មានស្ត្រីតែ១៥ភាគរយប៉ុណ្ណោះក្នុងចំណោមមន្ត្រីកំពូលៗនៅតាមក្រ សួង

២៣ សីហា ២០២៣

បណ្តាញសារព័ត៌មានដែលគាំទ្ររដ្ឋាភិបាលបានចេញផ្សាយបញ្ជីឈ្មោះមន្ត្រីនៅតាមក្រសួងនានារបស់រដ្ឋាភិបាលថ្មី ដោយបង្ហាញឲ្យឃើញថា ស្ថាប័នទាំងនោះមានបុរសភាគច្រើននិងស្ថិតនៅក្នុងតំណែងកំពូលៗផងដែរ។

ព្រះរាជក្រឹត្យដែលឡាយព្រះហស្ថលេខាដោយព្រះមហាក្សត្រ និងត្រូវបានផ្សព្វផ្សាយដោយបណ្តាញព័ត៌មាន Fresh News បង្ហាញថា មានរដ្ឋលេខាធិការ និងអនុរដ្ឋលេខាធិការសរុបចំនួន ១.៤២២នាក់ នៅក្នុងក្រសួងទាំង២៩ ឬគិតជាមធ្យមក្រោម៥០នាក់សម្រាប់ក្រសួងនីមួយ ហើយដែលសម្បូរទៅដោយបុរសៗ។

សរុបមក មន្ត្រីកំពូលនៅតាមក្រសួងទាំងនេះគឺមានស្ត្រីត្រឹមតែ១៥ភាគរយប៉ុណ្ណោះ ដោយក្រសួងការពារជាតិស្ថិតនៅលេខរៀងក្រោមគេដោយមានចំនួន៤,៧ភាគរយ។ តួរលេខស្ត្រីក្នុងចំណោមក្រសួងទាំងអស់នេះស្ថិតនៅក្រោម២៥ភាគរយលើកលែងតែក្រសួងពីរប៉ុណ្ណោះ គឺក្រសួងកិច្ចការនារីនិងក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច។

តួរលេខសរុបរដ្ឋលេខាធិការនិងអនុរដ្ឋលេខាធិការនៅតាមក្រសួង

ជាអ្វីដែលគេអាចសន្និដ្ឋានបានថា ជាការធ្វើឲ្យល្អមើល បើធៀបទៅនឹងស្ថាប័នភាគច្រើនដែលគ្រប់គ្រងដោយបុរសនោះ ក្រសួងកិច្ចការនារីមានមន្ត្រីជាន់ខ្ពស់៩៣ភាគរយ គឺជាស្ត្រី ប៉ុន្តែក្រសួងនេះទទួលបានថវិកាប្រចាំឆ្នាំកម្រិតទាបបំផុតទីពីរ ដើម្បីដោះស្រាយបញ្ហានៃការផ្តល់តម្លៃស្ត្រីទាបជាងបុរសនៅកម្ពុជា។

ចំនួនមន្ត្រីថ្នាក់កំពូលៗទំនងជាស្របទៅនឹងទំហំថវិការបស់ក្រសួង ប៉ុន្តែមានក្រសួងមួយចំនួនដូចជាក្រសួងអប់រំ យុវជននិងកីឡាករ មានចំនួនរដ្ឋលេខាធិការ និងអនុរដ្ឋលេខាធិការទាបបំផុតទីប្រាំបី គឺ៣៤រូប ទោះបីជាក្រសួងនេះទទួលបានថវិកាប្រចាំឆ្នាំច្រើនរហូតដល់៨៩៥លានដុល្លារក៏ដោយ។

ដោយឡែក ក្រសួងព័ត៌មានមានចំនួនមន្ត្រីថ្នាក់កំពូលច្រើនលំដាប់ទីបួនសរុប៦៩រូប បើទោះបីជាទទួលបានថវិកាប្រចាំឆ្នាំទាបបំផុតទីប្រាំមួយត្រឹម២០លានដុល្លារក៏ដោយ។

ចំនួនរដ្ឋលេខាធិការនិងអនុរដ្ឋលេខាធិការធៀបនឹងថវិកាប្រចាំឆ្នាំរបស់ក្រសួង

ចំណែកនៅក្រៅក្រសួង មានស្ត្រីតែម្នាក់គត់នៅក្នុងចំណោមរដ្ឋមន្ត្រីប្រតិភូអមនាយករដ្ឋមន្ត្រីទាំង២៩រូប ចំណែកនៅខុទ្ធកាល័យនាយករដ្ឋមន្ត្រីវិញ មានស្ត្រីតែបីរូបប៉ុណ្ណោះក្នុងចំណោមប្រធាននិងអនុប្រធានទាំង២៤រូប។

