ផ្ទៃដីបឹងតាមោក (បឹងកប់ស្រូវ) ចំនួន ០៣ទីតាំង ដែលមានទំហំជាង ១៣ហិកតា ស្ថិតក្នុងសង្កាត់គោករកា និងសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ត្រូវបានលោកនាយករដ្ឋមន្រ្តី ហ៊ុន សែន កាត់ជូនឧកញ៉ា ឡាញ់ ភារ៉ា ដែលមានទំនាក់ទំនងជិតស្និទ្ធជាមួយប្អូនស្រីរបស់លោកធ្វើជាកម្មសិទ្ធិស្របច្បាប់។
យោងតាមអនុក្រឹត្យលេខ០២ អនក្រ.បក ចុះថ្ងែទី០៤ ខែមករា ឆ្នាំ២០២៣ ស្ដីពី ការកែសម្រួលផ្ទៃដីបឹងតាមោក (បឹងកប់ស្រូវ) ស្ថិតក្នុងរាជធានីភ្នំពេញ (រាជកិច្ចលេខ០១ ទំព័រ២១) លោកនាយករដ្ឋមន្រ្តី ហ៊ុន សែន បានសម្រេចកាត់ផ្ទៃដីចំនួន ០៣ទីតាំង ដែលមានទំហំសរុបចំនួន ១៣៣.៧២៩ ម៉ែត្រការ៉េ ស្ថិតក្នុងសង្កាត់គោករកា និងសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ជាសម្បត្តិសាធារណៈរបស់រដ្ឋ ដើម្បីធ្វើអនុប្រយោគពីទ្រព្យសម្បត្តិសាធារណៈរបស់រដ្ឋ ទៅជាទ្រព្យសម្បត្តិឯកជនរបស់រដ្ឋ ហើយបានធ្វើប្រទានកម្មដីនោះទៅជាកម្មសិទ្ធិរបស់លោកឧកញ៉ា ឡាញ់ ភារ៉ា។
លោកឧកញ៉ា ឡាញ់ ភារ៉ា មានទំនាក់ទំនងជិតស្និទ្ធជាមួយលោកស្រី ហ៊ុន សេងនី ដែលជាប្អូនស្រីរបស់លោកនាយករដ្ឋមន្ត្រី ហ៊ុន សែន។ លោកស្រី ហ៊ុន សេងនី គឺជាអតីតនាយកក្រុមហ៊ុន Ny Ra Ouyang Mining ដែលគ្រប់គ្រងដោយលោកឧកញ៉ា ឡាញ់ ភារ៉ា។ សារព័ត៌មាន ឌឹ ខេមបូឌា ដេលី បានអះអាងថា លោកឧកញ៉ា ឡាញ់ ភារ៉ា គឺជាស្វាមីរបស់លោកស្រី ហ៊ុន សេងនី។ កាលពីខែធ្នូ ឆ្នាំ២០២១ អ្នកទាំងពីរត្រូវបានរដ្ឋាភិបាលផ្តល់ដី៧ទីតាំងនៅតំបន់បឹងតាមោកដែលមានទំហំសរុប ២០៩.៥៣៦ម៉ែត្រក្រឡា។
លោក ឡាញ់ ភារ៉ា ធ្លាប់ជាប់ពាក់ព័ន្ធនឹងជម្លោះដីធ្លីកាលពីឆ្នាំ២០១៩ ជាមួយប្រជាពលរដ្ឋ ៧៧គ្រួសារ នៅឃុំបិតត្រាំង ស្រុកព្រៃនប់ ក្នុងខេត្តព្រះសីហនុ៕
