ក្រសួងមហាផ្ទៃ សម្រេចបណ្តេញមន្ត្រីនគរបាលមួយរូបទៀត នៃស្នងការដ្ឋាននគរបាលខេត្តព្រៃវែង ចេញពីក្របខ័ណ្ឌមន្ត្រីនគរបាលជាតិ ដោយសារល្មើសវិន័យរបស់កងកម្លាំងនគរបាលជាតិ។
យោងតាមប្រកាសរបស់ក្រសួងមហាផ្ទៃ ចុះកាលបរិច្ឆេទថ្ងៃទី៥ ខែមករា ឆ្នាំ២០២៤ បានឱ្យដឹងថា លោក ស សុខា រដ្ឋមន្ត្រីក្រសួងមហាផ្ទៃ បានសម្រេចអនុវត្តវិន័យចំពោះអនុសេនីយ៍ឯក ណាត រតនា មន្ត្រី នៃអធិការដ្ឋាននគរបាលស្រុកកញ្ចៀច នៃស្នងការដ្ឋាននគរបាលខេត្តព្រៃវែង ចំណុះអគ្គស្នងការដ្ឋាននគរបាលជាតិ តាមរូបភាពដកហូតឋានន្តរស័ក្តិ និងបណ្តេញចេញពីក្របខ័ណ្ឌមន្ត្រីនគរបាលជាតិ ដោយមូលហេតុ ល្មើសវិន័យរបស់កងកម្លាំងនគរបាលជាតិ។
ទោះបីជាយ៉ាងណា ប្រកាសនេះមិនបានបញ្ជាក់ថា លោក ណាត រតនា បានល្មើសវិន័យដោយសារការប្រព្រឹត្តអ្វីនោះទេ។
ប្រកាសដដែលបន្ថែមថា ប្រាក់បៀវត្ស និងរបបឧបត្ថម្ភផ្សេងៗត្រូវបានកាត់ផ្តាច់ និងលុបចេញពីក្របខ័ណ្ឌមន្ត្រីនគរបាលជាតិ ចាប់ពីខែមេសា ឆ្នាំ២០២៤ តទៅ។
កាលពីថ្ងៃទី១០ ខែមករា ឆ្នាំ២០២៤ ក្រសួងមហាផ្ទៃ សម្រេចលុបឈ្មោះមន្ត្រីពន្ធនាគារ ៥រូប ចំណុះអគ្គនាយកដ្ឋានពន្ធនាគារ ចេញពីក្របខ័ណ្ឌមន្ត្រីពន្ធនាគារ ក្រសួងមហាផ្ទៃ ដោយសារប្រើប្រាស់សារធាតុញៀន។
គិតចាប់ពីចុងខែធ្នូរហូតមកដល់ពេលនេះ មានមន្ត្រីនគរបាលប្រមាណជាង ៣០រូប ត្រូវបានបន្ថយ ដកហូតឋានន្តរស័ក្តិ ដកហូតមុខតំណែង និងបណ្តេញចេញពីក្របខ័ណ្ឌនគរបាលជាតិ ដែលក្នុងនោះមានមន្ត្រីមួយចំនួនពាក់ព័ន្ធនឹងការប្រើប្រាស់គ្រឿងញៀនផងដែរ ខណៈមន្ត្រី ៥០រូបផ្សេងទៀត ត្រូវបានផ្ទេរទៅកាន់នាយកដ្ឋាន ឬអង្គភាពផ្សេង ក្រោមហេតុផលល្មើសវិន័យកងកម្លាំងនគរបាលជាតិ៕
