បុគ្គលចំនួន ៧៦រូប ត្រូវបានព្រះមហាក្សត្រចេញព្រះរាជក្រឹត្យផ្ដល់គោរមងារ ជាឧកញ៉ា អ្នកឧកញ៉ា និងលោកអ្នកឧញ៉ា នេះបើយោងតាមសៀវភៅរាជកិច្ចចាប់ពីលេខ១ ដល់លេខ៤៨ ដែលចេញផ្សាយនៅក្នុង ត្រីមាសទី១ និងត្រីមាសទី២ នៃឆ្នាំ២០២៤ និងត្រូវបានចេញផ្សាយដោយទីស្តីការគណៈរដ្ឋមន្ត្រី ចាប់ពីថ្ងៃទី ២៥ ខែមករា ដល់ថ្ងៃទី១២ ខែមិថុនា ឆ្នាំ២០២៤ ។
ឯកសារដដែលនេះ បានបង្ហាញថា ក្នុងចំណោមបុគ្គលទាំង ៧៦រូប ដែលទទួលបានគោរមងារ មាន ២៤រូប ទើបតែទទួលបានគោរមងារជាឧកញ៉ា ហើយ៤៤រូបបានឡើងពីឧកញ៉ាមកជាអ្នកឧកញ៉ា និង៨រូប ទៀតបានឡើងពីអ្នកឧកញ៉ាមកជាលោកអ្នកឧកញ៉ា។
នៅក្នុងចំណោមបុគ្គលទាំង៨រូប ដែលបានឡើងឋានៈពីអ្នកឧកញ៉ា មកជាលោកអ្នកឧកញ៉ា ដែលជា គោរមងារខ្ពស់បំផុតនៅកម្ពុជា រួមមាន លោក ពុង ឃាវសែ លោក លី យ៉ុងផាត់ លោក ទ្រី ភាព លោក ស៊ី គង់ទ្រីវ លោកស្រី ភូ ហុងស៊ួន ស៊ីគង់ទ្រីវ លោក លាង ឃុន លោក លី ហួរ និងលោកស្រី ភាព ហៀក ។
លោក ពុង ឃាវសែ ជាវិនិយោគិនដ៏មានឥទ្ធិពលនិងរឹងមាំបំផុតអស់ជាច្រើនទស្សវត្សនៅក្នុងពិភព ជំនួញ ដែលបានបោះទុនវិនិយោគស្ទើរគ្រប់វិស័យទាំងអស់នៅកម្ពុជា។ លោកជាអគ្គនាយកក្រុមហ៊ុនវិនិ យោគទុនអាណិកជនកម្ពុជា (OCIC) ជាអគ្គនាយកធនាគារកាណា ឌីយ៉ា ប្រធានសមាគមអ្នកសាងសង់ កម្ពុជា (CCA) ប្រធានសមាគមខ្មែរ-ចិន។ កន្លងមក លោក ពុង ឃាវសែ ទទួលបានសិទ្ធិពីរដ្ឋាភិបាល ក្នុង ការសាងសង់អាកាសយានដ្ឋានអន្តរជាតិភ្នំពេញថ្មី ស្ថិតនៅក្នុងភូមិសាស្រ្តស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ។ លោក ពុង ឃាវសែ ត្រូវបានព្រះមហាក្សត្រត្រាស់បង្គាប់ផ្ដល់គោរមងារជា លោកអ្នកឧកញ៉ា តាមរយៈព្រះរាជក្រឹត្យលេខ នស/រកត/០៤២៤/៣៤៥ ចុះថ្ងៃទី១២ ខែមេសា ឆ្នាំ២០២៤ ។
ចំណែក លោក ទ្រី ភាព ជាអគ្គនាយកក្រុមហ៊ុនទ្រី ភាព និងជាទីប្រឹក្សាផ្ទាល់លោក ហ៊ុន សែន ប្រធានគណបក្សប្រជាជនកម្ពុជា ហើយថ្មីៗនេះ លោកក៏ទទួលបានការតែងតាំងជា បេសកជនពិសេស របស់លោក ហ៊ុន សែន ប្រធានព្រឹទ្ធសភាកម្ពុជាទៀតផង។ លោក ទ្រី ភាព ត្រូវបានព្រះមហាក្សត្រត្រាស់ បង្គាប់ផ្ដល់គោរមងារជាលោកអ្នកឧកញ៉ាតាមរយៈ ព្រះរាជក្រឹត្យលេខ នស/រកត/០៥២៤/៤៤៩ ចុះថ្ងៃទី១០ ខែឧសភា ឆ្នាំ២០២៤ ។
គោរមងារជាឧកញ៉ានៅកម្ពុជា មាន៣ថ្នាក់ គឺឧកញ៉ា អ្នកឧកញ៉ា និងលោកអ្នកឧកញ៉ា។ បច្ចុប្បន្ន ដើម្បីទទួលបានគោរមងារជាឧកញ៉ា ដរាបណាបុគ្គលនោះ បានបរិច្ចាគថវិកាលើសកម្មភាពមនុស្សធម៌ជួយ សង្គម ចាប់ពី៥០ម៉ឺនដុល្លារឡើងទៅ ខណៈមុនថ្ងៃទី២០ ខែមីនា ឆ្នាំ២០១៧ គោរមងារ «ឧកញ៉ា» តម្រូវត្រឹម តែ ១០ម៉ឺនដុល្លារប៉ុណ្ណោះ នេះបើយោងតាមអនុក្រឹត្យលេខ ៤៣ អនក្រ.បក ចុះថ្ងៃទី២០ ខែមីនា ឆ្នាំ២០១៧៕