រដ្ឋសភា នឹងបើកសម័យប្រជុំ ដើម្បីបោះឆ្នោតផ្តល់សេចក្តីទុកចិត្តលើការកែសម្រួលសមាសភាពរាជរដ្ឋាភិបាលចំនួន២រូប នៅថ្ងៃព្រឹកថ្ងៃទី២០ខែវិច្ឆិកានេះ ដែលក្នុងនោះ លោក ប្រាក់ សុខុន គ្រោងវិលមកកាន់តំណែងជារដ្ឋមន្ត្រីក្រសួងការបរទេសជំនួសលោក សុខ ចិន្តាសោភា វិញ។
យោងតាមសេចក្តីជូនដំណឹងរបស់អគ្គលេខាធិការដ្ឋានរដ្ឋសភា ចុះថ្ងៃទី១៩ ខែវិច្ឆិកា ឆ្នាំ២០២៤ បានឱ្យដឹងថា រដ្ឋសភានឹងបន្តសម័យប្រជុំលើកទី៣ នីតិកាលទី៧ ដើម្បីបោះឆ្នោតផ្តល់សេចក្តីទុកចិត្តលើការកែសម្រួល និងតែងតាំងបំពេញបន្ថែមសមាសភាពរាជរដ្ឋាភិបាលចំនួន២រូប ដែលក្នុងនោះ អតីតរដ្ឋមន្ត្រីក្រសួងការបរទេស លោក ប្រាក់ សុខុន នឹងត្រូវតែងតាំងជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជំនួសលោក សុខ ចិន្តាសោភា ដែលត្រូវបានតែងតាំងជាឧបនាយករដ្ឋមន្ត្រី។
លោក ប្រាក់ សុខុន ធ្លាប់កាន់តំណែងជារដ្ឋមន្ត្រីក្រសួងការបរទេសតាំងពីឆ្នាំ២០១៦ រហូតដល់ឆ្នាំ២០២៣ ហើយលោកត្រូវបានជំនួសដោយលោក សុខ ចិន្តាសោភា នៅក្នុងអាណត្តិរាជរដ្ឋាភិបាល នីតិកាលទី៧នេះ។ បច្ចុប្បន្ន លោក ប្រាក់ សុខុន ក៏មានតួនាទីជាអនុប្រធានទី១ ព្រឹទ្ធសភា និងជាឧត្តមប្រឹក្សាផ្ទាល់ព្រះមហាក្សត្រផងដែរ។
ស្រដៀងគ្នានេះដែរ កាលពីខែសីហា មន្ត្រីការទូតចំនួន១១រូប ត្រូវបានបញ្ចប់ និងតែងតាំងមុខតំណែងឯកអគ្គរាជទូត នេះបើយោងតាមព្រះរាជក្រឹត្យ ចុះថ្ងៃទី០៨ ខែសីហា ឆ្នាំ២០២៤ ដូចគ្នា ដែលត្រូវបានចេញផ្សាយនៅក្នុងសៀវភៅរាជកិច្ចលេខ៧១ ត្រីមាសទី៣ ដោយទីស្តីការគណៈរដ្ឋមន្ត្រីកាលពីថ្ងៃទី៨ ខែវិច្ឆិកា ឆ្នាំ២០២៤។
ឯកសារដដែលនេះបញ្ជាក់ថា ក្នុងចំណោមមន្ត្រីការទូតទាំង១១រូបនោះ មានលោក កុយ គួង ត្រូវបានបញ្ចប់មុខតំណែងជាឯកអគ្គរាជទូត ខណៈលោកស្រី រត្ន ម៉ានី អនុរដ្ឋលេខាធិការ នៃក្រសួងការបរទេស ត្រូវបានតែងតាំងជំនួសលោកលោក កុយ គួង ជាឯកអគ្គរាជទូតប្រចាំប្រទេសឥណ្ឌា បង់ក្លាដែស ស្រីលង្កា អ៊ីរ៉ង់ នេប៉ាល់និងម៉ាល់ឌីវ។
លោក កុយ គួង ក៏ត្រូវបានតែងតាំងជាឯកអគ្គរាជទូតប្រចាំសហរដ្ឋអាមេរិក និងប្រចាំរដ្ឋម៉ិកស៊ីកកូជំនួសលោក កែវ ឈា ដែលត្រូវបានបញ្ចប់មុខតំណែង និងត្រូវបានតែងតាំងជាតំណាងអចិន្ត្រៃយ៍ និងជាឯកអគ្គរាជទូតប្រចាំនៅអង្គការសហប្រជាជាតិ និងប្រចាំប្រទេសកាណាដា។
លោក ជ័យ រដ្ឋា ជាអគ្គនាយករង នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន ត្រូវបានតែងតាំងជាឯកអគ្គរាជទូតប្រចាំសាធារណរដ្ឋប៊ុលហ្គារី រ៉ូម៉ានី ក្រិក និងសាធារណរដ្ឋស៊ីប ជំនួសលោក ថៃ ជុន។ លោកស្រី គឹមសួគ៌ សុវណ្ណារី អគ្គនាយករង នៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈិមបូព៌ា ត្រូវបានតែងតាំងជាឯកអគ្គរាជទូតប្រចាំប្រទេសបែលហ្ស៊ិក អូទ្រីស ហូឡង់ លុចសំបួ និងសហភាពអឺរ៉ុប ជំនួសលោក នង សាកល។
ចំណែកលោក ស៊ិន សារៀម អគ្គនាយករង នៃអគ្គនាយកដ្ឋានអាស៊ាន ត្រូវបានតែងតាំងជាឯកអគ្គរាជទូតប្រចាំសាធារណរដ្ឋហ្វីលីពីន ជំនួសលោក ផន ពៅ។ លោក ប្រាក់ ងួនហុង រដ្ឋលេខាធិការ នៃក្រសួងការបរទេស និងលោក ចេង ម៉ានិត អគ្គនាយក នៃអគ្គនាយកដ្ឋានសហប្រតិបត្តិការអន្តរជាតិ នៃក្រសួងការបរទេស ត្រូវបានតែងតាំងជាឯកអគ្គរាជទូតប្រចាំសាធារណរដ្ឋប្រេស៊ីល និងប្រចាំសាធារណរដ្ឋសហភាពមីយ៉ាន់ម៉ា៕
