែល បញ្ជាក់ទៀតថា តុលាការបានស្តាប់ចម្លើយដើម បណ្តឹងរដ្ឋប្បវេណីចំនួន ៥ ៦៨០នាក់ និងសាក្សីជាអាជ្ញាធរចំនួន ២៤៩នាក់ ហើយថា តុលាការសម្រេចឃុំខ្លួនជនត្រូវចោទចំនួន ១០នាក់ ចេញដីកាបង្គាប់ ឱ្យចាប់ខ្លួនជនត្រូវចោទចំនួន ៩នាក់ ប៉ុន្តែមកដល់ពេលនេះមិនទាន់ចាប់ខ្លួន បាននៅឡើយទេ។
តុលាការក៏បានបញ្ជាក់ផងដែរថា បានចេញដីកាបង្គាប់ឱ្យនាំខ្លួនជនត្រូវចោទចំ នួន ៤០នាក់ និងចេញដីការបង្គាប់ឱ្យចូលខ្លួនលើជនត្រូវចោទចំនួន ១០ផ្សេង ទៀត ដោយកំណត់ឱ្យចូលខ្លួនគិតចាប់ពីថ្ងៃទី២៩ ខែមេសា ឆ្នាំ២០២៤ ដល់ថ្ងៃ ០៩ ខែឧសភា ឆ្នាំ២០២៤។
កាលពីថ្ងៃទី១៤ ខែមីនា ឆ្នាំ២០២៤ លោក សាយ ឈុំ ដែលកាលនោះជាប្រមុខរដ្ឋស្តីទីបានចេញព្រះរាជក្រឹត្យបញ្ចប់គោរមងារឧកញ៉ាពីឧកញ៉ា ឡេង ចាន់ណា បន្ទាប់ពីឧកញ៉ា ឡេង ចាន់ណា និងបក្ខពួករងការចោទប្រកាន់ពីប្រជាពលរដ្ឋថា បានឆបោកប្រាក់របស់ពួកគាត់រាប់លានដុល្លារក្នុងរូបភាពទិញដី ផ្ទះ និងការវិនិយោគបានទទួលការប្រាក់ខ្ពស់៕
