អតីតតំណាងរាស្ត្រគណបក្សប្រឆាំងមួយរូបទទួលបានការលើកលែងទោសពីព្រះមហាក្យត្រ ក្រោយពីសុំអភ័យទោសពីរដ្ឋាភិបាល ខណៈមន្ត្រីជាន់ខ្ពស់ម្នាក់ ទៀតប្រកាសផ្តាច់ខ្លួនពីអតីតមេដឹកនាំគណបក្សប្រឆាំង។
ព្រះករុណាព្រះបាទសម្តេចព្រះបរមនាថ នរោត្តម សីហមុនី បានត្រាស់បង្គាប់លើកលែងទោសលោក គង់ សភា ដែលត្រូវបានតុលាការសម្រេចផ្តន្ទាទោសដាក់ពន្ធនាគារកំណត់៨ឆ្នាំ តាមអំណាចសាលក្រមព្រហ្មទណ្ឌ ចុះថ្ងៃទី១៤ ខែមិថុនា ឆ្នាំ២០២២ របស់សាលាដំបូងរាជធានីភ្នំពេញ នេះបើយោងតាមព្រះរាជក្រឹត្យចុះថ្ងៃទី២៤ ខែមេសា ឆ្នាំ២០២៤។
ការលើកលែងទោសនេះ ធ្វើឡើងក្រោយពីលោកនាយករដ្ឋមន្ត្រី ហ៊ុន ម៉ាណែត បានប្រកាសនៅលើទំព័រហ្វេសប៊ុករបស់លោកថា លោកបានទទួលលិខិតសុំការអភ័យទោសរបស់លោក គង់ សភា ហើយថា នឹងចាត់ចែងតាមនីតិវិធី ដើម្បីឲ្យលោកអាចវិលត្រឡប់មកកាន់ប្រទេសកម្ពុជាវិញ។
តាមរយៈលិខិតមួយច្បាប់ធ្វើនៅប្រទេសកាណាដា ចុះថ្ងៃទី០៩ ខែកុម្ភៈ ឆ្នាំ២០២៤ លោក គង់ សភា អតីតតំណាងរាស្ត្រមណ្ឌលស្វាយរៀងមកពីគណបក្សសង្គ្រោះជាតិបានសម្តែងការសោកស្តាយនិងសុំការអភ័យទោសពីរដ្ឋាភិបាល ជាពិសេសពីលោកនាយករដ្ឋមន្ត្រី ហ៊ុន ម៉ាណែត និងលោក ហ៊ុន សែន ប្រធានគណបក្សប្រជាជនកម្ពុជា។
នៅក្នុងលិខិតដដែលនេះ លោក គង់ សភា បានស្នើសុំឲ្យលោកនាយករដ្ឋមន្ត្រី ហ៊ុន ម៉ាណែត ជួយអន្តរាគមន៍ ដើម្បីទទួលបានការលើកលែងទោសនិងរួចផុតពីទោសទណ្ឌនិងទម្លាក់ចោលបទចោទទាំងឡាយដែលអាចមានចំពោះរូបលោក ដើម្បីអាចវិលត្រឡប់មកប្រទេសកម្ពុជាវិញ។
លោក គង់ សភា ស្ថិតក្នុងចំណោមថ្នាក់ដឹកនាំនិងសកម្មជន៦០នាក់របស់គណបក្សសង្គ្រោះជាតិដែលត្រូវបានផ្តន្ទាទោសជាប់ពន្ធនាគារកាលពីឆ្នាំ២០២២ បន្ទាប់ពីតុលាការរកឃើញពិរុទ្ធភាព ដែលតាមចោទពីបទរៀបចំផែនការ ដើម្បីផ្តួលរំលំរដ្ឋាភិបាល។ លោកបានភៀសខ្លួនចេញពីប្រទេសកម្ពុជាកាលពី ឆ្នាំ២០១៧ បន្ទាប់ពីការចាប់ខ្លួនលោក កឹម សុខា មេដឹកនាំគណបក្សប្រឆាំង ដោយចោទប្រកាន់ពីបទគប់គិតជាមួយបរទេស ដើម្បីផ្តួលរំលំរដ្ឋាភិបាល។
ស្របពេលជាមួយគ្នានេះដែរ លោក ហ៊ុន សែន ជាប្រធានព្រឹទ្ធសភាបានប្រកា សតាមទំព័រហ្វេសប៊ុករបស់លោកកាលពីថ្ងៃទី២៣ ខែមេសា ឆ្នាំ២០២៤ ថា លោកទទួលយកការសុំអភ័យទោសរបស់លោក ជា ប៉ូច ដោយសន្យាថា នឹងឲ្យមេធាវីរបស់លោកដកពាក្យបណ្តឹងចេញពីតុលាការ ក្រោយពីអតីតតំណាងរាស្ត្រមណ្ឌលព្រៃវែងនិងកំពតរូបនេះ សរសេរលិខិតសុំការអភ័យទោស។
ក្នុងលិខិតពីប្រទេសអូស្ត្រាលី ចុះថ្ងៃទី២៣ ខែមេសា ឆ្នាំ២០២៤ លោក ជា ប៉ូច បានសុំការអភ័យទោសពីលោក ហ៊ុន សែន និងប្រកាសផ្តាច់ខ្លួនពីលោក សម រង្ស៊ី និងឈប់ធ្វើសកម្មភាពនយោបាយជាមួយក្រុមអតីតគណបក្សសង្គ្រោះជាតិ គណបក្សភ្លើងទៀននិងគណបក្សដែលមាននិន្នាការប្រឆាំង៕
