លោកនាយករដ្ឋមន្ត្រី ហ៊ុន ម៉ាណែត សម្រេចផ្ទេរភារកិច្ចរបស់ប្រធានមន្ទីរបរិស្ថានខេត្តចំនួន ២រូប ឱ្យមកបម្រើការងារនៅក្រសួងបរិស្ថាន។
យោងតាមអនុក្រឹត្យចុះថ្ងៃទី៤ ខែកក្កដា ឆ្នាំ២០២៤នេះ លោកនាយករដ្ឋមន្ត្រី ហ៊ុន ម៉ាណែត បានសម្រេចផ្ទេរភារកិច្ចមន្ត្រីរាជការចំនួន ២រូប របស់ក្រសួងបរិស្ថាន ដែលក្នុងនោះ មានលោក ឆៅ ប៊ុនធឿន ប្រធានមន្ទីរបរិស្ថានខេត្តមណ្ឌលគិរី និងលោក គង់ ពុទ្ធិរ៉ា ប្រធានមន្ទីរបរិស្ថានខេត្តពោធិ៍សាត់ ឱ្យមកបម្រើការងារនៅទីស្តីការក្រសួងបរិស្ថាន។ ការផ្ទេរភារកិច្ចនេះ ធ្វើឡើងតាមសំណើរបស់រដ្ឋមន្ត្រីក្រសួងបរិស្ថាន។
អនុក្រឹត្យដដែលនេះ មិនបានបញ្ជាក់ពីមូលហេតុនៃការផ្ទេរភារកិច្ចនេះទេ។
លោក គង់ ពុទ្ធិរ៉ា ត្រូវបានតែងតាំងជាប្រធានមន្ទីរបរិស្ថានខេត្តពោធិ៍សាត់ ជំនួសលោក ប៉ាន់ មរកត ដែលត្រូវបានផ្ទេរភារកិច្ចទៅបម្រើការងារនៅទីស្តីការក្រសួងបរិស្ថាន តាមរយៈប្រកាសលេខ០៤១ ប្រ.ក ដែលចុះហត្ថលេខាដោយលោក សាយ សំអាល់ កាលពីថ្ងៃទី១៣ ខែមករា ឆ្នាំ២០២១។
ដោយឡែកនៅក្នុងលិខិតចុះថ្ងៃទី២៤ ខែមេសា ឆ្នាំ២០២៤ រដ្ឋបាលខេត្តមណ្ឌលគិរី បានស្នើទៅរដ្ឋមន្ត្រីក្រសួងបរិស្ថាន លោក អ៊ាង សុផល្លែត សម្រួលភារកិច្ចលោក ឆៅ ប៊ុនធឿន ប្រធានមន្ទីរបរិស្ថានខេត្តមណ្ឌលគិរី និងស្នើតែងតាំងលោក ឌិន ប៊ុនធឿន អនុប្រធានមន្ទីរបរិស្ថានខេត្ត ដើម្បីដឹកនាំការងារនេះបណ្តោះអាសន្ន។
ក្នុងលិខិតដដែលនេះ ក៏បានបញ្ជាក់ផងដែរថា ការស្នើសុំសម្រួលភារកិច្ចនេះ គឺយោងតាមស្មារតីកិច្ចប្រជុំថ្ងៃទី២៣ ខែមេសា ឆ្នាំ២០២៤ របស់រដ្ឋបាលខេត្តមណ្ឌលគិរី បន្ទាប់ពីទទួលបានអនុសាសន៍ណែនាំចំនួន ៧ចំណុច នៅក្នុងកិច្ចប្រជុំកាលពីថ្ងៃទី២៩ ខែមីនា ឆ្នាំ២០២៤ របស់គណៈកម្មការជាតិ ដើម្បីទប់ស្កាត់និងបង្រ្កាបបទល្មើសធនធានធម្មជាតិ ក្នុងការចាត់វិធានការរដ្ឋបាលមន្ត្រីពាក់ព័ន្ធករណីបទល្មើសធនធានធម្មជាតិនៅក្នុងតំបន់ដែនជម្រកសត្វព្រៃណាមលៀ។
កាលពីថ្ងៃទី១៤ ខែមីនា ឆ្នាំ២០២៣ លោក ឆៅ ប៊ុនធឿន ត្រូវបានប្រកាសតែងតាំងជាប្រធានមន្ទីរបរិស្ថានខេត្តមណ្ឌលគិរី ជំនួសលោក កែវ សុភគ៌ ដែលត្រូវបានដំឡើងទៅជាអគ្គាធិការ នៃអគ្គាធិការដ្ឋានក្រសួងបរិស្ថាន៕
