កីឡាករបាល់ទាត់បរទេស ២រូប ដែលកំពុង និងធ្លាប់ប្រកបអាជីពនៅលីកបាល់ទាត់កំពូលកម្ពុជាទទួលបានសញ្ជាតិខ្មែរនិងបានជាប់លេងឲ្យក្រុមជម្រើសជាតិកម្ពុជា។
យោងតាមព្រះរាជក្រឹត្យពីរដាច់ដោយឡែកពីរគ្នា ដែលចុះហត្ថលេខាដោយលោក សាយ ឈុំ ប្រមុខរដ្ឋស្តីទីកាលពីថ្ងៃទី២៥ ខែកញ្ញា ឆ្នាំ២០២៣ នៅក្នុងសៀវភៅរាជកិច្ចលេខ១២ ដែលរដ្ឋាភិបាលបានចេញផ្សាយកាលពីថ្ងៃទី០៨ ខែកុម្ភៈ ឆ្នាំ២០២៤ បានបង្ហាញថា កីឡាករបាល់ទាត់ បរទេសចំនួន ២រូប រួមមានឈ្មោះ យូឌៃ អូកាវ៉ា (YUDAI OGAWA) ជនជាតិជប៉ុន និងលោក ប៊ីហ្វូឡូ អឹមបាហ្គា ហ៊្សង់ ម៉ារី ព្រីវ៉ាត (BEFOLO MBARGA JEAN MARIE PRIVAT) ជនជាតិកាមេរូន ត្រូវបានផ្តល់សញ្ជាតិខ្មែរ។
កីឡាករខ្សែបម្រើ យូឌៃ អូកាវ៉ា អាយុ២៧ឆ្នាំ បានចាប់ផ្តើមចូលរួមជាមួយក្របខ័ណ្ឌបាល់ទាត់កំពូលកម្ពុជា នៅឆ្នាំ២០១៨ ដោយចូលរួមជាមួយក្លឹបបាល់ទាត់ក្រសួងការពារជាតិ រួចបន្តលេងឱ្យក្លឹបអង្គរថាយហ្គើ ពីររដូវកាល មុនពេលចូលរួមជាមួយក្លឹបភ្នំពេញក្រោននៅឆ្នាំ២០២១ មកដល់ពេលបច្ចុប្បន្ន។
ចំណែក ប៊ីហ្វូឡូ អឹមបាហ្គា ហ្ស៊ង់មារី ព្រីវ៉ាត អាយុ៣២ឆ្នាំ ចាប់ផ្តើមអាជីពបាល់ទាត់របស់ខ្លួននៅឆ្នាំ ២០១៣ នៅក្របខ័ណ្ឌបាល់ទាត់កម្ពុជា ដោយលេងឱ្យក្លឹបបាល់ទាត់បឹងកេត ជាក្រុមកំពូលមួយនៅក្រប ខ័ណ្ឌ Cambodian Premier League (CPL)។ ក្រោយមកកីឡាករខ្សែប្រយុទ្ធរូបនេះ បានបន្តលេងឱ្យក្លឹបវេសស្ទើនភ្នំពេញ ក្លឹបអង្គរថាយហ្គើ ក្លឹបណាហ្គាវើល និងក្លឹបស្វាយរៀង។ បច្ចុប្បន្ន ព្រីវ៉ាត លេងឱ្យក្លឹប Bali United នៅក្នុងប្រទេសឥណ្ឌូណេស៊ី។
កីឡាករ យូឌៃ អូកាវ៉ា និងកីឡាករ ព្រីវ៉ាត គឺជាកីឡាករបាល់ទាត់បរទេសពីររូប ដែលទទួលបានស ញ្ជាតិខ្មែរ និងទទួលបានឱកាសលេងឱ្យក្រុមបាល់ទាត់ជម្រើសជាតិកម្ពុជា ត្រៀមប្រកួតជម្រុះជើង ឯកពិភពលោកឆ្នាំ២០២៦៕
