លោកនាយករដ្ឋមន្ត្រី ហ៊ុន ម៉ាណែត ចេញអនុក្រឹត្យបញ្ចប់មុខតំណែងលោក កន សុខកាយ ពីអភិបាលនៃគណៈអភិបាលស្រុកល្វាឯម នៃខេត្តកណ្តាល ដោយសារប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ បន្ទាប់ពីបែកធ្លាយព័ត៌មានដែលតាមចោទថា លោកបានសូកប៉ាន់ប្រាក់ ៣០ម៉ឺនដុល្លារ ដើម្បីបានធ្វើជាអភិបាលក្រុងអរិយក្សត្រ។
យោងតាមអនុក្រឹត្យលេខ ១០០៩ អនក្រ.តត ចុះថ្ងៃទី៨ ខែតុលា ឆ្នាំ២០២៤ បានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត សម្រេចបញ្ចប់មុខតំណែងលោក កន សុខកាយ ឋានន្តរស័ក្តិឧត្តមមន្ត្រី ថ្នាក់លេខ៥ ពីអភិបាល នៃគណៈអភិបាលស្រុកល្វាឯម នៃខេត្តកណ្តាល ដោយសារសាមីខ្លួនបានប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ ផ្ទុយនឹងច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។
គួរកត់សម្គាល់ថា កាលពីថ្ងៃទី៧ ខែតុលា អតីតនាយករដ្ឋមន្ត្រី លោក ហ៊ុន សែន ដែលបច្ចុប្បន្នជាប្រធានព្រឹទ្ធសភា បានទម្លាយពីករណីឆបោកជាច្រើនករណី ដែលប្រព្រឹត្តដោយបុគ្គលឈ្មោះ លី សាម៉េត ដែលមានងារជាឧកញ៉ាផងនោះ ដោយលោកបានបង្ហោះនៅលើទំព័រហ្វេសប៊ុករបស់លោកថា លោក លី សាម៉េត (ហៅគ្រូមា) តែងតែប្រើឈ្មោះរបស់លោកដើរបោកប្រាស់គេ ដោយអះអាងថា ខ្លួនចេញចូលផ្ទះរបស់លោក ហ៊ុន សែន ពេលណាក៏បាន។
លោក ហ៊ុន សែន បានបញ្ជាក់ថា ឆ្នាំ២០២២ លោក លី សាម៉េត បានបោកលុយឈ្មោះ សុខ ឡេង ចំនួន១០លានដុល្លារ ក្រោយមកលោកបានទាមទារឱ្យប្រគល់ទៅឈ្មោះ សុខ ឡេង វិញ ដោយឡែកប៉ុន្មានថ្ងៃមុននេះ លោក ហ៊ុន សែន ក៏បានប្រាប់ឱ្យលោក លី សាម៉េត សងប្រាក់ទៅលោក មួង ឃីម ចំនួន ២៣ម៉ឺនដុល្លារផងដែរ។
លោក ហ៊ុន សែន ក៏បានទម្លាយផងដែរថា កាលពីថ្ងៃទី៧ ខែតុលា ឆ្នាំ២០២៤នេះ លោកបានទទួលវីដេអូពីលោក កន សុខកាយ អភិបាលស្រុកល្វាឯម ដែលអះអាងថា ខ្លួនបានផ្តល់ប្រាក់ចំនួន ៣០ម៉ឺនដុល្លារទៅលោក លី សាម៉េត ដើម្បីរត់ការឱ្យបានតំណែងជាអភិបាលក្រុងអរិយក្សត្រ។
លោក ហ៊ុន សែន ក៏បានស្នើឱ្យមានវិធានការផ្លូវច្បាប់លើលោក លី សាម៉េត ផងដែរ៕
