រដ្ឋាភិបាល ចេញសារាចរអនុញ្ញាតឱ្យមន្ត្រីរាជការ បុគ្គលិក និយោជិត និងសិស្សនិស្សិត ឈប់សម្រាកចំនួន១ថ្ងៃ នៅថ្ងៃទី៥ ខែសីហា ដើមសប្តាហ៍ក្រោយ ដើម្បីចូលរួមអបអរការបើកការដ្ឋានសាងសង់ព្រែកជីកហ្វូណនតេជោ។
យោងតាមសារាចរលេខ១១ សរ ចុះថ្ងៃទី១ ខែសីហា ឆ្នាំ២០២៤ បានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត បានអនុញ្ញាតឱ្យមន្ត្រីរាជការ បុគ្គលិក កម្មករ និយោជិត និងសិស្ស និស្សិត ឈប់សម្រាកចំនួន១ថ្ងៃ គឺនៅថ្ងៃទី៥ ខែសីហា ឆ្នាំ២០២៤ បន្ទាប់ពីការចូលរួមអបអរសាទរការបើកការដ្ឋានសាងសង់ព្រែកជីកហ្វូណនតេជោជាផ្លូវការ នៅតាមក្រសួង ស្ថាប័ន អង្គភាព គ្រឹះស្ថានសាធារណៈ និងឯកជន រោងចក្រនិងសហគ្រាសនីមួយៗ។
សារាចរនេះ ក៏បានបញ្ជាក់ផងដែរថា ការឈប់សម្រាកនៅថ្ងៃទី៥ ខែសីហា របស់បុគ្គលិក និងកម្មករ និយោជិត ត្រូវទទួលបានប្រាក់ឈ្នួល។
រដ្ឋាភិបាល បានប្រកាសយកថ្ងៃទី៥ ខែសីហា ជាថ្ងៃបើកការដ្ឋានសាងសង់ព្រែកជីកហ្វូណនតេជោ ដែលមានតម្លៃ ១,៧ពាន់លានដុល្លារ។ រដ្ឋាភិបាលក៏បានអំពាវនាវឱ្យប្រជាពលរដ្ឋវាយស្គរ និងបាញ់កាំជ្រួច ដើម្បីអបអរសាទរសមិទ្ធផលជាប្រវត្តិសាស្ត្រសម្រាប់កម្ពុជានេះផងដែរ។
ព្រែកជីកប្រវែង ១៨០ គីឡូម៉ែត្រនឹងតភ្ជាប់រាជធានីភ្នំពេញទៅខេត្តកែប ដោយកាត់តាមផ្លូវទឹកក្នុងខេត្តកណ្តាល តាកែវ កំពត និងខេត្តកែប។
យោងតាមសេចក្តីរាយការណ៍របស់ខេមបូចា ដែលបានដកស្រង់សម្តីរបស់លោក ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ដែលអះអាងថា គម្រោងព្រែកជីកនេះ នឹងប៉ះពាល់ប្រជាពលរដ្ឋចំនួន ១ ៥៨៥ គ្រួសារ ដីលំនៅដ្ឋាន ១៤៩,៥ហិកតា និងដីស្រែ និងដីចំការចំនួន ២ ៩០០ ហិកតា៕
