ជនបរទេសជិត២០០នាក់ដែលមាន២០សញ្ជាតិផ្សេងៗគ្នា ទទួលបានសញ្ជាតិខ្មែរ នេះបើតាមព្រះរាជក្រឹត្យដែលត្រូវបានចេញនៅឆមាសទី២ នៃឆ្នាំ២០២២។ មួយចំនួនក្នុងចំណោមពួកគេទំនងជាបុគ្គល ដែលគេកំពុងតាមរកចាប់ខ្លួនពាក់ព័ន្ធល្មើសនៅបរទេស ហើយដែលបានប្តូរឈ្មោះនៅពេលទទួលបានសញ្ជាតិថ្មី។
យោងតាមសៀវភៅរាជកិច្ចលេខ៤៩ ដល់លេខ៩៦សម្រាប់ឆ្នាំ២០២២ ដែលចេញផ្សាយដោយគេហទំព័រទីស្តីការគណៈរដ្ឋមន្ត្រី ចន្លោះថ្ងៃទី៣១ ខែមករា ដល់ថ្ងៃទី១៣ ខែមិថុនា ព្រះមហាក្សត្របានចេញព្រះរាជក្រឹត្យផ្តល់សញ្ជាតិខ្មែរដល់ជនបរទេសសរុបចំនួន១៩៥នាក់ ដែលមាន២០សញ្ជាតិផ្សេងគ្នា។ យ៉ាងហោចណាស់មាន៨៥នាក់ក្នុងចំណោមពួកគេបានប្តូរដាក់ឈ្មោះខ្មែរ។
ឯកសារដែលបានចុះកាលបរិច្ឆេទថ្ងៃទី២៩ ខែមិថុនា ឆ្នាំ២០២២ ដល់ថ្ងៃទី២២ ខែវិច្ឆិកា ឆ្នាំ២០២២ បានបង្ហាញថា អំឡុងពេល៦ខែ ជនជាតិចិនទទួលបានសញ្ជាតិខ្មែរច្រើនជាងគេ ដែលមានរហូតដល់១០៥នាក់។ ជនជាតិវៀតណាមឈរនៅលេខរៀងទី២ គឺមាន២៥នាក់ ជនជាតិថៃមាន១២នាក់ និងចិនតៃវ៉ាន់មាន១០នាក់។
ក្នុងចំណោមជនជាតិអាស៊ីផ្សេងទៀត ឥណ្ឌូណេស៊ីមាន៧នាក់ ម៉ាឡេស៊ីមាន៦នាក់ ចំណែកសិង្ហបុរី មីយ៉ាន់ម៉ា អ៊ីរ៉ង់ និងអូស្ត្រាលីមានពលរដ្ឋចំនួនពីរនាក់ដូចគ្នាដែលទទួលបានសញ្ជាតិខ្មែរ។
សម្រាប់ជនបរទេសផ្សេងទៀត មានជនជាតិរុស្សី៥នាក់ តួកគីនិងកូរ៉េមាន៤នាក់ ដោយឡែក ជនជាតិអាមេរិកមាន៣នាក់ ហើយស្លូវ៉ាគី ហូឡង់ អង់គ្លេស ដូមីនីកា ស្រីលង្កា និងបារាំងមាន១នាក់ដូចគ្នា ដែលទទួលបានសញ្ជាតិខ្មែរ។
ឯកសារដដែលបានបង្ហាញផងដែរថា មានមនុស្សបីនាក់បានបោះបង់សញ្ជាតិខ្មែររបស់ខ្លួន ដោយម្នាក់ គឺជាជនជាតិកូរ៉េ ពីរនាក់ទៀតគឺជាជនជាតិខ្មែរដែលម្នាក់រស់នៅក្នុងប្រទេសអាល្លឺម៉ង់ និងម្នាក់ទៀតរស់នៅតៃវ៉ាន់។
