គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសលទ្ធផលផ្លូវការមិនដល់ពីរសប្តាហ៍ផង បន្ទាប់ពីការបោះឆ្នោតខែកក្កដា ដោយបើកផ្លូវសម្រាប់ការផ្ទេរអំណាចទៅឱ្យលោក ហ៊ុន ម៉ាណែត ជាកូនប្រុសរបស់លោកនាយករដ្ឋមន្ត្រី ហ៊ុន សែន។
លទ្ធផលបោះឆ្នោតផ្លូវការរបស់ គ.ជ.ប ត្រូវបានផ្សព្វផ្សាយកាលពីថ្ងៃសៅរ៍ ទី៥ ខែសីហា ត្រឹមតែរយៈពេលបួនថ្ងៃបន្ទាប់ពីគណៈកម្មាធិការនេះចេញផ្សាយលទ្ធផលបណ្តោះអាសន្នរបស់ខ្លួនកាលពីថ្ងៃអង្គារ។ គ្មានការរាប់សន្លឹកឆ្នោតណាមួយផ្លាស់ប្តូរនោះទេ ចាប់តាំងពីការប្រកាសលទ្ធផលបណ្ដោះអាសន្ន ដែលអាចធ្វើការតវ៉ាបាន អំឡុងពេល៧២ម៉ោង។
គ.ជ.ប ក៏បានចេញផ្សាយបញ្ជីឈ្មោះផ្លូវការបេក្ខជនតំណាងរាស្រ្តចំនួន១២៥ រូប ផងដែរ ដែលគេរំពឹងថា នឹងស្បថចូលកាន់តំណែងនៅថ្ងៃទី២២ ខែសីហា មុនពេលលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រី។
តាមបញ្ជីឈ្មោះនេះ ចំនួនតំណាងរាស្រ្តជាស្ត្រីបានធ្លាក់ចុះពីចំនួន២៦នាក់ក្នុងអាណត្តិទី៦ មកត្រឹម១៦នាក់សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧នេះ ឬពី២១% មក១៣%។
ក្នុងចំណោមតំណាងរាស្រ្តជាប់ឆ្នោតទាំង១២៥រូប គឺមាន១២០រូបមកពីគណបក្សប្រជាជនកម្ពុជា ដែលកំពុងកាន់អំណាចនិង៥រូបទៀតមកពីគណបក្សរាជានិយម ហ៊្វុនស៊ិនប៉ិច ដូចដែលលទ្ធផលបឋមបានបង្ហាញ។ បើប្រៀបធៀបទៅនឹងបញ្ជីឈ្មោះបេក្ខជនមុនការបោះឆ្នោត មានការផ្លាស់ប្តូរតែមួយរូបប៉ុណ្ណោះ គឺលោក យឹម លាត អាយុ៣៦ឆ្នាំបេក្ខជនលេខរៀងទី៤ មកពីគណបក្សប្រជាជនកម្ពុជាសម្រាប់មណ្ឌលខេត្តកំពង់ធំ ដែលត្រូវបានប្តូរចេញ ដោយអនុញ្ញាតឱ្យបេក្ខជនលេខរៀងទី៦ គឺលោក នង វាសនា ទទួលបានអាសនៈវិញ។
លោក យឹម លាត ដែលត្រូវជាកូនប្រុសរបស់លោកឧបនាយករដ្ឋមន្ត្រី យឹម ឆៃលី ត្រូវបានតែងតាំងជាអគ្គទេសាភិបាលរងធនាគារជាតិជំនួសវិញ។
បើតាមបញ្ជីឈ្មោះរបស់ គ.ជ.ប ដែលរៀបចំតាមលំដាប់អាយុពីខ្ពស់មកទាបបង្ហាញថា លោក ហេង សំរិន ប្រធានរដ្ឋសភាអាណត្តិមុនមានអាយុច្រើនជាងគេគឺ៨៩ឆ្នាំ ចំណែកលោក ញឿន រ៉ាដែន អាយុ៣៧ឆ្នាំ មកពីគណបក្សហ៊្វុនស៊ិនប៉ិច ស្ថិតនៅលេខរៀងទី១២៥។
តំណាងរាស្រ្តជាប់ឆ្នោតទាំងប្រាំរូបរបស់គណបក្សហ៊្វុនស៊ិនប៉ិច មានវ័យស្របាលៗគ្នា រួមទាំងសមាជិកវ័យក្មេងបំផុតពីររូបក្នុងរដ្ឋសភាគឺលោក នាង ចាន់ណាក់ អាយុ៣៩ឆ្នាំ និងលោក ញឿន រ៉ាដែន អាយុ៣៧ឆ្នាំ។
សូម្បីតែព្រះអង្គម្ចាស់ នរោត្តម ចក្រាវុធ ព្រះជន្ម៥៣ព្រះវស្សា ជាតំណាងរាស្រ្តគណបក្សហ៊្វុនស៊ិនប៉ិចដែលមានវ័យចំណាស់ជាងគេនោះ ក៏ស្ថិតនៅលេខរៀងទី១០០ ក្នុងចំណោមសមាជិកសភាទាំង១២៥រូប ពោលគឺតំណាងរាស្រ្តគណបក្សប្រជាជនកម្ពុជាចំនួន៩៩នាក់ដែលមានវ័យចាស់ជាងព្រះអង្គ។
ទោះបីជាយ៉ាងណាក៏ដោយ គ្មានសមាជិកសភាគណបក្សហ៊្វុនស៊ិនប៉ិចណាម្នាក់ក្នុងចំណោមតំណាងរាស្ត្រជាប់ឆ្នោតទាំង៥ គឺជាស្ត្រីនោះទេ។
មូលដ្ឋានទិន្នន័យ Kamnotra បានចងក្រងបញ្ជីឈ្មោះតំណាងរាស្រ្តជាប់ឆ្នោតទាំងស្រុងនៅទីនេះ ដែលកំពុងត្រូវបានធ្វើបច្ចុប្បន្នភាពជាមួយនឹងប្រវត្តិរូបសង្ខេបនិងរូបថត។
ផ្លាស់ប្តូរ
- លោក យឹម លាត អាយុ៣៦ឆ្នាំ ត្រូវបានតែងតាំងជាអគ្គទេសាភិបាលរងធនាគារជាតិ ដោយអនុញ្ញាតឱ្យលោក នង វាសនា អាយុ៤១ឆ្នាំ បេក្ខជនលេខរៀងទី៦ របស់គណបក្សប្រជាជនកម្ពុជា សម្រាប់មណ្ឌលខេត្តកំពង់ធំចូលមករដ្ឋសភាជំនួសលោកវិញ។
សមាជិកសភាមកពីគណបក្សហ៊្វុនស៊ិនប៉ិច
- លោក គង់ បណ្តូល អាយុ៤៧ឆ្នាំ ខេត្តកណ្តាល
- លោក នាង ចាន់ណាក់ អាយុ៣៩ឆ្នាំ ខេត្តកំពង់ធំ
- លោក ញឿន រ៉ាដែន អាយុ៣៧ឆ្នាំ ខេត្តកំពង់ចាម
- ព្រះអង្គម្ចាស់នរោត្តម ចក្រាវុធ ព្រះជន្ម៥៣ព្រះវស្សា រាជធានីភ្នំពេញ (ប្រធានគណបក្ស)
- លោក ភឹម រ៉ុង អាយុ៥២ឆ្នាំ ខេត្តព្រៃវែង