ឧកញ៉ា ខុង លីស៊ីអាណា ជាសមាជិកសភាពាណិជ្ជកម្មកម្ពុជា ជាម្តាយ របស់អតីតឧកញ៉ា ឌួង ឆាយ ត្រូវបានព្រះមហាក្សត្រត្រាស់បង្គាប់ផ្តល់គោរមងារជា “អ្នកឧកញ៉ា”។
យោងតាមព្រះរាជក្រឹត្យចុះថ្ងៃទី២៤ ខែមិថុនា ឆ្នាំ២០២៤ ព្រះករុណា ព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យត្រាស់បង្គាប់ផ្តល់គោរមងារជា “អ្នកឧកញ៉ា” ដល់ឧកញ៉ា ខុង លីស៊ីអាណា។
លោកស្រីឧកញ៉ា ខុង លីស៊ីអាណា គឺជាម្ចាស់ក្រុមហ៊ុន ឌីអិនជី គ្រុប (D N G Group) ជាក្រុមហ៊ុនវិនិយោគលើវិស័យសំណង់ ហើយលោកស្រីត្រូវបានគេស្គាល់ថា ជាម្តាយរបស់លោក ឌួង ឆាយ អគ្គនាយកក្រុមហ៊ុន Downtown Development។ លោក ឌួង ឆាយ ត្រូវបានលោក សាយ ឈុំ ដែលកាលណោះគឺជាប្រមុខរដ្ឋស្តីទី ចេញព្រះរាជក្រឹត្យត្រាស់បង្គាប់បញ្ចប់គោរមងារឧកញ៉ា កាលពីថ្ងៃទី១៨ ខែមីនា ឆ្នាំ២០២១ បន្ទាប់ពីអតីតភរិយារបស់លោក គឺអ្នកស្រី ដេត ម៉ាលីណា បញ្ចេញឃ្លីបវីដេអូតាមបណ្តាញសង្គម បង្ហាញសកម្មភាពហិង្សារបស់លោកទៅលើអ្នកស្រី។
លោកស្រីឧកញ៉ា ខុង លីស៊ីអាណា ត្រូវបានព្រះមហាក្សត្រ ចេញព្រះរាជក្រឹត្យត្រាស់បង្គាប់ផ្តល់គោរមងារ “ឧកញ៉ា” កាលពីថ្ងៃទី២៧ ខែកក្កដា ឆ្នាំ២០២៣។
គោរមងារជាឧកញ៉ានៅកម្ពុជា មាន៣ថ្នាក់ គឺឧកញ៉ា អ្នកឧកញ៉ា និងលោកអ្នកឧកញ៉ា។ បច្ចុប្បន្ន ដើម្បីទទួលបានគោរមងារជាឧកញ៉ា ដរាបណាបុគ្គលនោះ បានបរិច្ចាគថវិកាលើសកម្មភាពមនុស្សធម៌ជួយ សង្គម ចាប់ពី៥០ម៉ឺនដុល្លារឡើងទៅ ខណៈមុនថ្ងៃទី២០ ខែមីនា ឆ្នាំ២០១៧ គោរមងារ «ឧកញ៉ា» តម្រូវត្រឹម តែ ១០ម៉ឺនដុល្លារប៉ុណ្ណោះ នេះបើយោងតាមអនុក្រឹត្យលេខ ៤៣ អនក្រ.បក ចុះថ្ងៃទី២០ ខែមីនា ឆ្នាំ២០១៧៕