ក្នុងចំណោមជនបរទេសដែលទទួលបានសញ្ជាតិខ្មែរនោះ មានជនជាតិឥណ្ឌូណេស៊ីឈ្មោះ Andreyanto និង Lauw Swan Hie Samuel ដែលបានប្តូរឈ្មោះទៅជា Anderson William និង Smith Boa។ យោងតាមសេចក្តីរាយការណ៍របស់កាសែត South China Morning Post បានឲ្យដឹងថា ឈ្មោះ Andreyanto និង Lauw Swan Hie Samuel គឺជាផ្នែកមួយនៃក្រុមមនុស្សដែលមានគ្នាយ៉ាងហោចណាស់ប្រាំបួននាក់ ដែលគេតាមរកចាប់ខ្លួនពីបទឆបោកហើយថា អ្នកទាំងពីរបានគេចចេញពីប្រទេសឥណ្ឌូណេស៊ី។
ក្រុមហ៊ុនរបស់ពួកគេដែលមានឈ្មោះ Simbiotik Multitalenta International (Cambodia) បានបង្ហោះវីដេអូយូធូបបង្អួតពីការិយាល័យរបស់ខ្លួននៅអគារកាណាឌីយ៉ានៅរាជធានីភ្នំពេញ។
ក្រុមជនរងគ្រោះចំនួន៥.៥០០នាក់ដោយសារក្រុមហ៊ុន Simbiotik Multitalenta International ដែលគេហៅថា Gempur Net89 បាននិងកំពុងធ្វើការជាមួយក្រុមស៊ើបអង្កេតប៉ូលីសឥណ្ឌូណេស៊ី ដើម្បីរកទ្រព្យសម្បត្តិ ដើម្បីរឹបអូសយកទៅសងជនរងគ្រោះ។
ជនបរទេសផ្សេងទៀត ដែលទទួលបានសញ្ជាតិខ្មែរមានប្តីប្រពន្ធជនជាតិវៀតណាមឈ្មោះ Duong The Cuong ដែលបានប្តូរមកជាឈ្មោះខ្មែរ ថោង ចំរើន និងប្រពន្ធឈ្មោះ Tran Thi Loc ដែលប្តូរឈ្មោះថ្មីមកជា កែវ សារី ហើយអ្នកទាំងពីរ គឺជាឪពុកម្តាយរបស់ឧកញ៉ា ថោង សារ៉ាត់។
លោកឧកញ៉ា ថោង សារ៉ាត់ និងអង្គរក្ស៤នាក់របស់លោក ត្រូវបានសាលាដំបូងរាជធានីភ្នំពេញ កាត់ទោសឲ្យជាប់ពន្ធនាគារអស់មួយជីវិត កាលពីខែមីនា ឆ្នាំ២០១៩ ពីបទឃាតកម្មគិតទុកជាមុន ពាក់ព័ន្ធនឹងការបាញ់សម្លាប់លោកឧកញ៉ា អ៊ឹង ម៉េងជឺ នៅខណ្ឌចំការមន រាជធានីភ្នំពេញ កាលពីឆ្នាំ២០១៤។
ប៉ុន្តែនៅខែវិច្ឆិកា ឆ្នាំ២០២០ សាលាឧទ្ធរណ៍ភ្នំពេញបានសម្រេចដោះលែងជនជាប់ចោទ៤នាក់ គឺលោក ថោង សារ៉ាត់ និងអង្គរក្សឈ្មោះ គួយ ចាន់ថុល មាស សម្បត្តិ និង ឃុន ចិត្រា ឲ្យនៅក្រៅឃុំបណ្តោះអាសន្ន ហើយដាក់ឲ្យស្ថិតក្រោមការត្រួតពិនិត្យតាមផ្លូវតុលាការ។
នៅខែកុម្ភៈ ឆ្នាំ២០២២ តុលាការកំពូលបានទម្លាក់ការចោទប្រកាន់លើអ្នកទាំងបួន។ ចំណែកជនជាប់ចោទម្នាក់ទៀតឈ្មោះ សៀង វាសនា បន្តឃុំខ្លួនក្នុងពន្ធនាគារ៕