យ៉ាងហោចណាស់ មានមន្ត្រីនគរបាលជាតិជិត ២០រូប ត្រូវបានបន្ថយ ដកហូតឋានន្តរស័ក្តិ និងបណ្តេញចញពីមុខតំណែងនៅដើមខែមករានេះ ក្រោមហេតុផល ល្មើសវិន័យរបស់កងកម្លាំងនគរបាលជាតិនិងពាក់ព័ន្ធបទល្មើសផ្សេងទៀត។
យ៉ាងហោចណាស់ មន្ត្រីនគរបាលសរុប ១៩រូប ត្រូវបានបន្ថយ ដកហូត ឋានន្តរស័ក្តិ ដកហូតមុខតំណែង និងបណ្តេញចេញពីក្របខណ្ឌមន្ត្រីនគរបាលជាតិជាបន្តបន្ទាប់ ក្រោមហេតុផលល្មើសវិន័យ នេះបើយោងតាមសេចក្តីរាយការណ៍របស់បណ្តាញព័ត៌មានក្នុងស្រុក Cambodia Express News កាលពីសប្តាហ៍កន្លងទៅ។
យោងតាមព្រះរាជក្រឹត្យដែលចុះកាលបរិច្ឆេទកាលពីថ្ងៃទី៥ ខែមករា ឆ្នាំ២០២៤ បានឱ្យដឹងថា មន្ត្រីនគរបាលជាតិថ្នាក់ឧត្តមសេនីយ៍ចំនួន ០៤រូប រួមមាន ឧត្តមសេនីយ៍ទោ ទូច យុទ្ធា ឧត្តមសេនីយ៍ត្រី តាំង គង់ ឧត្តមសេនីយ៍ត្រី ជូ ផល្លីឌីន និងឧត្តមសេនីយ៍ត្រី ខៃ វណ្ណៈ ត្រូវបានព្រះមហាក្សត្រត្រាស់បង្គាប់បន្ថយ និងដកឋានន្តរស័ក្តិនាយនគរបាលថ្នាក់ឧត្តមសេនីយ៍ឱ្យមកនៅត្រឹមថ្នាក់ពលបាលត្រី ក្របខណ្ឌមន្ត្រីនគរបាលជាតិកម្ពុជា។
តាមរយៈព្រះរាជក្រឹត្យដាច់ដោយឡែកមួយទៀត ព្រះមហាក្សត្រ ក៏បានត្រាស់បង្គាប់បន្ថយ និងដកហូតឋានន្តរស័ក្តិពីឧត្តមសេនីយ៍ត្រី កែវ រ័ត្នមុនី ជានាយនគរបាលថ្នាក់ឧត្តមសេនីយ៍ឱ្យមកនៅត្រឹមថ្នាក់ពលបាលត្រីផងដែរ។ ព្រះរាជក្រឹត្យទាំងពីរនេះ មិនបានបញ្ជាក់ពីមូលហេតុនៃការបន្ថយ និងដកហូតឋានន្តរស័ក្តិមន្ត្រីនគរបាលជាតិទាំង ៥រូបនេះទេ។ លោក កែវ រ័ត្នមុនី ធ្លាប់រងបណ្តឹងពីបទឆបោក និងត្រូវបានអយ្យការអមសាលាដំបូងរាជធានីភ្នំពេញ កោះហៅមកសាកសួរ នេះបើយោងតាមសេចក្តីរាយការណ៍របស់បណ្តាញព័ត៌មានក្នុងស្រុក។
ដោយឡែក ក្រសួងមហាផ្ទៃ ក៏បានចេញប្រកាសដាច់ដោយឡែកពីគ្នាចំនួន០៣ ដែលមានចុះកាលបរិច្ចេទថ្ងៃទី០៣ ខែមករា ឆ្នាំ២០២៤ ដូចគ្នា ក្នុងនោះ មន្ត្រីនគរបាលជាតិថ្នាក់វរសេនីយ៍ទោចំនួន ២រូប គឺវរសេនីយ៍ទោ ហម សុវណ្ណរិទ្ធ ជាស្នងការរង នៃស្នងការដ្ឋាននគរបាលខេត្តព្រះសីហនុ និងវរសេនីយ៍ទោ សោម សុថារ័ត្ន ជាអធិការរងនគរបាលខណ្ឌជ្រោយចង្វារ នៃស្នងការដ្ឋាននគរបាលរាជធានីភ្នំពេញ ត្រូវបានដកហូតមុខតំណែង ឱ្យមកជាមន្ត្រី និងបន្ថយឋានន្តរស័ក្តិចំនួន០១ថ្នាក់ ឱ្យមកនៅត្រឹមថ្នាក់ វរសេនីយ៍ត្រីដូចគ្នា ដោយមូលហេតុល្មើសវិន័យរបស់កងកម្លាំងនគរបាលជាតិ។
ឯកសារដដែល បញ្ជាក់បន្ថែមថា ត្រូវបានផ្ទេរភារកិច្ចដោយបង្ខំចំពោះវរសនីយ៍ត្រី ហម សុវណ្ណរិទ្ធ នៃស្នងការដ្ឋាននគរបាលខេត្តព្រះសីហនុ ឱ្យទៅបម្រើការងារនៅអង្គភាពអន្តរាគមន៍ នៃអគ្គស្នងការដ្ឋាននគរបាលជាតិ។
បើយោងតាមប្រកាសដាច់ដោយឡែកមួយទៀត បានបង្ហាញថា មន្ត្រីនគរបាលជាតិចាប់ពីថ្នាក់ព្រិន្ទបាលទោដល់ថ្នាក់វរសេនីយ៍ទោសរុប ១២រូប នៃស្នងការដ្ឋាននគរបាលរាជធានីភ្នំពេញ ត្រូវបានដកហូតមុខតំណែង ឋានន្តរស័ក្តិ និងបណ្តេញចេញពីក្របខណ្ឌមន្ត្រីនគរបាលជាតិ ដោយមូលហេតុល្មើសវិន័យរបស់កងកម្លាំងនគរបាលជាតិ។
នៅក្នុងចំណោមមន្ត្រីនគរបាលជាតិចំនួន ១២រូបនេះ មានថ្នាក់វរសេនីយ៍ទោចំនួន០១រូប វរសេនីយ៍ត្រី០១រូប អនុសេនីយ៍ឯក០៦រូប អនុសេនីយ៍ទោ០២រូប ព្រិន្ទបាលឯក០១រូប និងព្រិន្ទបាលទោ០១រូប។ មន្ត្រីទាំង១២រូបនេះ មកពីអង្គភាពផ្សេងៗគ្នា ដែលក្នុងនោះមានវរសេនីយ៍ទោ ស ពិសិដ្ឋ នាយរងការិយាល័យប្រឆាំងការជួញដូរមនុស្ស និងការពារអនីតិជនផងដែរ៕
