រដ្ឋាភិបាលបានកាត់ឆ្វៀលដីព្រៃរបស់រដ្ឋនៅខេត្តព្រះសីហនុទៅឲ្យរដ្ឋមន្ត្រីប្រតិភូអមនាយករដ្ឋមន្ត្រីនិងភរិយារបស់លោកធ្វើជាកម្មសិទ្ធិផ្ទាល់ខ្លួន។
យោងតាមអនុក្រឹត្យចុះថ្ងៃទី៦ ខែមីនា ឆ្នាំ២០២៣ លោក ហ៊ុន សែន ដែលពេលនោះជានាយករដ្ឋមន្ត្រី បានធ្វើអនុបយោគដីព្រៃរដ្ឋទំហំ ១,២ ហិកតា ស្ថិតនៅឃុំកែវផុស ស្រុកស្ទឹងហាវ ទៅជាដីឯកជនរបស់រដ្ឋនិងប្រគល់ជាកម្មសិទ្ធិជូនលោក ស្រ៊ី ថាមរុង្គ និងលោកស្រី ថោង សុជាតា។
លោក ស្រ៊ី ថាមរុង្គ គឺជារដ្ឋមន្ត្រីប្រតិភូមួយរូប ក្នុងចំណោមរដ្ឋមន្ត្រីប្រតិភូចំនួន៣០រូប អមនាយករដ្ឋមន្ត្រីនិងមានភារកិច្ចជួយលោក ហ៊ុន ម៉ាណែត លើកិច្ចការទំនាក់ទំនងអន្តរជាតិ។ លោកក៏ធ្លាប់ជារដ្ឋមន្ត្រីប្រតិភូសម្រាប់លោក ហ៊ុន សែន ឪពុករបស់លោក ហ៊ុន ម៉ាណែត កាលពីអាណត្តិមុនផងដែរ។
លោក ស្រ៊ី ថាមរុង្គ និងលោកស្រី ថោង សុជាតា តែងតែបរិច្ចាគថវិកាជួយដល់កាកបាទក្រហមកម្ពុជា ដែលដឹកនាំដោយលោកជំទាវ ប៊ុន រ៉ានី ជាភរិយារបស់លោក ហ៊ុន សែន នេះបើតាមសេចក្តីរាយការណ៍របស់ប្រព័ន្ធផ្សព្វផ្សាយគាំទ្ររដ្ឋាភិបាល។
ការផ្តល់ដីរដ្ឋនៅតែបន្តធ្វើជាបន្តបន្ទាប់ទៅឱ្យមន្ត្រីរដ្ឋាភិបាល និងក្រុមគ្រួសាររបស់ពួកគេ ដែលក្នុងករណីខ្លះបានបណ្តាលឱ្យមានការបណ្តេញចេញប្រជាពលរដ្ឋដែលរស់នៅក្បែរនោះដោយបង្ខំ។ តំបន់ស្ទឹងហាវធ្លាប់ជាទីតាំងជម្លោះដីធ្លីពីមុន ដែលពាក់ព័ន្ធនឹងលោក ឡៅ ម៉េងឃីន សមាជិកព្រឹទ្ធសភាគណបក្សកាន់អំណាច៕