ក្រសួងមហាផ្ទៃសម្រេចបណ្តេញមន្ត្រីនគរបាលជិត ៧០រូប ដែលមានតួនាទីចាប់ពីមន្ត្រីរហូតដល់ស្នងការរងខេត្ត មកពីអគ្គនាយកដ្ឋាន និងស្នងការដ្ឋាននគរបាលរាជធានីខេត្ត១៨ផ្សេងគ្នា ចេញពីក្របខណ្ឌមន្ត្រីនគរបាលជាតិ ដោយសារល្មើសវិន័យកងកម្លាំងនគរបាលជាតិ។
យោងតាមប្រកាសចំនួន ៣ដាច់ដោយឡែកពីគ្នា និងមានចុះកាលបរិច្ឆេទថ្ងៃទី០១ ខែមីនា ឆ្នាំ២០២៤ដូចគ្នា លោក ស សុខា រដ្ឋមន្ត្រីក្រសួងមហាផ្ទៃ សម្រេចដកហូតមុខតំណែង ឋានន្តរស័ក្តិ និងបណ្តេញពីក្របខណ្ឌមន្ត្រីនគរបាលជាតិនូវមន្ត្រីនគរបាលសរុប ៦៨រូប ដែលក្នុងនោះ មាន៨រូបមកពីអគ្គនាយកដ្ឋានអន្តោប្រវេសន៍ និងស្នងការនគរបាលរាជធានីខេត្តចំណុះឱ្យអគ្គស្នងការនគរបាលជាតិសរុប៦០រូប។
ឯកសារទាំង៣ ដែលមានលេខ៨៣៥ប្រក ៨៣៦ប្រកនិង៨៣៨ប្រក ដែលត្រូវបានចុះហត្ថលេខាដោយលោក ស សុខា រដ្ឋមន្ត្រីក្រសួងមហាផ្ទៃផងនោះ បានលើកឡើងថា ការបណ្តេញចេញនេះ គឺធ្វើឡើងដោយមូលហេតុមន្ត្រីទាំងនោះបានល្មើសវិន័យរបស់កងកម្លាំងនគរបាលជាតិ ប៉ុន្តែឯកសារទាំងនេះ មិនបានបញ្ជាក់ពីសកម្មភាពល្មើសរបស់មន្ត្រីទាំងនោះទេ។
យោងតាមប្រកាសលេខ៨៣៦ប្រក ចុះថ្ងៃទី០១ ខែមីនា ឆ្នាំ២០២៤ បានបញ្ជាក់ថា មន្ត្រីទាំង ៥៩រូបដែលត្រូវបានបណ្តេញចេញពីក្របខណ្ឌនោះគឺ មកពីស្នងការនគរបាលខេត្តចំនួន ១៧ផ្សេងគ្នា ដែលក្នុងស្នងការដ្ឋាននគរបាលខេត្តឧត្តរមានជ័យចំនួន ៣នាក់ ស្នងការដ្ឋាននគរបាលខេត្តស្ទឹងត្រែង៣នាក់ ស្នងការដ្ឋាននគរបាលខេត្តរតនគិរី៦នាក់ ស្នងការដ្ឋាននគរបាលខេត្តកណ្តាល៤នាក់ ស្នងការដ្ឋាននគរបាលខេត្តក្រចេះ៣នាក់ ស្នងការដ្ឋាននគរបាលខេត្តព្រះវិហារ១នាក់ ស្នងការដ្ឋាននគរបាលខេត្តបន្ទាយមានជ័យ១នាក់ ស្នងការដ្ឋាននគរបាលខេត្តត្បូងឃ្មុំ១នាក់ ស្នងការដ្ឋាននគរបាលខេត្តតាកែវ៤នាក់ ស្នងការដ្ឋាននគរបាលខេត្តកំពង់ស្ពឺ៣នាក់ ស្នងការដ្ឋាននគរបាលខេត្តបាត់ដំបង៦នាក់ ស្នងការដ្ឋាននគរបាលខេត្តកំពង់ធំ១នាក់ ស្នងការដ្ឋាននគរបាលខេត្តពោធិ៍សាត់២នាក់ ស្នងការដ្ឋាននគរបាលខេត្តកំពត២នាក់ ស្នងការដ្ឋាននគរបាលខេត្តសៀមរាប៥នាក់ ស្នងការដ្ឋាននគរបាលខេត្តព្រះសីហនុ១នាក់ និងស្នងការដ្ឋាននគរបាលរាជធានីភ្នំពេញ១៣នាក់។
ឯកសារដដែលនេះ បញ្ជាក់ថា មន្ត្រីទាំងនោះមានតួនាទីចាប់ពីមន្ត្រីនគរបាលស្រុកក្រុង មន្ត្រីនគរបាលព្រហ្មទណ្ឌកម្រិតធ្ងន់ មន្ត្រីវរសេនាតូចការពារព្រំដែនគោក នាយរងផ្នែក នាយផ្នែកនៃការរិយាល័យអន្តោប្រវេសន៍ នាយរងប៉ុស្តិ៍ នាយប៉ុស្តិ៍ នាយរងការិយាល័យរហូតដល់អធិការរងស្រុកនិងអធិការរងខណ្ឌ។
ឯកសារមួយទៀតលេខ៨៣៥ប្រក បានបង្ហាញថា មានមន្ត្រីនគរបាល៨រូបនៃអគ្គនាយកដ្ឋានអន្តោប្រវេសន៍ ត្រូវបានដកហូតមុខតំណែងនិ ងបណ្តេញចេញពីក្របខ័ណ្ឌ។ មន្ត្រីទាំងមន្ត្រីរូបនេះ មានតួនាទីចាប់ពីមន្ត្រី នាយរងផ្នែក នាយផ្នែករហូតដល់នាយរងការិយាល័យ។ ចំណែកប្រកាសទី៣លេខ៨៣៨ប្រក បង្ហាញថា ក្រសួងមហាផ្ទៃ សម្រេចដកហូតមុខតំណែងនិងបណ្តេញលោក កែវ ភាគ ស្នងការរង នៃស្នងការដ្ឋាននគរបាលខេត្តស្វាយរៀងចេញពីក្របខ័ណ្ឌនគរបាលជាតិ។
យោងតាមសេចក្តីរាយការណ៍របស់វិទ្យុអាស៊ីសេរីដែលចុះផ្សាយកាលពីថ្ងៃទី០៩ ខែមីនា ឆ្នាំ២០២៤ ដោយបានដកស្រង់សម្តីរបស់លោក ទូច សុឃៈ អ្នកនាំពាក្យក្រសួងមហាផ្ទៃថា រយៈពេល៦ខែនៃអាណត្តិទី៧នេះ ក្រសួងមហាផ្ទៃបានសម្រេចបណ្តេញមន្ត្រីនគរបាល១៦០នាក់ បន្ទាប់ពីរកឃើញមន្ត្រីទាំងនោះជាប់ពាក់ព័ន្ធនឹងការប្រើប្រាស់គ្រឿងញៀន។
លោកនាយករដ្ឋមន្ត្រី ហ៊ុន ម៉ាណែត ធ្លាប់បានព្រមានមន្ត្រី និងកងកម្លាំងប្រដាប់អាវុធរូបណា ដែលពាក់ព័ន្ធនឹងគ្រឿងញៀន នឹងត្រូវបណ្តេញចេញពីក្របខ័ណ្ឌភ្លាមៗ ហើយថា ការបោសសម្អាតគ្រឿងញៀននៅក្នុងជួរកងកម្លាំងប្រដាប់អាវុធ នឹងត្រូវអនុវត្តមុនគេ យោងទៅតាមការចុះផ្សាយរបស់ វិទ្យុបារាំង RFI កាលពីខែធ្នូ៕
