អតីតសមាជិកគណៈកម្មាធិការនាយក នៃអតីតគណបក្សសង្គ្រោះជាតិ និងជាអ្នកវិភាគ នយោបាយ លោកឡុង គឹមឃន ត្រូវបានតែងតាំងមុខតំណែង ជារដ្ឋលេខាធិការក្រសួងយុត្តិធម៌ និងជាទីប្រឹក្សាលោកនាយករដ្ឋមន្ត្រីជាបន្តបន្ទាប់ ក្នុងរយៈ ពេលដ៏ខ្លីក្រោយពីសុំចូលរួមជីវភាពនយោបាយជាមួយគណបក្សកាន់អំណាច។
យោងតាមព្រះរាជក្រឹត្យចុះថ្ងៃទី២៧ ខែមករា ឆ្នាំ២០២៤ (ទំព័រ៣៦១៤) ក្នុងសៀវភៅរាជកិច្ច លេខ២៦ ឆ្នាំ២០២៤ និងចេញផ្សាយជាសាធារណៈដោយទីស្ដីការគណៈដ្ឋមន្រ្តី នៅថ្ងៃទី១៣ ខែមីនា ឆ្នាំ២០២៤ បានបង្ហាញថា ព្រះមហាក្សត្របានត្រាស់បង្គាប់តែងតាំង និងផ្តល់ឋានៈលោក ឡុង គឹមឃន ជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន ម៉ាណែត មានឋានៈស្មើរដ្ឋមន្ត្រី ដែលការតែងតាំងនេះ ធ្វើឡើងរយៈពេល៤ថ្ងៃ ក្រោយពីលោកត្រូវបាន តែងតាំងមុខតំណែងជារដ្ឋលេខាធិការក្រសួងយុត្តិធម៌ តាមរយៈព្រះរាជក្រឹត្យចុះថ្ងៃទី២៣ ខែមករា ឆ្នាំ២០២៤ នៅក្នុងសៀវភៅរាជកិច្ចលេខ២៦ដដែលនេះ។
លោក ឡុង គឹមឃន (ឈ្មោះហៅក្រៅ សូ សមយុទ្ធ) ទទួលបានតំណែងជារដ្ឋលេខាធិការនៃក្រ សួងយុត្តិធម៌ បន្ទាប់ពីសុំចូលរួមជីវភាពនយោបាយជាមួយគណបក្សកាន់អំណាចបាន២០ថ្ងៃ បុ៉ណ្ណោះ នេះបើយោងតាមលិខិតរបស់លោកចុះថ្ងៃទី៣ ខែមករា ឆ្នាំ២០២៤ ផ្ញើជូនលោក ហ៊ុន សែន ប្រធានគណបក្សប្រជាជនកម្ពុជានេះ៕