រដ្ឋាភិបាលអនុញ្ញាតឱ្យបើកដំណើរការអាជីវកម្មខ្នាតតូចនិងធំចំនួន២៨កន្លែង រួមមានស្ថានីយប្រេងឥន្ធនៈ និងរោងចក្រផលិតសម្ភារៈអេឡិចត្រូនិច សម្ភារៈសំណង់និងរោងចក្រផ្សេងទៀត នេះបើយោងឯកសារនៅក្នុងសៀវភៅរាជកិច្ច។
យោងតាមឯកសារចុះកាលបរិច្ឆេទអំឡុងខែមិថុនា ឆ្នាំ២០២២ ដល់ខែសីហា ឆ្នាំ២០២៣ នៅក្នុងសៀវភៅរាជកិច្ចចាប់ពីលេខ១ ដល់លេខ២៤ ក្នុងត្រីមាសទី០១ ឆ្នាំ២០២៤ ដែលចេញផ្សាយជាសារធារណៈដោយទីស្ដីការគណៈរដ្ឋមន្រ្តីពីចន្លោះថ្ងៃទី២៥ ខែមករា ឆ្នាំ២០២៤ដល់ថ្ងៃទី៥ ខែមីនា ឆ្នាំ២០២៤ បានបង្ហាញថា រាជរដ្ឋាភិបាល ក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍ និងក្រសួងរ៉ែ និងថាមពល បានចេញប្រកាសអនុញ្ញាតឱ្យបើកដំណើរការអាជីវកម្មថ្មីចំនួន២៨កន្លែង ក្នុងនោះមាន ការអនុញ្ញាតដំណើរការស្ថានីយប្រេង និងឧស្ម័នឥន្ធនៈចំនួន១៥កន្លែង (ស្ថានីយប្រេងឥន្ធនៈចំនួន១៣ស្ថានីយ ស្ថានីយរួមប្រេងនិងឧស្ម័នឥន្ធនៈចំនួន២ស្ថានីយ) ដែលម្ចាស់ស្ថានីយជាជនជាតិខ្មែរទាំងអស់។
ឯកសារដដែលនេះក៏បានបង្ហាញពីការផ្តល់ការអនុញ្ញាតឱ្យបើករោងចក្រចំនួន១៣ផងដែរ ដូចជារោងចក្រផលិតសម្ភារអេឡិចត្រូនិក រោងចក្រផលិតសម្ភារសម្រាប់ក្មេងលេងគ្រប់ប្រភេទ រោងចក្រផលិតដែកទីបគ្រប់ប្រភេទ និងសម្ភារសំណង់ ផលិតអំពូលភ្លើង រោងចក្រផលិតកាបូប រោងចក្រផលិតគ្រឿងបន្សំស្បែកជើង រោងចក្រផលិត និងផ្គុំដំឡើងបន្ទះសូឡា រោងចក្រផលិតបាវ និងសម្ភារវេចខ្ចប់ រោងចក្រផលិតចំណីសត្វ និងកែច្នៃស្បែកសត្វ។ ក្នុងចំណោមរោងចក្រទាំង១៣នេះ មានម្ចាស់រោងចក្រជាជនជាតិចិនចំនួន ៩នាក់ ចិន(តៃវ៉ាន់) ២នាក់ និងជនជាតិខ្មែរម្នាក់។
គួរកត់សម្គាល់ដែរថា រោងចក្រទាំង១៣នោះដែលអ្នកវិនិយោគបង្កើតឡើងនោះ មានទីតាំងស្ថិតនៅខេត្តចំនួន៥ រួមមាន ខេត្តកំពង់ស្ពឺចំនួន៥ ស្វាយរៀង៣ ព្រះសីហនុ២ កណ្តាល២ និងខេត្តតាកែវ១។
អំឡុងសន្និបាតប្រចាំរបស់ខ្លួនកាលពីថ្ងៃទី២០ ខែកុម្ភៈ ឆ្នាំ២០២៤ ក្រសួងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបង្ហាញសមិទ្ធផលការងារ ឆ្នាំ២០២៣ ដែលក្នុងនោះ មានរោងចក្រធុនធ្ងន់បង្កើតថ្មីចំនួន២៤១ និងបិទទ្វារចំនួន៩៨ ពោលគឺកើន ចំនួន១៤៣ រោងចក្រ (៧,២១%) ធៀបនឹងឆ្នាំ២០២២ ដែលធ្វើឱ្យចំនួនរោងចក្រធុនធ្ងន់ដែល កំពុងដំណើរការទូទាំងប្រទេសមានចំនួន ២.១២៥ រោងចក្រ និងផ្តល់ការងារចំនួន ១.០៤០.៣៣៣ កន្លែង។ ដោយឡែកទុនវិនិយោគសរុបក្នុងឆ្នាំ២០២៣ មានចំនួន១៨,៥៦ពាន់លានដុល្លារអាមេរិក កើនឡើង ១១,២៤ភាគរយធៀបនឹងឆ្នាំ២០២២៕