លោក ហ៊ុន ម៉ានិត ជាប្អូនប្រុសបង្កើតរបស់លោកនាយករដ្ឋមន្ត្រី ហ៊ុន ម៉ាណែត និងជាកូនប្រុសទី២របស់អតីតនាយករដ្ឋមន្ត្រី ហ៊ុន សែន ត្រូវបានតែងតាំងមុខតំណែងកំពូលនៅក្នុងជួរកងទ័ព ខណៈស្ត្រីអ្នកជំនួញបីរូបត្រូវបានផ្តល់គោរមងារជាឧកញ៉ា នេះបើយោងតាមឯកសារនៅក្នុងសៀវភៅរាជកិច្ចលេខ៣១។
យោងតាមព្រះរាជក្រឹត្យដែលចុះកាលបរិច្ឆេទ ថ្ងៃទី១៧ ខែមីនា ឆ្នាំ២០២៣ នៅក្នុងសៀវភៅរាជកិច្ចលេខ៣១ ត្រីមាសទី២ ឆ្នាំ២០២៣ និងចេញផ្សាយដោយទីស្តីការគណៈរដ្ឋមន្ត្រីកាលពីថ្ងៃទី៧ ខែកញ្ញា ឆ្នាំ២០២៣បានឲ្យដឹងថា លោក ហ៊ុន ម៉ានិត ត្រូវបានតែងតាំងជាមេបញ្ជាការរង បញ្ជាការដ្ឋានកងទ័ពជើងគោក បន្ថែមលើមុខងារបច្ចុប្បន្ន។
លោក ហ៊ុន ម៉ានិត បច្ចុប្បន្នគឺជាសមាជិកនៃខុទ្ទកាល័យនាយករដ្ឋមន្ត្រីនិងមានឋានៈស្មើរដ្ឋមន្ត្រី ហើយលោកក៏មានតួនាទីជាអគ្គនាយក នៃអគ្គនាយកដ្ឋានស្រាវជ្រាវ-ចារកិច្ច នៃក្រសួងការពារជាតិផងដែរ។
នៅក្នុងព្រះរាជក្រឹត្យដាច់ដោយឡែកមួយទៀត ចុះថ្ងៃទី០៤ ខែកុម្ភៈ ឆ្នាំ២០២៣ ដូចគ្នានៅក្នុងសៀវ ភៅរាជកិច្ចដដែលនេះក៏បាននិយាយអំពីការផ្តល់គោរមងារជាឧកញ៉ាដល់ស្ត្រីអ្នកជំនួញបីរូបមានលោកស្រី មាស ម៉ាស៊ី លោកស្រី ឡុង ស្រីផុស និងលោកស្រី សេង សុវីរដ្ឋា។
លោកស្រី សេង សុវីរដ្ឋា ជាពាណិជ្ជករវ័យក្មេងមួយរូប ដែលតែងតែបរិច្ចាគថវិកាជួយការងារសង្គមជាញឹកញាប់។ លោកស្រី សេង សុវីរដ្ឋា គឺជាភរិយារបស់លោកឧត្តមសេនីយ៍ទោ ហេង ឡាលីន មេបញ្ជាការរង នៃកងពលតូចលេខ៧០ ដែលបានរៀបអាពាហ៍ពិពាហ៍ជាមួយគ្នា កាលពីដើមខែមីនា ឆ្នាំ២០១៩ នេះបើយោងតាមគេហទំព័រឧកញ៉ា។ នៅថ្ងៃទី០៤ ខែសីហា ឆ្នាំ២០២៣ កន្លងទៅនេះ លោក ហេង ឡាលីន ត្រូវបានព្រះមហាក្សត្រត្រាស់បង្គាប់តែងតាំងមុខតំណែង ជារដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់។
នៅក្នុងសៀវភៅរាជកិច្ចលេខ៣១នេះ ក៏មាននិយាយអំពីការផ្តល់សញ្ជាតិខ្មែរដល់ជនបរទេសចំនួន៨នាក់ ក្នុងនោះមានជនជាតិតួកគី៤នាក់ ចិន៣នាក់និងម៉ាឡេស៊ីម្នាក់ និងអំពីការតែងតាំងនិងផ្តល់ឋានៈជាទីប្រឹក្សា ការដំឡើងឋានន្តរស័ក្តិ វរសេនីយ៍ឯក ជាកិច្ចបច្ឆាមរណៈនិងការដំឡើងឋានន្តរស័ក្តិដល់នាយទាហាននៃកងយោធពលខេមរភូមិន្ទដែលរបួស-ពិការត្រូវផ្ទេរទៅក្រសួងសង្គមកិច្ច អតីតយុទ្ធជន និងយុវនីតិសម្បទា។
ក្រៅពីនេះ សៀវភៅរាជកិច្ចលេខ៣១នេះក៏និយាយអំពីការបំពាក់មេដាយការងារជូនមន្ត្រីរាជការជិត៤០០នាក់និងការផ្តល់គ្រឿងឥស្សរិយយសដល់សប្បុរសជនដែលក្នុងនោះមានព្រះសង្ឃផងដែរ សរុបចំនួនប្រមាណ២០០អង្គ/នាក់។
ដោយឡែកក្រសួងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានចេញប្រកាស អនុញ្ញាតឱ្យក្រុមហ៊ុនចំនួន០៦ បង្កើតរោងចក្រផលិតបាវស៊ីម៉ងត៍ពីប្លាស្ទិក កាត់ដេរសម្លៀកបំពាក់ រោងចក្រផលិត និងដំឡើងគ្រឿងបង្គុំឧបករណ៍បរិក្ខារចំអិនអាហារ រោងចក្រខារអំបោះគ្រប់ប្រភេទ រោងចក្រផលិតភួយ និងរោងចក្រផលិតផលិតផលពីប្លាស្ទិក និងភេសជ្ជៈ ។ ទន្ទឹមនិងនោះ ក្រសួងរ៉ែ និងថាមពល បានចេញប្រកាសផ្ដល់លិខិតអនុញ្ញាតដំណើរការស្ថានីយប្រេងឥន្ធនៈ ចំនួន៤ និងស្ថានីយរួម ប្រេង និងឧស្ម័នឥន្ធនៈ ចំនួន០១៕