ធី សុវណ្ណថា អតីតសកម្មជននយោបាយវ័យក្មេងដែលសកម្ម និងលេចធ្លោជាងគេក្នុង ចំណោមយុវជនបក្សប្រឆាំង អំឡុងពេលយុទ្ធនាការឃោសនាបោះឆ្នោតឆ្នាំ២០១៣ត្រូវបាន តែងតាំងជាអភិបាលរងក្រុងអរិយក្សត្រ ខេត្តកណ្ដាល នេះបើយោងតាមឯកសាររបស់រដ្ឋាភិ បាល ដែលបានផ្សព្វផ្សាយនៅលើបណ្តាញព័ត៌មានក្នុងស្រុក។
យោងតាមអនុក្រឹត្យលេខ ១២ អនក្រ.បក ស្ដីពី ការកំណត់ចំនួនគណៈអភិបាលក្រុង ស្រុក ដែលបំបែក និងបង្កើតថ្មី នៃខេត្តកណ្ដាល ខេត្តកំពង់ស្ពឺ និងខេត្តក្រចេះ ចុះថ្ងៃទី០៥ ខែមករា ឆ្នាំ២០២៣ (ទំព័រ៧៧២) រាជរដ្ឋាភិបាលបានកំណត់ឱមានចំនួនគណៈអភិបាលក្រុង ស្រុក ដែលបំបែក និងបង្កើតថ្មី រួមមាន៖ ខេត្តកណ្ដាល (ក្រុង អរិយក្សត្រ មានចំនួនគណៈអភិបាល ៧នាក់ និង ក្រុងសំពៅពូន ៧នាក់) ខេត្តកំពង់ស្ពឺ (ក្រុង ឧដុង្គម៉ែជ័យ មានចំនួនគណៈអភិបាល ៧នាក់ និង ស្រុក សាមគ្គីមុនីជ័យ ៧នាក់) និងខេត្តក្រចេះ ក្រុងអូរគ្រៀងសែនជ័យ មានចំនួនគណៈអភិបាល ៧នាក់ ។
ក្នុងចំណោមគណៈអភិបាលក្រុងអរិយក្សត្រទាំង៧រូប គេឃើញមានឈ្មោះលោកស្រី ធីសុវណ្ណថា ត្រូវបានតែងតាំង ជាអភិបាលរងក្រុងផងដែរ នេះបើយោងតាមប្រកាសលេខ ២៣១៦ប្រក ស្ដីពី ការផ្ទេរភារកិច្ច និងតែងតាំងមន្រ្តីរាជការ ចុះថ្ងៃទី ០៧ ខែមេសា ឆ្នាំ២០២៣ ដែលចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស ខេង ។
មានស្រុកកំណើតនៅខេត្តកំពង់ចាម លោកស្រី ធី សុវណ្ណថា បានចូលប្រឡូកក្នុង សកម្មភាពនយោបាយនៅឆ្នាំ២០១៣ ក្នុងអាយុ១៨ឆ្នាំជាមួយគណបក្សប្រឆាំងហើយលោកស្រី ដែលពេលនោះនៅជាយុវតីនៅឡើយបានអះអាងថា គោលបំណង ដែលលោកស្រីឈានជើង ចូលរួមនយោបាយ ជាមួយគណបក្សប្រឆាំងគឺចង់ឱ្យមានការផ្ដាស់ប្ដូរអ្នកនឹកនាំប្រទេសសព្វថ្ងៃ ។ក្រោយមកលោកស្រីបានប្រកាសចាកចេញពីគណបក្សប្រឆាំងនិងចូលរួមជាមួយគណបក្ស ប្រជាជនកម្ពុជានៅខែឧសភា ឆ្នាំ២០១៧៕