លោក កែត ឃី អតីតមេធាវី និងជាសមាជិកអចិន្ត្រៃយ៍ នៃគណបក្សភ្លើងទៀន ត្រូវបានព្រះមហាក្សត្រ ត្រាស់បង្គាប់តែងតាំងជាទីប្រឹក្សារាជរដ្ឋាភិបាលអាណត្តិទី៧ បន្ទាប់ពីត្រូវបានបញ្ចប់មុខតំណែងពីទីប្រឹក្សារាជរដ្ឋាភិបាលអាណត្តិមុន។
យោងតាមព្រះរាជក្រឹត្យចុះថ្ងៃទី១៦ ខែធ្នូ ឆ្នាំ២០២៣ ក្នុងសៀវភៅរាជកិច្ចលេខ២២ ដែលចេញផ្សាយជាសាធារណៈ ដោយទីស្តីការគណៈរដ្ឋមន្ត្រី កាលពីថ្ងៃទី២៨ ខែកុម្ភៈ ឆ្នាំ២០២៤ បានបង្ហាញថា ព្រះករុណាព្រះបាទសម្តេចព្រះបរមនាថ នរោត្តម សីហមុនី ត្រាស់បង្គាប់បញ្ចប់មុខតំណែងលោក កែត ឃី ជាទីប្រឹក្សារាជរដ្ឋាភិបាលដែលមានឋានៈស្មើរដ្ឋលេខាធិការ និងតែងតាំងលោកជាទីប្រឹក្សារាជរដ្ឋាភិបាលអាណត្តិថ្មី ដោយពុំទទួលប្រាក់បំណាច់មុខងារ។
តាមរយៈលិខិតមួយចុះថ្ងៃទី១៩ ខែឧសភា ឆ្នាំ២០២៣ ដែលមានភ្ជាប់ហត្ថលេខា និងបញ្ជាក់តួនាទីរបស់លោកជាសមាជិកអចិន្ត្រៃយ៍ ជាប្រធានក្រុមប្រឹក្សាវាយតម្លៃ និងវិន័យ និងជាអនុប្រធានក្រុមការងារខេត្តកំពង់ស្ពឺ នៃគណបក្សភ្លើងទៀន ដែលដាក់ជូន ប្រធានគណបក្សមួយនេះ លោក កែត ឃី បានប្រកាសលាឈប់ពីសមាជិក និងតួនាទីទាំងអស់នៅក្នុងគណបក្សភ្លើងទៀន។
ទោះជាយ៉ាងណា មួយថ្ងៃបន្ទាប់ពីដាក់លិខិតប្រកាសលាឈប់នោះ លោក កែត ឃី ក៏បានដាក់លិខិតមួយទៀតចុះថ្ងៃទី២០ ខែឧសភា ឆ្នាំ២០២៣ ដោយស្នើសុំលោក ហ៊ុន សែន ប្រធានគណបក្សប្រជាជនកម្ពុជា ដើម្បីចូលរួមជីវភាពនយោបាយជាមួយគណបក្សនេះ៕