សម្តេចចៅហ្វាវាំង គង់ សំអុល ជាសមាជិករដ្ឋសភា ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង បានទទួលមរណភាពក្នុងជន្មាយុ៩៤ឆ្នាំ ដោយជរាពាធ នេះយោងតាមសេចក្តីជូនដំណឹងរបស់ក្រសួងព្រះបរមរាជវាំង។
យោងតាមសេចក្តីជូនដំណឹងរបស់ក្រសួងព្រះបរមរាជវាំងចុះថ្ងៃទី០២ ខែកញ្ញា ឆ្នាំ២០២៤ បានឱ្យដឹងថា សម្តេចចៅហ្វាវាំង គង់ សំអុល បានទទួលមរណភាព នៅថ្ងៃទី០២ ខែកញ្ញា ឆ្នាំ២០២៤ នៅវេលាម៉ោង ០៨និង៣៥នាទីព្រឹក ហើយសពសម្តេចចៅហ្វាវាំងត្រូវបានតម្កល់ដើម្បីប្រារព្ធពិធីបុណ្យតាមប្រពៃណីសាសនានៅគេហដ្ឋានស្ថិតនៅផ្ទះលេខ៨៣ ផ្លូវសុកហុក (១០៧) កែងនឹងវិថី ហ្សូសិបប្រូសទីតូ (២១៤) សង្កាត់បឹងព្រលិត ខណ្ឌ៧មករា រាជធានីភ្នំពេញ។
សម្តេចចៅហ្វាវាំង គង់ សំអុល គឺជាអ្នកនយោបាយជើងចាស់មកពីគណបក្សប្រជាជនកម្ពុជា ហើយលោកកាន់តួនាទីជាច្រើនដូចជា ប្រធានគណៈកម្មាធិការជាតិរៀបចំបុណ្យជាតិ -អន្តរជាតិ និងជាអនុប្រធានកាកបាទក្រហមកម្ពុជា ក៏ជាតំណាងរាស្ត្រនីតិកាលទី៧ សម្រាប់មណ្ឌលខេត្តកំពង់ឆ្នាំងផងដែរ។ សម្តេចធ្លាប់ជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទពីឆ្នាំ១៩៨៦ ដល់ឆ្នាំ១៩៨៩៕
