សមាសភាពថ្នាក់ដឹកនាំគណៈកម្មាធិការជាតិរៀបចំការបោះឆ្នោត សម្រាប់អាណត្តិថ្មី ប្រកាសចូលកាន់តំណែងជាផ្លូវការ បន្ទាប់ពីទទួលបានការតែងតាំងពីព្រះមហាក្សត្រ និងការផ្តល់សេចក្តីទុកចិត្តពីរដ្ឋសភាកាលពីថ្ងៃពុធ។
កាលពីព្រឹកថ្ងៃទី១៤ ខែធ្នូ ឆ្នាំ២០២៣ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំពិធីប្រកាសចូលកាន់តំណែង ប្រធាន អនុប្រធាន និងសមាជិក គ.ជ.ប សម្រាប់អាណត្តិថ្មី ចំនួន៩រូប ក្នុងនោះមាន ៤រូប មកពីគណបក្សប្រជាជនកម្ពុជា និង ៤រូបមកពីគណបក្សហ្វ៊ុនស៊ិនប៉ិច និងមួយរូបទៀតមកពីអង្គការក្រៅរដ្ឋាភិបាល។
សមាសភាពប្រធាន អនុប្រធាន និងសមាជិករបស់ គ.ជ.ប ដែលទើបត្រូវបានតែងតាំងថ្មីនេះ មានលោក ប្រាជ្ញ ចន្ទ ជាប្រធាន លោក ជឺ ចំណាន អនុប្រធាន លោក មាន សទិ សមាជិក លោក ឌឹម សុវណ្ណារុំ សមាជិក លោក សោម សូរីដា សមាជិក លោក ហេង ស៊ីឡេង សមាជិក លោក យិច សមិទ្ធិ សមាជិក លោក ហ៊ែល សារ៉ាត់ សមាជិក និងលោក ហង្ស ពុទ្ធា សមាជិក នេះបើយោងតាមព្រះរាជក្រឹត្យដែលចុះកាលបរិច្ឆេទថ្ងៃទី១៣ ខែធ្នូ ឆ្នាំ២០២៣។
កាលពីព្រឹកថ្ងៃពុធ រដ្ឋសភាបានបោះឆ្នោតផ្តល់សេចក្តីទុកចិត្តលើសមាសភាពរបស់ គ.ជ.ប សម្រាប់អាណត្តិថ្មីទាំង៩រូបនេះ ដោយលោក ប្រាជ្ញ ចន្ទ មកពីគណបក្សប្រជាជនបន្តធ្វើជាប្រធាន គ.ជ.ប ចំណែកលោក ជឺ ចំណាន មកពីគណបក្សហ្វ៊ុនស៊ិនប៉ិច គឺជាអនុប្រធាន។
ចំណែកសមាជិក៧រូបផ្សេងទៀតមានលោក មាន សទិ លោក ឌឹម សុវណ្ណារុំ លោក សោម សូរីដា គឺមកពីគណបក្សប្រជាជនកម្ពុជា ខណៈលោក ហេង ស៊ីឡេង លោក យិច សមិទ្ធិ លោក ហ៊ែល សារ៉ាត់ គឺមកពីគណបក្សហ្វ៊ុនស៊ិនប៉ិច ដោយឡែកលោក ហង្ស ពុទ្ធា គឺជាតំណាងមកពីអង្គការក្រៅរដ្ឋាភិបាលតែម្នាក់គត់ ដែលទទួលបានការឯកភាពពីគណបក្សទាំងពីរ៕