រដ្ឋាភិបាលចេញអនុក្រឹត្យកាត់យកឃុំរុនតាឯក ជាកន្លែងតាំងទីលំនៅថ្មីសម្រាប់ ប្រជាពលរដ្ឋរាប់ពាន់គ្រួសារដែលត្រូវបានបណ្តេញចេញពីតំបន់អង្គរ ដើម្បីបង្កើតជាក្រុងថ្មីមួយ។
យោងតាមអនុក្រឹត្យលេខ ០៧ អនក្រ.បក ចុះថ្ងៃទី១១ ខែមករា ឆ្នាំ២០២៤ រដ្ឋាភិបាលបានសម្រេចបង្កើតក្រុងថ្មីមួយឈ្មោះ “ក្រុងរុនតាឯកតេជោសែន” ដោយកាត់យកឃុំចំនួន២ គឺឃុំរុនតាឯក ពីស្រុកបន្ទាយស្រី និងឃុំបល្ល័ង្កពីស្រុកប្រាសាទបាគង នៃខេត្តសៀមរាប។
អនុក្រឹត្យដដែល បញ្ជាក់ថា ក្រុងថ្មីនេះ មានសង្កាត់ចំនួន២ គឺសង្កាត់រុនតាឯក និងសង្កាត់បល្ល័ង្ក ចំណែកទីតាំងរដ្ឋបាល ក្រុងរុនតាឯកតេជោសែន ត្រូវស្ថិតនៅសង្កាត់រុនតាឯក ហើយការបង្កើតក្រុងរុនតាឯកតេជោសែន ត្រូវចូលជាធរមានសម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤។
កន្លងមក មានការរិះគន់ច្រើនពីអង្គការជាតិ និងអន្តរជាតិ លើរដ្ឋាភិបាលជុំវិញការបណ្តេញចេញប្រជាពលរដ្ឋពីតំបន់អង្គរឱ្យមកតាំងទីលំនៅថ្មីនៅតំបន់រុនតាឯក ដោយពួកគេចោទថា ប្រជាពលរដ្ឋនៅតំបន់អង្គរ ត្រូវបានបង្ខំឱ្យផ្លាស់ទីលំនៅទៅកាន់តំបន់រុនតាឯក ដែលខ្វះខាតហេដ្ឋារចនាសម្ព័ន្ធចាំបាច់ ទឹកស្អាត ប៉ុន្តែរដ្ឋាភិបាលបានអះអាងម្តងហើយម្តងទៀតថា ការតាំងទីលំនៅថ្មី ទាំងនេះធ្វើឡើងដោយការស្ម័គ្រចិត្ត។
ប្រជាពលរដ្ឋចំនួន ៩ ០០០គ្រួសារ ត្រូវបានផ្លាស់ប្តូរទីលំនៅទៅតំបន់រុនតាឯក និង ទីតាំងផ្លាស់ទីលំនៅទីពីរ គឺស្ថិតនៅឃុំពាក់ស្នែង នេះបើតាមសេចក្តីរាយការណ៍របស់សារព័ត៌មានខេមបូចា៕
