ស្នងការរងនគរបាលខេត្តព្រះសីហនុម្នាក់ត្រូវបានដកហូតឋានន្តរស័ក្តិ ខណៈមន្ត្រីពន្ធនាគារចំនួន៥រូប ត្រូវបានលុបឈ្មោះចេញពីក្របខ័ណ្ឌ មន្ត្រីពន្ធនាគារ ដោយសារប្រើប្រាស់សារធាតុញៀន។
យោងតាមអនុក្រឹត្យចុះកាលបរិច្ឆេទថ្ងៃទី៨ ខែមករា ឆ្នាំ២០២៤ និងផ្សព្វផ្សាយនៅលើបណ្តាញព័ត៌មានក្នុងស្រុកកាលពីថ្ងៃទី១៩ ខែមករានេះបានឲ្យដឹងថា លោកនាយករដ្ឋមន្ត្រី ហ៊ុន ម៉ាណែត បានសម្រេចដកហូតឋានន្តរស័ក្តិថ្នាក់ វរសេនីយ៍ឯកពីវរសេនីយ៍ឯក សុខ សុភាព ជានាយនគរបាលជាន់ខ្ពស់ ក្របខ័ណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃ ប៉ុន្តែមិនបានបញ្ជាក់ពីមូលហេតុនៃការដក ហូតឋានន្តរស័ក្តិនេះទេ។ តាមសេចក្តីរាយការណ៍របស់បណ្តាញសារព័ត៌ CAMBODIA EXPRESS NEWS បានបញ្ជាក់ថា លោក សុខ សុភាព គឺជាស្នងការរងខេត្តព្រះសីហនុ។
កាលពីថ្ងៃទី០៣ ខែមករា ក្រសួងមហាផ្ទៃបានចេញប្រកាសមួយដកហូតមុខតំណែងស្នងការរងនគរបាលខេត្តព្រះសីហនុម្នាក់រួចមកហើយ គឺលោកវរសេនីយ៍ទោ ហម សុវណ្ណរិទ្ធ ឲ្យមកជាមន្ត្រី និងបន្ថយឋានន្តរស័ក្តិចំនួន០១ថ្នាក់ឲ្យមកត្រឹមថ្នាក់វរសេនីយ៍ត្រី ដោយសារល្មើសវិន័យរបស់កងកម្លាំងនគរបាលជាតិ។
នៅក្នុងប្រកាសដាច់ដោយឡែកមួយចុះកាលបរិច្ឆេទថ្ងៃទី១០ ខែមករា ឆ្នាំ២០២៤ ក្រសួងមហាផ្ទៃសម្រេចលុបឈ្មោះមន្ត្រីពន្ធនាគារ ៥រូប ចំណុះអគ្គនា យកដ្ឋានពន្ធនា គារ ចេញពីក្របខ័ណ្ឌមន្ត្រីពន្ធនាគារ ក្រសួងមហាផ្ទៃ ដោយសារប្រើប្រាស់សារធាតុញៀន។
ឯកសារដដែល បញ្ជាក់ថា មន្ត្រីពន្ធនាគារទាំង៥រូបនេះ រួមមានឈ្មោះ ១ លោក ផុន វណ្ណៈ អនុប្រធានការិយាល័យសន្តិសុខពន្ធនាគារ នៃមណ្ឌលអប់រំកែប្រែទី១ ២ លោក ហូ សុជាតិ មន្ត្រីនៃមណ្ឌលអប់រំកែប្រែទី១ ៣ លោក គន់ ដារ៉ា មន្ត្រីពន្ធនាគារខេត្តកណ្តាល ៤ លោក កេង ស៊ីឌុន មន្ត្រីនៃពន្ធនាគារខេត្តកណ្តាល ៥ លោក ខ្ចៅ សិរីរ័ត្ន មន្ត្រីពន្ធនាគារខេត្តបន្ទាយមានជ័យ។
គិតចាប់ពីចុងខែធ្នូរហូតមកដល់ពេលនេះ មានមន្ត្រីនគរបាលប្រមាណជាង ៣០រូប ត្រូវបានបន្ថយ ដកហូតឋានន្តរស័ក្តិ ដកហូតមុខតំណែង និងបណ្តេញចេញពីក្របខ័ណ្ឌនគរបាលជាតិ ខណៈមន្ត្រី ៥០រូបផ្សេងទៀត ត្រូវបានផ្ទេរភារកិច្ចពីលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ទៅកាន់នាយកដ្ឋាន ឬអង្គភាពផ្សេង ក្រោមហេតុផលល្មើសវិន័យរបស់កងកម្លាំងនគរបាលជាតិ។
លោកនាយករដ្ឋមន្ត្រី ហ៊ុន ម៉ាណែត ធ្លាប់បានព្រមានមន្ត្រី និងកងកម្លាំងប្រដាប់អាវុធរូបណា ដែលពាក់ព័ន្ធនឹងគ្រឿងញៀន នឹងត្រូវបណ្តេញចេញពីក្របខ័ណ្ឌភ្លាមៗ ហើយថា ការបោសសម្អាតគ្រឿងញៀននៅក្នុងជួរកងកម្លាំងប្រដាប់អាវុធ នឹងត្រូវអនុវត្តមុនគេ យោងទៅតាមការចុះផ្សាយរបស់ វិទ្យុបារាំង RFI កាលពីខែមុន៕