រដ្ឋាភិបាលធ្វើអនុបយោគផ្ទៃដីសាធារណៈរបស់រដ្ឋទំហំជិត ៨០០ហិកតា នៅខេត្តព្រះសីហនុ ដើម្បីបែងចែកនិងផ្តល់ជូនក្រុមហ៊ុនឯកជនធ្វើការអភវិឌ្ឍន៍សណ្ឋាគារ អាគារស្នាក់នៅរួម ផ្សារទំនើប និងមជ្ឈមណ្ឌលពាណិជ្ជកម្ម។
យោងតាមអនុក្រឹត្យលេខ១៣៧អនគ្រ.បក ចុះថ្ងៃទី២៣ ខែមិថុនា ឆ្នាំ២០២៣ នៅក្នុងសៀវភៅរាជកិច្ចលេខ៦៧ បានឱ្យដឹងថា រដ្ឋាភិបាលបានសម្រេចធ្វើអនុបយោគផ្ទៃដីទំហំ ៧៩៩ហិកតា ស្ថិតនៅឃុំទំនប់រលក ស្រុកស្ទឹងហាវ ខេត្តព្រះសីហនុ ជាដីឯកជនរបស់រដ្ឋ។
នៅក្នុងអនុក្រឹត្យដដែលនេះ រដ្ឋាភិបាលបានសម្រេចបែងចែកដីខាងលើនេះ ជាពីរផ្នែក គឺទី១ ផ្ទៃដីចំនួន ២០ភាគរយ ស្មើនឹងទំហំ ១៥៩ ហិកតា ៨០អា ត្រូវបានប្រគល់ជូនរដ្ឋបាលខេត្តព្រះសីហនុ និងទី២ ផ្ទៃដីចំនួន ៨០ភាគរយ ស្មើនឹងទំហំ៦៣៩ហិកតា ២០អា ត្រូវផ្តល់ជាកម្មសិទ្ធិឯកជនជូនក្រុមហ៊ុន C99 International Investment (Cambodia) Co., Ltd សម្រាប់អភិវឌ្ឍន៍ជាសណ្ឋាគារ វីឡាទំនើប អគារស្នាក់នៅរួម ផ្សារទំនើប ភោជនីយដ្ឋាន មជ្ឍមណ្ឌលពាណិជ្ជកម្ម តំបន់សេវាកម្មនានា និងឃ្លាំងដាក់សម្ភារៈ។
យោងតាមក្រសួងពាណិជ្ជកម្ម បានឱ្យដឹងថា ក្រុមហ៊ុន C99 international Investment Co.,LTD បានចុះបញ្ជីនៅក្រសួងពាណិជ្ជកម្ម កាលពីថ្ងៃទី២៨ ខែមីនា ឆ្នាំ២០២៣ ជាក្រុមហ៊ុនអចលនទ្រព្យ ដោយមានឈ្មោះ លូ សា (Luo Sa) ជាប្រធានក្រុមប្រឹក្សាភិបាល។
គួររំលឹកថា យោងតាមអនុក្រឹត្យចុះថ្ងៃទី៧ ខែកក្កដា ឆ្នាំ២០២៣ នៅក្នុងសៀវភៅ រាជកិច្ចលេខ៧០ រដ្ឋាភិបាលបានកាត់ឆ្វៀលដីចំនួន ៤៨៦ហិកតា នៅឃុំអូរត្រេះ ស្រុកស្ទឹងហាវ ខេត្តព្រះសីហនុ ប្រគល់ជាកម្មសិទ្ធិជូនក្រុមហ៊ុន ប៊ូយ៉ុងខ្មែរ II ខូអិលធីឌី ដែលជាបុត្រសម្ព័ន្ធរបស់ក្រុមហ៊ុន BOOYOUNG GROUP របស់សាធារណរដ្ឋកូរ៉េ៕
