ប្រជាពលរដ្ឋនៅតំបន់ឧទ្យានអង្គរជិះម៉ូតូដេញមន្រ្តីអាជ្ញាធរអប្សរាដែលព្យាយាមរុះរើតង់របស់ពួកគាត់ចេញ នេះបើតាមវីដេអូឃ្លីពបចំនួនពីរ ដែលគេបង្ហោះតាមបណ្តាញសង្គម ចំពេលមាន “ការបណ្តេញចេញដោយបង្ខំទ្រង់ទ្រាយធំ” នៅក្នុងតំបន់ដែលចុះបញ្ជីដោយអង្គការយូណេស្តូ។
វីដេអូឃ្លីបដែលមានរយៈពេលពីរនាទី ដែលគេចែករំលែកនៅលើទំព័រសារព័ត៌មានហ្វេសប៊ុកក្នុងស្រុក ឈ្មោះ ហង្សតូច គេឃើញបុរសម្នាក់ជិះម៉ូតូតាមផ្លូវលំរួមជាមួយនឹងម៉ូតូអ្នកភូមិរាប់សិបគ្រឿងផ្សេងទៀត ដោយរៀបរាប់ថា ប្រជាពលរដ្ឋខឹងសម្បារនឹងមន្រ្តីអាជ្ញាធរអប្សរា។
បុរសនៅក្នុងវីដេអូនេះនិយាយថា មន្រ្តីអាជ្ញាធរអប្សរាបានមកដល់ភូមិ ដែលជាតំបន់ចុះបញ្ជីដោយអង្គការយូណេស្តូ ហើយរុះរើតង់ ដែលប្រជាពលរដ្ឋបាំងការពារទឹកលិចក្នុងរដូវវស្សា។ លោកនិយាយថា បន្ទាប់មក ប្រជាពលរដ្ឋបានប្រមូលផ្តុំគ្នានិងដេញមន្រ្តីទាំងនោះចេញ។ ទំព័រសារព័ត៌មានហ្វេសប៊ុកក្នុងស្រុក ហង្សតូចដដែលបានអះអាងថា ករណីនេះកើតឡើងនៅថ្ងៃទី៨ ខែសីហានេះ ក្នុងឃុំរលួស ស្រុកប្រាសាទបាគង។
នៅក្នុងវីដេអូឃ្លីបមួយផ្សេងទៀតដែលគេចែករំលែកតាមបណ្តាញសង្គម គេឃើញមានប្រជាពលរដ្ឋប្រហែលមួយរយនាក់បានប្រមូលផ្តុំគ្នា។
ស្ត្រីដែលបានថតវីដេអូមានរយៈពេលប្រហែល១៣នាទីបាននិយាយក្នុងវីដេអូនោះថា មន្រ្តីអាជ្ញាធរអប្សរាមករុះរើតង់គ្របពីលើតូបលក់ដូររបស់ពួកគាត់។ ស្ត្រីរូបនោះនិយាយថា អ្នកភូមិមានការខឹងសម្បារ ហើយនាំគ្នាជិះម៉ូតូដេញមន្រ្តីទាំងនោះចេញពីភូមិ។
ប្រជាពលរដ្ឋប្រហែល ១០.០០០គ្រួសារ ដែលរស់នៅជុំវិញតំបន់ឧទ្យានអង្គរបានក្លាយជាគោលដៅក្នុងការបណ្តេញចេញទៅកាន់ទីតាំងថ្មី ហើយមានការរឹតត្បិតក្នុងការកែលម្អររចនាសម្ព័ន្ធដែលមានស្រាប់។ អង្គការលើកលែងទោសអន្តរជាតិបានអំពាវនាវឱ្យបញ្ឈប់ការបណ្តេញចេញ ដែលរដ្ឋាភិបាលហៅថា ជាការចាកចេញដោយស្ម័គ្រចិត្ត។
លោកស្រី Ming Yu Han បានលើកឡើងនៅក្នុងសេចក្តីថ្លែងការណ៍មួយនាពេលថ្មីៗនេះថា “នេះគឺជាការបណ្តេញចេញដោយបង្ខំយ៉ាងពិតប្រាកដនិងធ្វើឡើងជាទ្រង់ទ្រាយធំ។ ប្រជាពលរដ្ឋរងសម្ពាធឲ្យស្ម័គ្រចិត្តនិងធ្វើឲ្យមានអារម្មណ៍ភ័យខ្លាចការសងសឹក ប្រសិនបើពួកគេបដិសេធមិនព្រមចាកចេញ ឬជំទាស់នឹងការបណ្តេញចេញ”។
ជម្លោះជុំវិញឧទ្យានអង្គរស្ថិតក្នុងចំណោមវិវាទដីធ្លីជាង១២០ករណី ដែលត្រូវបានតាមដានដោយKamnotra៕