សៀវភៅរាជកិច្ចលេខ៥ ត្រីមាសទី១ ឆ្នាំ២០២៣ មាននិយាយអំពីការផ្តល់ជូនមេដាយកិត្តិយស និងដំឡើងឋានៈថ្មីសម្រាប់ឥស្សរជននយោបាយ និងអ្នកជំនួញលេចធ្លោមួយចំនួន រួមទាំងកូនប្រុសរបស់អតីតនាយករដ្ឋមន្ត្រី ហ៊ុន សែន និងឧកញ៉ាដ៏លេចធ្លោមួយរូបផងដែរ។
សៀវភៅរាជកិច្ចលេខ៥ ត្រូវបានចេញផ្សាយដោយរដ្ឋាភិបាលនៅថ្ងៃទី៣០ ខែមិថុនា ឆ្នាំ២០២៣ ប៉ុន្តែបានបញ្ចូលឯកសារភាគច្រើនដែលត្រូវបានចុះហត្ថលេខាក្នុងឆ្នាំ២០២២ បូករួមជាមួយនឹងឯកសារថ្មីមួយចំនួនតូចនៅឆ្នាំនេះ។
លោក ហ៊ុន ម៉ានិត កូនប្រុសទី២ របស់អតីតនាយករដ្ឋមន្ត្រី ហ៊ុន សែន ត្រូវបានតម្លើងឋានៈក្នុងតួនាទីជាសមាជិកខុទ្ទកាល័យនាយករដ្ឋមន្ត្រី ដោយទទួលបានឋានៈស្មើរដ្ឋមន្ត្រី។ លោក ម៉ានិត គឺជាឧត្តមសេនីយផ្កាយបីក្នុងជួរយោធាកម្ពុជា ហើយលោកក៏ជាអគ្គនាយកនៃអគ្គនាយកដ្ឋានស្រាវជ្រាវចារកិច្ចរបស់ក្រសួងការពារជាតិផងដែរ។
ការតែងតាំងឥស្សរជនលេចធ្លោមួយរូបទៀត គឺលោកឧកញ៉ា លី យ៉ុងផាត់ ឲ្យធ្វើជាទីប្រឹក្សារបស់លោក ហ៊ុន សែន ដែលមានឋានៈស្មើរដ្ឋមន្ត្រី។ លោក លី យ៉ុងផាត់ គឺជាប្រធានក្រុមហ៊ុន LYP Group ហើយដែលជាប់ពាក់ព័ន្ធនឹងជម្លោះដីធ្លីជុំវិញចម្ការអំពៅ និងការកាប់ឈើខុសច្បាប់។ លោកត្រូវបានជ្រើសរើសឲ្យធ្វើជាប្រធានសមាគមឧកញ៉ាកម្ពុជាកាលពីឆ្នាំមុន។
មេដាយកិត្តិយសត្រូវបានផ្តល់ជូនលោក លាង ឃុន អគ្គនាយកក្រុមហ៊ុន ជីប ម៉ុងគ្រុប លោក ផាក ហឿងខ្យង់ (Park Heung-kyeong) អតីតឯកអគ្គរដ្ឋទូតកូរ៉េខាងត្បូង និងឯកអគ្គរដ្ឋទូតជប៉ុនថ្មីៗលោក មីកាមិ ម៉ាសាហ៊ីរ៉ូ (Mikami Masahiro)។ ឯកសារមិនបានបញ្ជាក់ពីមូលហេតុនៃការផ្តល់មេដាយជូនឥស្សរជនទាំងនោះទេ។
ឧកញ៉ាទើបទទួលបានគោរមងារថ្មីចំនួន៤រូប ក៏ត្រូវបានបង្ហាញនៅក្នុងឯកសារនេះដែរ។ ពីរនាក់ក្នុងចំណោមនោះ គឺលោក អ៊ឹង សុងលាភ ដែលជាអ្នកចាត់ការទូទៅនៅផលិតកម្មរស្មីហង្សមាស ដែលជាកម្មសិទ្ធរបស់លោក អ៊ឹង ឆាយងួន ជាឪពុករបស់លោក។ ផលិតកម្មរស្មីហង្សមាសផលិតកម្មផលិតកម្មវិធីទូរទស្សន៍ល្បីៗដូចជា Cambodian Idol ជាដើម។ ឧកញ៉ាម្នាក់ទៀតគឺលោកស្រី ប៊ុន ណាវី ដែលជានាយិកាក្រុមហ៊ុន CPL Cambodia Properties។ ឧកញ៉ាថ្មីពីររូបផ្សេងទៀតមានឈ្មោះ គុជ ច័ន្ទវុធឌី និង ឡាយ លីហួរ៕