ព្រះករុណាព្រះបាទសម្តេចព្រះបរមនាថ នរោត្តម សីហមុនី បានត្រាស់បង្គាប់ផ្តល់គោរមងារ “លោកអ្នកឧកញ៉ា” ដែលជាគោរមងារខ្ពស់បំផុតនៅកម្ពុជា ជូនដល់អ្នកឧកញ៉ាល្បីឈ្មោះ ៦រូប នាពេលថ្មីៗនេះ។
ការផ្តល់គោរមងារ “លោកអ្នកឧកញ៉ា” នេះត្រូវបានប្រកាស អំឡុងសន្និបាតប្រចាំឆ្នាំលើកទី១ របស់សមាគមឧកញ៉ាកម្ពុជា ដែលប្រារព្ធឡើងកាលពីថ្ងៃទី២៦ ខែមេសា ឆ្នាំ២០២៤ ដោយមានការចូលរួមពីលោក ហ៊ុន សែន ក្នុងឋានៈជាប្រធានកិត្តិយសសមាគមឧកញ៉ាកម្ពុជា។
យោងតាមព្រះរាជក្រឹត្យដាច់ដោយឡែកពីគ្នា និងមានចុះកាលបរិច្ឆេទថ្ងៃទី១២ ខែមេសា ឆ្នាំ២០២៤ ដូចៗគ្នា អ្នកឧកញ៉ាទាំង៦រូបដែលទទួលបានគោរមងារជា “លោកអ្នកឧកញ៉ា” នោះរួមមាន អ្នកឧកញ៉ា លី យ៉ុងផាត់ ជាប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន LYP Group អ្នកឧកញ៉ា ពុង ឃាវសែ ជាអគ្គនាយកក្រុមហ៊ុន OCIC អ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង គ្រុប អ្នកឧកញ៉ា លី ហួរ ប្រធាននាយកប្រតិបត្តិក្រុមហ៊ុន លី ហួរ គ្រុប អ្នកឧកញ៉ា ភូ ហុងស៊ួន ស៊ីគង់ទ្រីវ អនុប្រធានសមាគមឧកញ៉ាកម្ពុជា និងអ្នកឧកញ៉ា លាង ឃុន ជាអនុប្រធានសមាគមឧកញ៉ាកម្ពុជា និងជាកូនរបស់អ្នកឧកញ៉ា ភាព ហៀក ដែលជាស្ថាបនិកក្រុមហ៊ុនជីប ម៉ុង គ្រុប។
បុគ្គលចំនួន ២៤២រូប ត្រូវបានព្រះមហាក្សត្រចេញព្រះរាជក្រឹត្យផ្ដល់គោរមងារ ជាឧកញ៉ា និងអ្នកឧកញ៉ានៅក្នុងឆ្នាំ២០២៣ នេះយោងតាមសៀវភៅរាជកិច្ចចាប់ពីលេខ១ ត្រីមាសទី១ ឆ្នាំ២០២៣ ដល់លេខ៩៦ នៃត្រីមាសទី៤ ឆ្នាំ២០២៣។
គួររំលឹកផងដែរថា គោរមងារជាឧកញ៉ានៅកម្ពុជា មាន៣ថ្នាក់ គឺឧកញ៉ា អ្នកឧកញ៉ា និងលោកអ្នកឧកញ៉ា។ បច្ចុប្បន្ន ដើម្បីទទួលបានគោរមងារជាឧកញ៉ា ដរាបណាបុគ្គលនោះ បានបរិច្ចាគថវិកាលើសកម្មភាពមនុស្សធម៌ជួយសង្គមចាប់ពី៥០ម៉ឺនដុល្លារឡើងទៅ ខណៈមុនថ្ងៃទី២០ ខែមីនា ឆ្នាំ២០១៧ គោរមងារ «ឧកញ៉ា» តម្រូវត្រឹមតែ១០ម៉ឺនដុល្លារប៉ុណ្ណោះ នេះបើយោងតាមអនុក្រឹត្យលេខ ៤៣ អនក្រ.បក ចុះថ្ងៃទី២០ ខែមីនា ឆ្នាំ២០១៧៕
