រដ្ឋាភិបាលសម្រេចផ្ទេរអភិបាលរងខេត្តចំនួនបីរូបមកពីខេត្តផ្សេងគ្នាមានខេត្តស្វាយរៀង ព្រះសីហនុ និងខេត្តកោះកុង ឱ្យមកកាន់មុខតំណែងជាអភិបាលរងខេត្តកំពង់ស្ពឺ។
យោងតាមអនុក្រឹត្យលេខ ៦៣៣ អនក្រ.តត ចុះថ្ងៃទី០២ ខែកក្កដា ឆ្នាំ២០២៤ បានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត សម្រេចផ្ទេរភារកិច្ចមន្រ្តីរាជការចំនួន០៣រូប រួមមាន ១- លោក តូច ប៉ូលីវ៉ា ឋានន្តរស័ក្តិឧត្តមមន្ត្រី ថ្នាក់លេខ៣ ពីអភិបាលរងខេត្តស្វាយរៀង ទៅឱ្យកាន់តំណែងជាអភិបាលរងខេត្តកំពង់ស្ពឺ ទី២- លោក ជាវ វិជ្ជាក់ ឋានន្តរស័ក្តិឧត្តមមន្ត្រី ថ្នាក់លេខ៣ ពីអភិបាលរងខេត្តព្រះសីហនុ ទៅឱ្យកាន់តំណែងជាអភិបាលរងខេត្តកំពង់ស្ពឺ ទី៣- លោក សុខ សុទ្ធី ឋានន្តរស័ក្តិឧត្តមមន្ត្រី ថ្នាក់លេខ៤ ពីអភិបាលរងខេត្តកោះកុង ឱ្យទៅកាន់តំណែងជាអភិបាលរងខេត្តកំពង់ស្ពឺ។ ការផ្ទេរមន្ត្រីរាជការនេះ ធ្វើឡើងតាមសំណើរបស់រដ្ឋមន្ត្រីក្រសួងមហាផ្ទៃ។
កាលបរិច្ឆេទថ្ងៃទី២៤ ខែមិថុនា ឆ្នាំ២០២៤ ព្រះមហាក្សត្រ បានត្រាស់បង្គាប់ផ្ទេរ និងតែងតាំងមុខតំណែងអភិបាលខេត្តចំនួន ៤រូប ដែលក្នុងនោះលោក ជាម ច័ន្ទសោភ័ណ អភិបាលខេត្តត្បូងឃ្មុំ ត្រូវបានប្តូរទៅកាន់ខេត្តកំពង់ស្ពឺ លោក គួច ចំរើន អភិបាលខេត្តព្រះសីហនុ ត្រូវបានប្តូរទៅកាន់ខេត្តកណ្តាល លោក វ៉ី សំណាង អភិបាលខេត្តកំពង់ស្ពឺ ត្រូវបានប្តូរទៅកាន់ខេត្តតាកែវ លោក ប៉ែន កុសល្យ អភិបាលខេត្តឧត្តរមានជ័យ ត្រូវបានប្តូរទៅកាន់ខេត្តត្បូងឃ្មុំ។
យោងតាមច្បាប់ស្តីពីវិសោធនកម្មមាត្រា១៤០ នៃច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលត្រូវព្រះមហាក្សត្រឡាយព្រះហស្ថលេខា ដាក់ឱ្យប្រើប្រាស់កាលពីខែមិថុនា ឆ្នាំ២០២២ បានកំណត់ថា គណៈអភិបាលរាជធានីភ្នំពេញមានចំនួនយ៉ាងច្រើន ១១រូប គណៈអភិបាលខេត្តមានចំនួន ៧រូប ទៅ១១រូប គណៈអភិបាលក្រុង ស្រុក ខណ្ឌ មានចំនួនពី ៥រូប ទៅ៧រូប៕
