រដ្ឋាភិបាល កាត់ឆ្វៀលផ្ទៃដីទំហំ ៧៤១ហិកតា ១៧អា ស្ថិតក្នុងភូមិសាស្រ្តស្រុកបរិបូណ៍ ខេត្តកំពង់ឆ្នាំង ចេញពីតំបន់៣ នៃតំបន់ទន្លេសាប ធ្វើអនុបយោគជាដីឯកជនរបស់រដ្ឋ និងចាត់ចែងផ្ដល់ជូនពលរដ្ឋដែលកំពុងរស់នៅលើផ្ទះបណ្ដែតទឹក រដ្ឋបាលខេត្តកំពង់ឆ្នាំងសម្រាប់គម្រោងវារីវប្បកម្ម និងក្រសួងកសិកម្ម រុក្ខាប្រមាញ់ និងនេសាទ។
យោងតាមអនុក្រឹត្យលេខ ០២ អនក្រ.បក ទំព័រ ១២៦៦ ចុះថ្ងែទី១១ ខែមករា ឆ្នាំ២០២៣ ស្ដីពី ការកាត់ឆ្វៀលផ្ទៃដីតំបន់៣ នៃតំបន់ទន្លេសាប ស្ថិតក្នុងភូមិសាស្រ្ដខេត្តកំពង់ឆ្នាំង និងចេញផ្សាយដោយទីស្តីការគណៈរដ្ឋមន្ត្ រីកាលពីថ្ងៃទី១៩ ខែកក្កដា ឆ្នាំ២០២៣ លោកនាយករដ្ឋមន្រ្តី ហ៊ុន សែន បានសម្រេច កាត់ឆ្វៀលផ្ទៃដីទំហំ ៧៤១ ហិកតា ១៧អា ស្ថិតក្នុងភូមិសាស្រ្តស្រុកបរិបូណ៍ ខេត្តកំពង់ឆ្នាំង ចេញពីតំបន់៣ នៃតំបន់ទន្លេសាប ដែលកំណត់ដោយអនុក្រឹត្យលេខ១៩៧ អនក្រ.បក ចុះថ្ងៃទី២៩ ខែសីហា ឆ្នាំ២០១១ ធ្វើអនុបយោគជាដីឯកជនរបស់រដ្ឋ។
អនុក្រឹត្យដដែល បន្តថា ក្នុងចំណោមផ្ទៃដីជាង ៧៤០ហិកតានោះ រដ្ឋាភិបាលបានចាត់ចែងផ្ទៃដីទំហំ ៤៤៣ហិកតា ៦៣អា ដែលជាភូមិរៀបរយទទួលប្រជាពលរដ្ឋផ្លាស់ទីលំនៅពីលើទឹកមកដីគោក ស្ថិតក្នុងភូមិសាស្រ្ត ឃុំកំពង់ព្រះគគីរ ឃុំខុនរ៉ង ឃុំត្រពាំងចាន់ និងឃុំឆ្នុកទ្រូ ប្រទានកម្មជាកម្មសិទ្ធិជូនប្រជាពលរដ្ឋ ដោយប្រជាពលរដ្ឋទាំងនោះមិនត្រូវតាំងទីលំនៅជាថ្មីនៅលើទឹកទៀតឡើយ ខណៈផ្ទៃដីទំហំ ២២២ ហិកតា ៥៤អា ស្ថិតនៅឃុំឆ្នុកទ្រូ ផ្ដល់ជូនរដ្ឋបាលខេត្តកំពង់ឆ្នាំងសម្រាប់គម្រោងវារីប្បកម្ម និងផ្ទៃដីទំហំ ៧៥ហិកតា ស្ថិតនៅឃុំឆ្នុកទ្រូ ផ្ដល់ជូនក្រសួងកសិកម្ម រុក្ខាប្រមាញ់ និងនេសាទ។
គួររំលឹកថា កាលពីចុងខែឧសភា ឆ្នាំ២០២២ លោកនាយករដ្ឋមន្រ្តី ហ៊ុន សែន បានបញ្ជាឱ្យកាត់ឆ្វៀលដីខ្លះចេញពីតំបន់បឹងទន្លេសាបប្រគល់ជូនពលរដ្ឋ ដែលកាន់កាប់យូរមកហើយតាមរយៈយុទ្ធសាស្ត្រស្បែកខ្លា។ បើតាមលោក ហ៊ុន សែន គឺគ្មានឡើយការបណ្តេញចេញពលរដ្ឋដែលកំពុងរស់នៅតំបន់បឹងទន្លេសាប ប៉ុន្តែលោកបានព្រមានទុកជាមុនថា មិនឱ្យមន្ត្រីអាជ្ញាធរឆ្លៀតឱកាសចូលកាន់កាប់តំបន់បឹងទន្លេសាប ដោយជ្រកក្រោមស្លាកប្រជាពលរដ្ឋនោះឡើយ៕