ក្រសួងមហាផ្ទៃ សម្រេចបណ្តេញមន្ត្រីនគរបាលជាតិចំនួន ៣រូប ពីក្របខ័ណ្ឌ នគរបាលជាតិ ដោយសារល្មើសវិន័យរបស់កងកម្លាំងនគរបាលជាតិ។
មន្ត្រីនគរបាលជាតិ ៣រូបទៀត ត្រូវបានក្រសួងមហាផ្ទៃ ចេញប្រកាស ដោយសម្រេចដកហូតមុខតំណែង ឋានន្តរស័ក្តិ និងបណ្តេញចេញពីក្របខ័ណ្ឌមន្ត្រីនគរបាលជាតិ ដោយមូលហេតុល្មើសវិន័យរបស់កងកម្លាំងនគរបាលជាតិ នេះបើយោងតាមសេចក្តីរាយការណ៍របស់បណ្តាញព័ត៌មានក្នុងស្រុកមួយចំនួនកាលពីថ្ងៃព្រហស្បតិ៍។
យោងតាមប្រកាសរបស់ក្រសួងមហាផ្ទៃចុះកាលបរិច្ឆេទថ្ងៃទី០៤ ខែមករា ឆ្នាំ២០២៤ និងមានចុះហត្ថលេខាដោយលោក ស សុខា រដ្ឋមន្ត្រីក្រសួងមហាផ្ទៃ បានឱ្យដឹងថា លោកស្រីវរសេនីយ៍ត្រី អ៊ុំ ចន្ទ្រា នាយរងការិយាល័យរដ្ឋបាល-សរុប នៃអង្គភាពកីឡានគរបាលជាតិកម្ពុជា និងលោកអនុសេនីយ៍ឯក រ័ត្ន បរិញ្ញា ជាមន្ត្រី ត្រូវបានដកហូតមុខតំណែង ឋានន្តរស័ក្តិ និងបណ្តេញចេញពីក្របខណ្ឌមន្ត្រីនគរបាលជាតិ ដោយសារល្មើសវិន័យរបស់កងកម្លាំងនគរបាលជាតិ។
ឯកសារដដែលបន្ថែមថា ប្រាក់បៀវត្ស និងរបបឧបត្ថម្ភផ្សេងៗត្រូវបានកាត់ផ្តាច់ និងលុបចេញពីក្របខ័ណ្ឌមន្ត្រីនគរបាលជាតិចាប់ពីខែមីនា ឆ្នាំ២០២៤ តទៅ។
នៅក្នុងប្រកាសដាច់ដោយឡែកមួយទៀត ដែលចុះកាលបរិច្ឆេទដូចគ្នា ក្រសួងមហាផ្ទៃក៏បានសម្រេចអនុវត្តវិន័យចំពោះលោកវរសេនីយ៍ត្រី ឈុន ស៊ីណា នាយរងការិយាល័យគ្រប់គ្រងទិន្នន័យស្ថិតិប្រជាពលរដ្ឋ នៃនាយកដ្ឋានស្ថិតិប្រជាពលរដ្ឋ ចំណុះអគ្គនាយកដ្ឋានអត្តសញ្ញាណកម្ម ដោយដកហូតមុខតំណែង ឋានន្តរស័ក្តិ និងបណ្តេញចេញពីក្របខ័ណ្ឌនគរបាលជាតិ ដោយសារល្មើសវិន័យរបស់កងកម្លាំងនគរបាលជាតិ។ ប្រកាសដដែលបញ្ជាក់ថា ប្រាក់បៀវត្ស និងរបបឧបត្ថម្ភផ្សេងៗត្រូវបានកាត់ផ្តាច់ និងលុបចេញពីក្របខ័ណ្ឌមន្ត្រីនគរបាលជាតិចាប់ពីខែមេសា ឆ្នាំ២០២៤ តទៅ។
កាលពីសប្តាហ៍មុន មន្ត្រីនគរបាលសរុប ១៩រូប ត្រូវបានបន្ថយ ដកហូត ឋានន្តរស័ក្តិ ដកហូតមុខតំណែង និងបណ្តេញចេញពីក្របខ័ណ្ឌមន្ត្រីនគរបាលជាតិជាបន្តបន្ទាប់ ក្រោមហេតុផលល្មើសវិន័យ។
ដោយឡែកកាលពីចុងខែធ្នូ ឆ្នាំ២០២៣ ក្រសួងមហាផ្ទៃបានសម្រេចបណ្ដេញមន្ត្រីនគរបាលជាតិចំនួន ១១រូប នៃស្នងការដ្ឋាននគរបាលខេត្តព្រៃវែង ពីក្របខ័ណ្ឌមន្ដ្រីនគរបាលជាតិ ដោយមូលហេតុ ល្មើសវិន័យរបស់កងកម្លាំងនគរបាលជាតិ ពោលគឺ ប្រើប្រាស់ដោយខុសច្បាប់នូវសារធាតុញៀន ខណៈក្រសួងសម្រេចផ្ទេរភារកិច្ចមន្ត្រីនគរបាលជាតិ ៥០រូបផ្សេងទៀត ចេញពីលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយទៅកាន់បណ្តានាយកដ្ឋាន និងអង្គភាពចំនួន១០ ចំណុះឱ្យអគ្គស្នងការដ្ឋាននគរបាលជាតិវិញ បន្ទាប់ពីផ្ទុះរឿងអាស្រូវទារប្រាក់ ១០ម៉ឺនដុល្លារ អំឡុងពេលចុះឆែកឃ្លាំងស្រារបស់ក្រុមហ៊ុនក្នុងស្រុកមួយ នេះបើយោងតាមសេចក្តីរាយការណ៍របស់បណ្តាញព័ត៌មានក្នុងស្រុក Fresh News ៕
