ព្រះករុណាព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យ ត្រាស់បង្គាប់ដាក់ឱ្យចូលនិវត្តន៍នាយនគរបាលថ្នាក់ឧត្តមសេនីយ៍២៦រូប។
យោងតាមព្រះរាជក្រឹត្យ ចុះថ្ងៃទី១៧ ខែមិថុនា ឆ្នាំ២០២៤ បានឱ្យដឹងថា ព្រះមហាក្សត្រ ទ្រង់បាន ចេញព្រះរាជក្រឹត្យត្រាស់បង្គាប់ដាក់ឱ្យចូលនិវត្តន៍នាយនគរបាលថ្នាក់ឧត្តមសេនីយ៍ ក្របខ័ណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃ ២៦រូប ដែលក្នុងនោះមានថ្នាក់ឧត្តមសេនីយ៍ឯក២រូប ថ្នាក់ឧត្តមសេនីយ៍ទោ៩រូប និងថ្នាក់ឧត្តមសេនីយ៍ត្រី១៥រូប។
ឯកសារដដែល បានបញ្ជាក់ថា ការដាក់ឱ្យចូលនិវត្តន៍នេះ គឺធ្វើឡើងតាមសេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។
កាលពីថ្ងៃទី១០ ខែមេសា ឆ្នាំ២០២៤ ព្រះមហាក្សត្រទ្រង់បានចេញព្រះរាជក្រឹត្យមួយដាក់ឱ្យចូលនិវត្តន៍នាយនគរបាលថ្នាក់ឧត្តមសេនីយ៍ ក្របខ័ណ្ឌនគរបាលជាតិ នៃក្រសួងមហាផ្ទៃ ចំនួន ៤៣រូបផងដែរ៕
