ក្រសួងមហាផ្ទៃ សម្រេចបណ្តេញមន្ត្រីនគរបាលមួយរូប ចេញពីក្របខណ្ឌមន្ត្រីនគរបាលជាតិ ដោយសារពាក់ព័ន្ធនឹងការប្រើប្រាស់គ្រឿងញៀន។
យោងតាមប្រកាសលេខ៥៧៣ ប្រក ចុះកាលបរិច្ឆេទថ្ងៃទី០២ ខែកុម្ភៈ ឆ្នាំ២០២៤ បានឱ្យដឹងថា លោក ស សុខា រដ្ឋមន្ត្រីក្រសួងមហាផ្ទៃ សម្រេចអនុវត្តវិន័យចំពោះអនុសេនីយ៍ឯក មាស ពិសិដ្ឋ អធិការរងនគរបាលក្រុងកំពត នៃស្នងការដ្ឋាននគរបាលខេត្តកំពត ក្រោមរូបភាពដកហូតមុខតំណែង ឋានន្តរស័ក្តិ និងបណ្តេញចេញពីក្របខ័ណ្ឌមន្ត្រីនគរបាលជាតិ ដោយសារល្មើសវិន័យរបស់កងកម្លាំងនគរបាលជាតិ។
អនុក្រឹត្យដដែល បានបន្ថែមថា ប្រាក់បៀវត្ស និងរបបឧបត្ថម្ភផ្សេងៗ ត្រូវបានកាត់ផ្តាច់ និងលុបចេញពីក្របខ័ណ្ឌមន្ត្រីនគរបាលជាតិ ចាប់ពីខែឧសភា ឆ្នាំ២០២៤ តទៅ។
ទាក់ទងនឹងករណីនេះដែរ ស្នងការដ្ឋាននគរបាលខេត្តកំពត បង្ហោះសារនៅលើទំព័រហ្វេសប៊ុករបស់ខ្លួនកាលពីថ្ងៃទី១៦ ខែធ្នូ ឆ្នាំ២០២៣ថា ស្នងការនគរបាលខេត្តកំពត នឹងស្នើសុំគោលការណ៍ថ្នាក់ដឹកនាំអ្នកស្នងការនគរបាលជាតិ និងថ្នាក់ដឹកនាំក្រសួងមហាផ្ទៃ ដើម្បីបណ្តេញលោកអនុសេនីយ៍ឯក មាស ពិសិដ្ឋ អធិការរងក្រុងកំពត ដែលបានពាក់ព័ន្ធនឹងការប្រើប្រាស់គ្រឿងញៀន។
គិតចាប់ពីចុងខែធ្នូរហូតមកដល់ពេលនេះ មានមន្ត្រីនគរបាលប្រមាណជាង ៣០រូប ត្រូវបានបន្ថយ ដកហូតឋានន្តរស័ក្តិ ដកហូតមុខតំណែង និងបណ្តេញចេញពីក្របខ័ណ្ឌនគរបាលជាតិ ដែលក្នុងនោះមានមន្ត្រីមួយចំនួនពាក់ព័ន្ធនឹងការប្រើប្រាស់គ្រឿងញៀនផងដែរ ខណៈមន្ត្រី ៥០រូបផ្សេងទៀត ត្រូវបានផ្ទេរទៅកាន់នាយកដ្ឋាន ឬអង្គភាពផ្សេង ក្រោមហេតុផលល្មើសវិន័យកងកម្លាំងនគរបាលជាតិ៕