ក្នុងចំណោមសមាជិកសភាចំនួន១២៥រូប មានតែ១៦នាក់ប៉ុណ្ណោះ គឺជាស្ត្រី ឬស្មើ ១៣ភាគរយ ខណៈដែលក្នុងចំណោមសមាជិកគណៈរដ្ឋមន្ត្រី៥៤រូប មានត្រឹមតែ ៣នាក់ប៉ុណ្ណោះ គឺជាស្ត្រី ឬ៥,៦ភាគរយ។

មូលដ្ឋានទិន្នន័យកំណត់ត្រាកំពុងចងក្រងឈ្មោះមន្ត្រីរដ្ឋាភិបាលកំពូលៗ ហើយនឹងចេញផ្សាយទិន្នន័យ និងរំលេចអំពីបុគ្គលសំខាន់ៗនៅលើទំព័រអ្នកស្នងតំណែងឆ្នាំ២០២៣៕

ក្រសួង	រដ្ឋលេខាធិការ	អនុរដ្ឋលេខាធិការ	ស្ត្រី
ការពារជាតិ	44	42	4.65%
ធម្មការនិងសាសនា	33	12	6.67%
សាធារណការ និងដឹកជញ្ជូន	30	31	8.20%
អាកាសចរណ៍ស៊ីវិល	12	11	8.70%
ផែនការ	23	21	9.09%
មហាផ្ទៃ	42	62	9.62%
កសិកម្ម	25	35	10.00%
ទីស្តីការគណៈរដ្ឋមន្ត្រី	54	35	10.11%
ឧស្សាហកម្ម	20	19	10.26%
សេដ្ឋកិច្ច និងហិរញ្ញវត្ថុ	23	23	10.87%
អប់រំ យុវជន និងកីឡា	14	20	11.76%
អភិវឌ្ឍន៍ជនបទ	32	26	12.07%
បរិស្ថាន	18	23	12.20%
ធនធានទឹក	11	13	12.50%
ទេសចរណ៍	26	16	14.29%
រៀបចំដែនដី	18	27	15.56%
ព័ត៌មាន	30	39	15.94%
ទូរគមនាគមន៍	21	29	16.00%
យុត្តិធម៌	16	14	16.67%
សង្គមកិច្ច	31	38	17.39%
រ៉ែ និងថាមពល	19	13	18.75%
មុខងារសាធារណៈ	22	29	19.61%
ការបរទេស	19	16	20.00%
សុខាភិបាល	35	19	20.37%
វប្បធម៌ និងវិចិត្រសិល្បៈ	14	15	20.69%
ការងារ	32	23	21.82%
ពាណិជ្ជកម្ម	36	17	24.53%
ទំនាក់ទំនងសភា ព្រឹទ្ធសភា	18	9	29.63%
កិច្ចការនារី	15	12	92.59%

មានស្ត្រីតែ១៥ភាគរយប៉ុណ្ណោះក្នុងចំណោមមន្ត្រីកំពូលៗនៅតាមក្រ សួង

បច្ចុប្បន្នភាពថ្មី

លោក មួង ឃីម ត្រូវបានបញ្ចប់មុខតំណែងពីទីប្រឹក្សាក្រសួងយុត្តិធម៌

លោក ប្រាក់ សុខុន គ្រោងវិលមកកាន់តំណែងជារដ្ឋមន្ត្រីក្រសួងការបរទេសឡើងវិញ

ព្រះមហាក្សត្រចេញព្រះរាជក្រឹត្យបញ្ចប់មុខតំណែងលោក ដួង តារា ពីរដ្ឋលេខាធិការ ទីស្តីការគណៈរដ្ឋមន្ត្រី

តុលាការសម្រេចឃុំខ្លួនលោក លី សាម៉េត នៅពន្ធនាគារព្រៃស ពីបទឆបោក

រាជរដ្ឋាភិបាលតែងតាំងលោក លីវ វណ្ណថេង ជាអភិបាលស្រុកល្វាឯមជំនួសលោក កន សុខកាយ

នាយនគរបាលថ្នាក់ឧត្តមសេនីយ៍បីរូប ត្រូវបានបន្ថយឋានន្តរស័ក្តិមកត្រឹមពលបាលត្រី

បច្ចុប្បន្នភាព