រដ្ឋាភិបាលធ្វើអនុបយោគដីឧទ្យានជាតិសំខាន់ៗ២កន្លែង សម្រាប់គម្រោងអភិវឌ្ឍន៍របស់ក្រុមហ៊ុនចំនួន១៤

១៨ ធ្នូ ២០២៣

រដ្ឋាភិបាលធ្វើអនុបយោគដីសាធារណៈរបស់រដ្ឋ មកជាដីឯកជនរបស់រដ្ឋលើផ្ទៃដីសរុបជិត ៣ ០០០ ហិកតា នៃឧទ្យានជាតិពីរកន្លែងផ្សេងគ្នា ដើម្បីជួលឱ្យគម្រោងអភិវឌ្ឍន៍របស់ក្រុមហ៊ុនឯកជនចំនួន១៤ ក្នុងរយៈពេលវែង៥០ឆ្នាំ។

យោងតាមអនុក្រឹត្យពីរដាច់ដោយឡែកពីគ្នា នៃសៀវភៅរាជកិច្ចលេខ៩២ និងចេញផ្សាយដោយទីស្តីការគណៈរដ្ឋមន្ត្រីកាលពីថ្ងៃទី៥ ខែធ្នូ ឆ្នាំ២០២៣ បានឱ្យដឹងថា រដ្ឋាភិបាលសម្រេចធ្វើអនុបយោគដីសាធារណៈរបស់រដ្ឋនៅឧទ្យានជាតិពីរកន្លែងមកជាដីឯកជនរបស់រដ្ឋ ដែលក្នុងនោះផ្ទៃដីទំហំ ៨៥,៧២ ហិកតាស្ថិតនៅតំបន់ប្រើប្រាស់ដោយចីរភាពនៃឧទ្យានជាតិព្រះសុរាម្រិតកុសមៈ “គិរីរម្យ” ស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងផ្ទៃដីសរុបប្រមាណជា ២ ៧៧៩ហិកតា ទៀត ស្ថិតនៅតំបន់ប្រើប្រាស់ដោយចីរភាព នៃឧទ្យានជាតិសមុទ្រព្រះសីហនុរាមស្ថិតនៅស្រុកព្រៃនប់ ខេត្តព្រះសីហនុ។

យោងតាមឯកសារដដែល បានឱ្យដឹងថា ការធ្វើអនុបយោគលើដីទាំងនេះ គឺសម្រាប់គម្រោងវិនិយោគអភិវឌ្ឍន៍របស់ក្រុមហ៊ុនឯកជនចំនួន១៤ ក្រោមលក្ខខណ្ឌចុះកិច្ចសន្យាជួលរយៈពេលវែង៥០ឆ្នាំ។

អនុក្រឹត្យទាំងពីរដែលចុះកាលបរិច្ឆេទ កាលពីថ្ងៃទី៩ ខែសីហា ឆ្នាំ២០២៣ ដូចគ្នា បានបង្ហាញថា រដ្ឋាភិបាលបានផ្តល់ដីទំហំ ៨៥,៧២ ហិកតា ស្ថិតក្នុងឃុំត្រែងត្រយឹង ស្រុកភ្នំស្រួច សម្រាប់គម្រោងវិនិយោគអភិវឌ្ឍន៍ទេសចរណ៍ផ្សារភ្ជាប់នឹងធម្មជាតិរបស់ក្រុមហ៊ុន ដែន ដី អេកូធួរ ឯ.ក (Den-Dey Ecotour Co.,LTD) ដែលដឹកនាំដោយ លោក ជឹង ធានគាត និង លោក ជឹង ធានសេង ដែលជាសាច់ញាតិរបស់លោកស្រី ជឹង សុភាព អគ្គនាយកក្រុមហ៊ុន ភាពីម៉ិច (Pheapimex)។ លោកស្រី ជឹង សុភាព គឺជាភរិយារបស់លោក ឡៅ ម៉េងឃីន សមាជិកព្រឹទ្ធសភាមកពីគណបក្សប្រជាជនកម្ពុជា។

ដោយឡែកផ្ទៃដី ២ ៧៧៩ហិកតា ត្រូវបានធ្វើអនុបយោគសម្រាប់គម្រោងវិនិយោគអភិវឌ្ឍន៍របស់ក្រុមហ៊ុនចំនួន១៣ ផ្សេងទៀត ដែលក្នុងនោះមានក្រុមហ៊ុន OCIC របស់អ្នកឧកញ៉ា ពុង ឃាវសែ ផងដែរដែលទទួលបានផ្ទៃដីជាង ៣០០ហិកតា។

គួរបញ្ជាក់ផងថា ឧទ្យានជាតិសមុទ្រព្រះសីហនុរាមនេះ មានផ្ទៃសរុបចំនួន ៣៩ ៦៣៤ហិកតា ស្ថិតនៅក្នុងភូមិសាស្ត្រខេត្តព្រះសីហនុ និងខេត្តកំពត ក្នុងនោះផ្ទៃដីមានទំហំ ១៩ ៣៤០ ហិកតា និងផ្ទៃទឹកទំហំ ២០ ៩៨៤ ហិកតា៕

ឈ្មោះក្រុមហ៊ុនដែលទទួលបានសិទ្ធិវិនិយោគ(កំណត់ត្រា)

លេខ	ឈ្មោះក្រុមហ៊ុន	ទំហំដី
1	CELESTIAL STARS LIMITED COMPANY	៤០៩ ហិកតា
2	HTTH ISLAND INVESTMENT CO., LTD	១ ៦៦៨ ហិកតា
3	CAMB-PEK LAND CO.,LTD	១៣៨ ហិកតា
4	OCIC	៣៤៣,៩៣៧៤ ហិកតា
5	WING LUNG INTERNATIONAL INVESTMENT COMPANY LIMITED	៤៩,៥៩៧៨ ហិកតា
6	CPNG INVESTMENT CO., LTD	១៤,៥៩៤៨ ហិកតា
7	TL BEST VIEW CO., LTD	៥,៦៣៨០ ហិកតា
8	CAMLUBE (CAMBODIA) CO., LTD	៧,៧៥៨៩ ហិកតា
9	CHINA PHOENIX PROPERTY CO., LTD	១១០ ហិកតា
10	ANHE REAL ESTATE (CAMBODIA) INVESTMENT DEVELOPMENT CO., LTD	១០,៧២៣៧ ហិកតា
11	GUARDIAN GREEN INVESTMENT CO., LTD	៤,៨៧២៩ ហិកតា
12	GARUDA GREEN INVESTMENT CO., LTD	៩,៤៦០២ ហិកតា
13	KAMPLOK ISLAND RESORT CO., LTD	៧,៤៣៦៩ ហិកតា
14	DEN-DEY ECO-TOUR CO., LTD	៨៥,៧២ ហិកតា