ព្រះករុណា ព្រះបាទសម្តេចព្រះបរមនាថ នរោត្តម សីហមុនី ចេញព្រះរាជក្រឹត្យដាក់ឱ្យនាយនគរបាលថ្នាក់ឧត្តមសេនីយ៍ ក្របខ័ណ្ឌមន្ត្រីនគរបាលជាតិនៃក្រសួងមហាផ្ទៃ ៣៥រូប ចូលនិវត្តន៍ក្នុងមុខងារសាធារណៈ។
ក្នុងចំណោមនាយនគរបាលថ្នាក់ឧត្តមសេនីយ៍ទាំង ៣៥រូបនោះ មានថ្នាក់នាយឧត្តមសេនីយ៍ ១រូប គឺនាយឧត្តមសេនីយ៍ ម៉ក់ ជីតូ ដោយរក្សាទុកមុខតំណែងនយោបាយនៅដដែល ថ្នាក់ឧត្តមសេនីយ៍ឯកមាន ២រូប ថ្នាក់ឧត្តមសេនីយ៍ទោមាន ១៣រូប និងថ្នាក់ឧត្តមសេនីយ៍ត្រីមាន ១៩រូប នេះបើយោងតាមព្រះរាជក្រឹត្យចុះថ្ងៃទី០២ ខែមេសា ឆ្នាំ២០២៤ ដែលត្រូវបានផ្សព្វផ្សាយជាទូទៅនៅលើបណ្តាញព័ត៌មានក្នុងស្រុក។
ឯកសារដដែល បញ្ជាក់ថា ការដាក់ឱ្យចូលនិវត្តន៍នេះ គឺធ្វើឡើងតាមសេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។
លោក ម៉ក់ ជីតូ ទើបនឹងត្រូវបានព្រះមហាក្សត្រចេញព្រះរាជក្រឹត្យតែងតាំងជារដ្ឋលេខាធិការ ក្រសួងមហាផ្ទៃកាលពីខែកុម្ភៈ នេះបើយោងតាមព្រះរាជក្រឹត្យចុះថ្ងៃទី០៧ ខែកុម្ភៈ ឆ្នាំ២០២៤៕
