មន្ត្រីរដ្ឋាភិបាលជាន់ខ្ពស់ និងជាអ្នកជំនួញលើវិស័យច្រើនប្រភេទ ត្រូវបានព្រះមហាក្សត្រត្រាស់បង្គាប់តែងតាំង និងផ្តល់ឋានៈជាជំនួយការលោកនាយករដ្ឋមន្ត្រី ហ៊ុន សែន។
យោងតាមព្រះរាជក្រឹត្យចុះថ្ងៃទី២៤ ខែសីហា ឆ្នាំ២០២២ និងចេញផ្សាយនៅលើគេហទំព័ររបស់ទីស្តីការគណៈរដ្ឋមន្ត្រី កាលពីថ្ងៃទី២៤ ខែមេសា ឆ្នាំ២០២៣ ព្រះមហាក្សត្រ បានត្រាស់បង្គាប់តែងតាំង និងផ្តល់ឋានៈដល់លោកស្រី ខា ឡេង ជាជំនួយការរបស់លោកនាយករដ្ឋមន្ត្រី ហ៊ុន សែន មានឋានៈស្មើអនុរដ្ឋលេខាធិការ បន្ថែមលើមុខងារបច្ចុប្បន្ន ដោយពុំទទួលបានប្រាក់បំណាច់មុខងារ។
បច្ចុប្បន្ន លោកស្រី ខា ឡេង គឺជារដ្ឋលេខាធិការក្រសួងពាណិជ្ជកម្ម និងជាប្រធានក្រុមងាររាជរដ្ឋាភិបាលចុះមូលដ្ឋានឃុំសណ្តែក នៅស្រុកបាធាយ ខេត្តកំពង់ចាម។
ក្រៅពីកាន់តួនាទីនៅក្នុងជួររដ្ឋាភិបាល លោកស្រី ខា ឡេង ត្រូវបានគេស្គាល់ថា ជាប្រធានក្រុមប្រឹក្សាភិបាលគ្រឹះស្ថានមីក្រូហិរញ្ញវត្ថុបរិបូរណ៍ ភីអិលស៊ី ដែលបង្កើតឡើងកាលពីឆ្នាំ២០១១។ លោកស្រីក៏ជាអគ្គនាយិការង ក្រុមហ៊ុន អាល់ហ្វា ប្រផឺធី ខនស្ត្រាក់សិន គ្រុប ជាក្រុមហ៊ុនមានបទពិសោធន៍ច្រើនខាងផ្នែកអចលនទ្រព្យ និងសំណង់។
លោកស្រី ខា ឡេង គឺជាភរិយារបស់ឧកញ៉ា លី ឃុនថៃ ដែលជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន ផងដែរ។ លោកឧកញ៉ា លី ឃុនថៃ គឺជាប្រធានក្រុមហ៊ុន អាល់ហ្វា គ្រុប (ALPHA Group) ជាប្រធានក្រុមប្រឹក្សាភិបាលនាគារពាណិជ្ជ អាល់ហ្វា និងជាអនុប្រធានសភាពាណិជ្ជកម្មកម្ពុជាផងដែរ៕
លោកស្រី ខា ឡេង
រដ្ឋលេខាធិការក្រសួងពាណិជ្ជកម្ម
- តែងតាំងៈ ជាជំនួយការរបស់លោកនាយករដ្ឋមន្ត្រី ហ៊ុន
- កាលបរិច្ឆេទៈ ថ្ងៃទី២៤ ខែសីហា ឆ្នាំ២០២២
- សញ្ជាតិ: ខ្មែរ
- ប្រភេទឯកសារ: ព្រះរាជក្រឹត្យ
