សៀវភៅរាជកិច្ចលេខ៥៧ បានបង្ហាញនូវឯកសារ និងសេចក្តីសម្រេចសំខាន់មួយចំនួនៗ ស្តីពីការផ្តល់សញ្ជាតិខ្មែរ ការបំពាក់មេដាយការងារ ការតែងតាំង និងរួមទាំងការលើកលែងទោសអតីតសកម្មជនបក្សប្រឆាំងម្នាក់ផងដែរ។
សៀវភៅរាជកិច្ចលេខ៥៧ ត្រីមាសទី៣ ឆ្នាំ២០២៣ ដែលចេញផ្សាយដោយរដ្ឋាភិបាល កាលពីថ្ងៃទី២០ ខែតុលា ឆ្នាំ២០២៣ បានបង្ហាញពីការផ្តល់សញ្ជាតិខ្មែរដល់ជនបរទេសសរុប ១៨រូប ដែលក្នុងនោះមានជនជាតិកូរ៉េ៧រូប ជនជាតិចិន៥រូប ជនជាតិអាមេរិក២រូប ជនជាតិជប៉ុន (សញ្ជាតិអាមេរិក) ១រូប ជនជាតិមីយ៉ាន់ម៉ា (សញ្ជាតិវ៉ានូទូ) ១រូប ជនជាតិចិនតៃវ៉ាន់១រូប និងជនជាតិឥណ្ឌា១រូប។ ក្នុងចំណោមជនបរទេសទាំង១៨រូប ដែលទទួលបានសញ្ជាតិខ្មែរនេះ មាន៦រូបបានប្តូរឈ្មោះរបស់ខ្លួន។
សៀវភៅរាជកិច្ចលេខ៥៧នេះ ក៏និយាយផងដែរ អំពីការលើកលែងទោសដល់លោក គង់ ម៉ាស់ អតីតសកម្មជនគណបក្សសង្គ្រោះជាតិដែលត្រូវបានសាលាដំបូងរាជធានីភ្នំពេញផ្តន្ទាទោសឱ្យជាប់ពន្ធនាគាររយៈពេល៥ឆ្នាំ កាលពីថ្ងៃទី២២ ខែធ្នូ ឆ្នាំ២០២២។ លោក គង់ ម៉ាស់ ស្ថិតក្នុងចំណោមអតីតសកម្មជនគណបក្សសង្គ្រោះជាតិជាង ៣០នាក់ ដែលត្រូវបានកាត់ទោសឱ្យជាប់ពន្ធនាគារចន្លោះពី៥ឆ្នាំដល់៧ឆ្នាំ ពីបទរួមគំនិតក្បត់ ដោយសារតែការបង្ហោះសារតាមហ្វេសប៊ុក និងការសន្ទនាតាមទូរស័ព្ទ ពាក់ព័ន្ធនឹងការព្យាយាមធ្វើមាតុភូមិនិវត្តន៍មកប្រទេសកម្ពុជាវិញរបស់លោកស្រី មូរ សុខហួរ និងអតីតថ្នាក់ដឹកនាំគណបក្សសង្គ្រោះជាតិផ្សេងទៀត កាលពីខែមករា ឆ្នាំ២០២១ ដើម្បីចូលរួមតតាំងក្នុងសវនាការ។
លោក គង់ ម៉ាស់ ត្រូវបានគណៈអចិន្ត្រៃយ៍គណៈកម្មាធិការគណបក្សខេត្តរបស់គណបក្សប្រជាជនកម្ពុជាប្រចាំខេត្តស្វាយរៀង សម្រេចតែងតាំងជាប្រធានសាខាបក្សរបស់គណបក្សប្រជាជនកម្ពុជា កាលពីថ្ងៃទី៣០ ខែឧសភា ឆ្នាំ២០២៣ បន្ទាប់ពីលោកធ្វើលិខិតស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជាកាលពីថ្ងៃទី១០ ខែឧសភា ឆ្នាំ២០២៣។
សៀវភៅរាជកិច្ចលេខ៥៧នេះដែរ ក៏មាននិយាយអំពីការបំពាក់មេដាយការងារតាមលំដាប់ថ្នាក់ដល់នាយនគរបាល និងមន្ត្រីនគរបាលជាតិចំនួន ៤៣៦រូប ដែលមានស្នាដៃល្អក្នុងកិច្ចសហប្រតិបត្តិការការពារសន្តិសុខ សណ្តាប់ធ្នាប់សាធារណៈ សុវត្ថិភាព និងស្ថិរភាពសង្គម។ នៅក្នុងចំណោមមន្ត្រីទាំង ៤៣៦រូបនេះ អ្នកទទួលបានមេដាយមាសការងារមាន ១៣៧រូប មេដាយប្រាក់ការងារមាន១៧០រូប និងអ្នកទទួលបានមេដាយសំរឹទ្ធការងារមាន១២៩រូប។ ក្រៅពីនេះក៏មាននិយាយអំពីការតែងតាំងជាទីប្រឹក្សា និងមន្ត្រីរាជការមួយចំនួននៅតាមស្ថាប័នផ្សេងៗ។
លើសពីនេះ ក៏មានឯកសារមួយចំនួនទៀត និយាយអំពីការអនុញ្ញាតបើកអាជីវកម្ម ដូចជាការបង្កើតរោងចក្រ ដែលក្នុងនោះមានរោងចក្រកាត់ដេរសម្លៀកបំពាក់ចំនួន៣ រោងចក្រផលិតកាបូប និងថង់យួរគ្រប់ប្រភេទចំនួន១ រោងចក្រកែច្នៃស្បែកចំនួន១ និងការអនុញ្ញាតដំណើរការស្ថានីយប្រេងឥន្ធនៈចំនួន៤កន្លែងផងដែរ៕