លោក លី សាម៉េត ដែលតាមចោទថា បានប្រើឈ្មោះអតីតនាយករដ្ឋមន្ត្រីលោក ហ៊ុន សែន ដើរបោកប្រាស់គេនោះ ត្រូវបានតុលាការសម្រេចឃុំខ្លួននៅពន្ធនាគារព្រៃសកាលពីថ្ងៃអង្គារពីបទឆបោក។
យោងតាមដីកាឃុំខ្លួនរបស់សាលាដំបូងរាជធានីភ្នំពេញចុះថ្ងៃទី៥ ខែវិច្ឆិកា ឆ្នាំ២០២៤បានឱ្យដឹងថា ចៅក្រមស៊ើបសួរ ថោង ផល្លារង្សី បង្គាប់ឱ្យឃុំខ្លួនជនត្រូវចោទឈ្មោះ លី សាម៉េត នៅមណ្ឌលអប់រំកែប្រែទី១ “ម១” ពីបទឆបោក ប្រព្រឹត្តនៅរាជធានីភ្នំពេញ កាលពីខែកញ្ញា ឆ្នាំ២០២២ និងខែតុលា ឆ្នាំ២០២២ តាមបញ្ញត្តិមាត្រា ៣៧៧ និង៣៧៨ នៃក្រមព្រហ្មទណ្ឌ។ លោក លី សាម៉េត ត្រូវបានសមត្ថកិច្ចឃាត់ខ្លួនកាលពីថ្ងៃទី០៤ ខែវិច្ឆិកា ឆ្នាំ២០២៤។
កាលពីថ្ងៃទី៧ ខែតុលា អតីតនាយករដ្ឋមន្ត្រី លោក ហ៊ុន សែន ដែលបច្ចុប្បន្នជាប្រធានព្រឹទ្ធសភា បានទម្លាយពីករណីឆបោកជាច្រើនករណី ដែលប្រព្រឹត្តដោយឈ្មោះ លី សាម៉េត។
លោក ហ៊ុន សែន បានបង្ហោះនៅលើទំព័រហ្វេសប៊ុករបស់លោកថា លោក លី សាម៉េត ហៅគ្រូមា តែងតែប្រើឈ្មោះរបស់លោកដើរបោកប្រាស់គេនិងអះអាងថា ខ្លួនចេញចូលផ្ទះរបស់លោកពេលណាក៏បាន។
លោក ហ៊ុន សែន បានបញ្ជាក់ថា ឆ្នាំ២០២២ លោក លី សាម៉េត បានបោកលុយឈ្មោះ សុខ ឡេង ចំនួន១០លានដុល្លារ ក្រោយមកលោកបានទាមទារឱ្យប្រគល់ទៅឈ្មោះ សុខ ឡេង វិញ ហើយថា ប៉ុន្មានថ្ងៃមុននេះ លោក ហ៊ុន សែន ក៏បានប្រាប់ឱ្យលោក លី សាម៉េត សងប្រាក់វិញទៅលោក មួង ឃីម ចំនួន ២៣ម៉ឺនដុល្លារផងដែរ។
លោក ហ៊ុន សែន ក៏បានទម្លាយផងដែរថា កាលពីថ្ងៃទី៧ ខែតុលា ឆ្នាំ២០២៤នេះ លោកបានទទួលវីដេអូពីលោក កន សុខកាយ អភិបាលស្រុកល្វាឯម ដែលអះអាងថា ខ្លួនបានផ្តល់ប្រាក់ចំនួន ៣០ម៉ឺនដុល្លារទៅលោក លី សាម៉េត ដើម្បីរត់ការឱ្យបានតំណែងជាអភិបាលក្រុងអរិយក្សត្រ។ លោក ហ៊ុន សែន ក៏បានស្នើឱ្យមានវិធានការផ្លូវច្បាប់លើលោក លី សាម៉េត ផងដែរ។
ទាក់ទិននឹងករណីនេះដែរ លោកនាយករដ្ឋមន្ត្រី ហ៊ុន ម៉ាណែត បានចេញអនុក្រឹត្យចុះថ្ងៃទី៨ ខែតុលា ឆ្នាំ២០២៤ បញ្ចប់មុខតំណែងលោក កន សុខកាយ អភិបាល នៃគណៈអភិបាលស្រុកល្វាឯម នៃខេត្តកណ្តាល ដោយសារប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ បន្ទាប់ពីបែកធ្លាយព័ត៌មានថា លោកបានផ្តល់ប្រាក់ ៣០ម៉ឺនដុល្លារទៅលោក លី សាម៉េត ដើម្បីរត់ការបានតំណែងជាអភិបាលក្រុងអរិយក្សត្រ៕
